गन्ती 28
28
नाक्त किंत किंत ङा चढ़ेतीके
1परमप्रभु यावेमी मोसा कली 2“गे इस्राएली आन कली मीम चोशा चढ़ेतीके आं जचा थोव़क, आं दाक्शो ब्रोव़शो रिना पाइश्शो चढ़ेतीके गे आं देंशो नाक्त चढ़ेचा माल्नीम, दे शेंचा माल्नेवे। #लेवी २१:६ 3मिनु गे मेको आन कली ‘गे परमप्रभु यावे कली मीम चोशा चढ़ेतीके मार चढ़ेचा माल्नीनी देंशा हना, मारेइ मदुम्शो थम रिम्शो बर्स का गाप्शो पाठा निक्शी नाक्त किंत किंत चढ़ेचा माल्नीनी। #प्रस्थान २९:३८-४२ 4मिनु का सुनी नु का नाक्दो चढ़ेचा माल्नीनी। 5मेको नु अन्न चढ़ेतीके कली एफाह का ङा १० भाग ङा भाग का रिम्शो फस नु हिन का ङा ४ भाग ङा भाग का ख्राक्शो तेल ब्वाइश्शा चढ़ेचा माल्नीनी। #२८:५ एफाह का २२ लिटर पुक्तीक बाक्ब। हिन का ४ लिटर बाक्ब। ४ भाग ङा भाग का लिटर का बाक्ब। 6एको परमप्रभु यावे कली गेना हना यो मीम चोशा चढ़ेतीके बाक्ब। मेको आ दाक्शो ब्रोव़शो रिना पाइश्शो सीनै डांडाम देंशो खोदेंशो पा चढ़ेतीके बाक्ब। 7मेको नु तूचा थोव़क चढ़ेतीके पाठा का कली हिन का ङा ४ भाग ङा भाग का दाखमद्य चढ़ेचा माल्नीनी। मेको परमप्रभु यावे आ बाक्तीकेम परमप्रभु यावे आ ङोंइती मोइक्चा माल्नीनी। 8मेको अर्को पाठा नां रिक्चावानु, चढ़ेचा माल्नीनी। मेको नु सुनी ङा खोदेंशो पा अन्न चढ़ेतीके नु तूचा थोव़क चढ़ेतीके चढ़ेचा माल्नीनी। एको परमप्रभु यावे कली मीम चोशा चढ़ेशो आ दाक्शो ब्रोव़शो रिना पाइश्शो चढ़ेतीके बाक्ब।
नाइक्तीक नाक्त ङा चढ़ेतीके
9मिनु नाइक्तीक नाक्तीम मारेइ मदुम्शो थम रिम्शो बर्स का गाप्शो पाठा निक्शी चढ़ेचा माल्नीनी। मेको नु अन्न चढ़ेतीके तेल ब्वाइश्शो रिम्शो फस एफाह का ङा १० भाग ङा भाग निक्शी चढ़ेचा माल्नीनी। मिनु मेको नु तूचा थोव़क चढ़ेतीके यो चढ़ेचा माल्नीनी। #२८:९ एफाह का २२ लिटर पुक्तीक बाक्ब। मत्ती १२:५ 10मेको नाइक्तीक नाक्ती ङा चोशा चढ़ेतीके बाक्ब। मेको नाक्त किंत किंत ङा चोशा चढ़ेतीके नु तूचा थोव़क चढ़ेतीके चढ़ेशा यो मेको चढ़ेचा माल्नीनी।
औंसी ङा चढ़ेतीके
11मिनु गे नेल्ल महिना ङा ङोंइती ङा नाक्त परमप्रभु यावे कली चोशा चढ़ेतीके चढ़ेचा माल्नीनी। मेको ब्यफ निक्शी, सांड का नु ७ ओटा मारेइ मदुम्शो थम रिम्शो बर्स का का गाप्शो पाठा चढ़ेचा माल्नीनी। #गन्ती १०:१०; इजीकीएल ४६:१,३,६; यसैया १:१३ 12मिनु मेको ब्यफ का का पा नु अन्न चढ़ेतीके तेलम निशो रिम्शो फस एफाह ङा १० भाग ङा भाग सां चढ़ेचा माल्नीनी। मेको सांड का नु अन्न चढ़ेतीके तेलम निशो रिम्शो फस एफाह का ङा १० भाग ङा भाग निक्शी चढ़ेचा माल्नीनी। #२८:१२ एफाह का २२ लिटर पुक्तीके बाक्ब। गन्ती १५:२-१२ 13मिनु मेको ७ ओटा पाठा नु का का पा एफाह ङा १० भाग ङा भाग का तेलम निशो रिम्शो फस चढ़ेचा माल्नीनी। एको परमप्रभु यावे कली आ दाक्शो ब्रोव़शो रिना पाइश्शो मीम चोशा चढ़ेतीके बाक्ब। 14मेको नु तूचा थोव़क चढ़ेतीके ब्यफ का का नु आधा हिन दाखमद्य बाक्चा माल्ब। सांड नु हिन का ङा भाग सां ङा भाग का दाखमद्य बाक्चा माल्ब। मिनु पाठा नेल्ल नु हिन का ङा ४ भाग ङा भाग का दाखमद्य चढ़ेचा माल्नीनी। मेको बर्स ङा महिना नेल्ल ङा औंसीम चोशा चढ़ेतीके बाक्नीम। 15मिनु पाप पशो आ पर्बम बोका का परमप्रभु यावे कली चढ़ेचा माल्नीम। मेको नाक्त किंत किंत ङा चोशा चढ़ेतीक नु तूचा थोव़क चढ़ेतीके चढ़ेशा यो मेको चढ़ेचा माल्नीनी।
पास्सा नाक्त ङा चढ़ेतीक
16मिनु ङोंइती ङा महिना ङा १४ नाक्ती परमप्रभु यावे कली पास्सा चाड ङा चढ़ेतीके चढ़ेचा माल्नीनी। #लेवी २३:५-१४ 17मिनु मेको महिना ङा १५ नाक्ती ठेयब चाड का मानेचा माल्नीम। मेको चाडम ७ नाक्त सम्म बोरब ओख्ती मसुप्शो शोब्ले जचा माल्नीनी। 18ङोंइती ङा नाक्तीम परमप्रभु यावे नु ग्रुम्तीके का दुम्चा माल्ब। मेको नाक्ती गे काइ गेय मपने। 19गे परमप्रभु यावे कली मीम चोशा चढ़ेतीके चढ़ेचा माल्नीनी। मार चढ़ेचा माल्नीनी देंशा हना, ब्यफ निक्शी, सांड का नु बर्स का का गाप्शो ७ ओटा पाठा चढ़ेचा माल्नीनी। मेको नेल्ल मारेइ मदुम्शो थम रिम्शो बाक्चा माल्नीम। 20मेको नु अन्न चढ़ेतीके तेल ब्वाइश्शो रिम्शो फस दुम्चा माल्ब। मेको ब्यफ का नु एफाह का ङा १० भाग ङा भाग सां चढ़ेचा माल्नीनी। मेको सांड का नु एफाह का ङा १० भाग ङा भाग निक्शी चढ़ेचा माल्नीनी। #२८:२० एफाह का २२ लिटर खोदेंशो बाक्ब। 21मिनु मेको ७ ओटा पाठा नु एफाह ङा १० भाग ङा भाग का का पा रिम्शो फस चढ़ेचा माल्नीनी। 22मिनु इन पाप आ पर्बम पाप क्याम्तीक गेय पचा कली बोका का चढ़ेचा माल्नीनी। 23मिनु सुनी ङा चोशा चढ़ेतीके, मेको गेना हना यो पचा माल्शो चोशा चढ़ेतीक बाक्ब, मेको चढ़ेचा माल्नीनी। 24गे मोदेंशो चढ़ेतीके ७ नाक्त सम्म नाक्त किंत किंत जचा थोव़क कली चढ़ेचा माल्नीनी। मेको परमप्रभु यावे कली आ दाक्शो ब्रोव़शो रिना पाइश्शो मीम चोशा चढ़ेतीक बाक्ब। मेको नाक्त किंत किंत ङा चोशा चढ़ेतीके नु तूचा थोव़क चढ़ेतीके चढ़ेशा यो मेको चढ़ेचा माल्नीनी। 25मिनु ७ नाक्तीम परमप्रभु यावे नु ग्रुम्तीके का दुम्चा माल्ब। मेको नाक्ती गे काइ गेय मपने।
ङोंइती मीशो अन्न ङा चाड
26ङोंइती मीशो अन्न नु फल फुल ङा चाड नाक्त गे परमप्रभु यावे कली नक अन्न रे अन्न चढ़ेतीक चढ़ेनीनी। मेको हप्ता ङा चाड बाक्ब। मेना परमप्रभु यावे नु ग्रुम्तीके का दुम्चा माल्ब। मेको नाक्ती गे काइ गेय मपने। #लेवी २३:१५-२१; ब्यवस्था १६:१० 27गे परमप्रभु यावे कली चोशा चढ़ेतीके चढ़ेचा माल्नीनी। मेको परमप्रभु यावे कली आ दाक्शो ब्रोव़शो रिना पाइश्शो चढ़ेतीके बाक्ब। गेपुकीमी ब्यफ निक्शी, सांड का नु बर्स का का गाप्शो ७ ओटा पाठा चढ़ेचा माल्नीनी। 28मेको नु अन्न चढ़ेतीके तेल ब्वाइश्शो रिम्शो फस दुम्चा माल्ब। मेको ब्यफ का नु एफाह का ङा १० भाग ङा भाग सां चढ़ेचा माल्नीनी। मेको सांड का नु एफाह का ङा १० भाग ङा भाग निक्शी चढ़ेचा माल्नीनी। #२८:२८ एफाह का २२ लिटर खोदेंशो बाक्ब। 29मिनु मेको ७ ओटा पाठा नु भाग का रिम्शो फस चढ़ेचा माल्नीनी। 30मिनु इन पाप आ पर्बम पाप क्याम्तीक गेय पचा कली बोका का चढ़ेचा माल्नीनी। 31मिनु नाक्त किंत किंत ङा चोशा चढ़ेतीक नु मेको अन्न चढ़ेतीक गेपुकीम मेको नु आ तूचा थोव़क चढ़ेतीक चढ़ेचा माल्नीनी। मेको ब्यफ, सांड, पाठा नेल्ल मारेइ मदुम्शो थम रिम्शो बाक्चा माल्नीम।
Currently Selected:
गन्ती 28: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
