फिलिप्पी 2
2
ख्रीस्त खोदेंशो दुमीन
1ख्रीस्त आ पर्बम इन दातेमी थुं बारपाइक्तीके, दाक्शा वारच पाइब, दे थुं नाइक्तीके, थमा सुइश्शा थुं का दुम्तीके, दाक्मुतीके नु शिशी पतीके बाक्तेक्म हना, 2गेपुकी खाल का ङा दुम्शा, उइक्थ उइक्थ पा दाक्मुशा, नेल्ल गारशा थुं का दुम्शा, आं कली शुश ग्येरपाइक्नीनी। 3गेपुकी ठेयब लेश्शा “गो ठेयब नङ” दे मिम्शा, काइ गेय मपने। ब्रेम्शो थुंमी “मेको मुर आं क्येङा ठेयब बाक्ब” दे मिम्तीन। #गलाती ५:२६; रोमी १२:१० 4गेपुकी का का पा नेल्लेमी आंम दाक्शो ला ममिम्थु, अरु मुर आन दाक्शो “मार बाक्मे” मेको यो मिम्तीन। #१ कोरिन्थी १०:२४; १ कोरिन्थी १३:५ 5ख्रीस्त येसु नु बाक्शो थुं इन दातेमी कोंइदीन। 6ख्रीस्त येसु परमप्रभु यावे नु उइक्थ दुम्शो बाक्त हना यो “परमप्रभु यावे नु उइक्थ दुम्ती” दे ममिम्थु, #यूहन्ना १:१२; यूहन्ना १७:५ 7मेको नेल्ल प्रोंइशा, वाइल खोदेंशो दुम्शा, मुर दुम्शा जरमेसाक्व। #यसैया ५३:३; मत्ती २०:२८; २ कोरिन्थी ८:९; हिब्रू २:१४,१७ 8मिनु मुर दुम्शा, साइक्चा पुंइसीचा सम्म परमप्रभु यावे कली टिशा, शीम क्याइश्शा साइक्चा पुंइसीशा, आ ब्रेम्शो थुं कोंइताक्व। #लूका १४:११; हिब्रू १२:२; हिब्रू ५:८ 9मोपतीके परमप्रभु यावेमी मेको कली नेल्ल क्येङा ठेयब सेल्शा, आ नें यो अरु आन क्येङा ठेयब सेल्तु। #प्रेरित २:३३; एफिसी १:२१; हिब्रू १:३-४ 10येसु आ नें नेंशा, स्वर्गम बाक्ब, रागीम नु रागी आगाम बाक्ब नेल्लेमी बाप्शा, पोक्च थेक्चा माल्नीम। #यसैया ४५:२३; यूहन्ना ५:२३; प्रकाश ५:१२-१३ 11मिनु नेल्लेमी “येसु ख्रीस्त प्रभु बाक्ब” दे परमप्रभु यावे, इन आफ कली ठेयब सेल्चा माल्नीम। #प्रकाश ५:१३
परमप्रभु यावे आ आलपुकी
12आं दाक्शो लोक्बपुकी, गेपुकीमी नेल्ल नाक्त आं देंशो टीतीनी। गो बाक्ङानु ला ममाइ, गो मबाक्ङानु यो मेको क्येङा शुश रिम्शो पने। गेपुकी हिंशा ख्रिंख्रि पा इन पाप रे ब्रोंइतीक गेय पने। #१ पत्रुस १:१७ 13मारदे हना परमप्रभु यावेमी इन थुंमी गेय पाइब। मार गेय पाइब देंशा हना, आ दाक्शो पचा, दे इन कली दाक्ब थुं गेशा, गेय पपाइक्ब। #फिलिप्पी १:६
14गेपुकीमी सुंइच मपथु, दाल्गीर मपथु, गेय पने। 15मोपा दोस गेचा मपुंइसीब, परमप्रभु यावे आ रिम्शो आल दुम्नीनी। मरिम्शो नु दूली पाइब मुर आन दातेमी स्वर्ग ङा छेङछेङ खोदेंशो दुम्नीनी। #फिलिप्पी १:१०; मत्ती ५:१४; एफिसी ५:८-९ 16मोपा ब्रोंइचा गेब लोव़ मप्रोंइब दुम्नीनी। मिनु ख्रीस्त आ जाक्ची ना गो मो मगाक्ङ, मो गेय यो मपङ, दे ग्येरशा बाक्चा तङल। #२ कोरिन्थी १:१४; १ थिस्सलोनिकी २:१९ 17गो इन थमा सुइक्चा आ पर्बम गेय पा, साइक्चा पुंइसाक्यी हना यो, ग्येरसीनुङ। गे नेल्ल नु ग्येरशा बाक्नुङ। #२ तिमोथी ४:६ 18मोपा गेपुकी यो ग्येरसीने। मिनु गो नेल्ल ग्येरसय। #फिलिप्पी ४:४
तिमोथी नु इपाफ्रोडीटस
19प्रभु येसुमी तिमोथी कली इन कली ग्रुम्थ सोइक्चा गेप्तु हना, ब्रा सोइक्नुङ। इन पर्बम लोव़ नेंशा, गो यो ग्येरसीनुङ। 20मारदे हना मेको खोदेंशो अरु मबाक्नीम। “गेपुकी दोपा बाक्नी माइ” दे थमा पा शुश मिम्शा, सुर्ता पाप्तु। #१ कोरिन्थी १६:१० 21नेल्लेमी आंम आंम दाक्शो ला मिम्शा, पना पन बाक्नीमी। येसु ख्रीस्त आ दाक्शा मिम्शो चहिं मपाइनीम। #२ तिमोथी ४:१०,१६ 22गेपुकीमी तिमोथी कली तुइक्नीनी। दोपा तौमी आ आफ नु गेय पाइबा, मोपा मेको गो नु परमप्रभु यावे आ ग्येरपाइक्ब लोव़ शेंथ गाक्त। 23मोपतीके आं कली मार मार दुम्बा, मेको तुइक्तु नोले गो मेको कली इन बाक्तीक ब्रा सोइक्नुङ, दे आस पाता। 24प्रभुमी आं कली एकेर रे प्रोंइब, दे थमा सुइक्नुङ। मिनु गो यो इच्का नाक्त नोले जाक्नुङ। #फिलिप्पी १:२५
25इन सोइश्शो आं कली वारच पाइब आं लोक्ब इपाफ्रोडीटस कली लेश्शा सोइक्नुङ। मेकोमी गो नु गेय पाप्तु। गो नु काथा गाक्शा, परमप्रभु यावे आ लोव़ शेंताक्व। #फिलिप्पी ४:१८ 26मेकोमी नेल्ल इन कली शुश मिम्ताक्व। मारदे हना गेपुकीमी “मेको रोइ पाप्तु” देंशो नेंतीनी ने। मोपतीके शुश सुर्ता पाप्तु। 27इपाफ्रोडीटस थमा पा बेक्चा ङा रोइ पाप्तु। तन्न परमप्रभु यावेमी मेको कली शिशी पाइक्तु। मेको कली ला ममाइ, आं कली यो शिशी पाइक्ती। मोपतीके गो शुश श्येत मजङ। 28मेको कली इन बाक्तीके सोइक्चा दाक्नुङ। गेपुकी मेको कली लेश्शा जाक्शो तशा, ग्येरनीनी। मो दुम्मेनु, आं हेल्शो थुं यो सोपी दुम्ब। 29गेपुकीमी प्रभु आ नेंमी मेको कली रिम्शो पने, ग्येरसीने। मोदेंशो मुर कली ठेयब सेलीन। #१ कोरिन्थी १६:१६ 30मेकोमी ख्रीस्त आ गेय पशा, आंम कली ममिम्थु, इन पा ङा आं कली वारच पथ जाक्मेनु, रोइ पा हेरा बेक्त।
Currently Selected:
फिलिप्पी 2: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
