मत्ती 21
21
येसु मान पचा पुंइसीशो
मर्कूस ११:१-१०; लूका १९:२९-३८; यूहन्ना १२:१२-१९
1मिनु यरूसलेम आ नेक्था जैतून डांडा ङा बेथफागे माइश्शो गाउं जाक्दीत्तेक्म। 2मिनु येसुमी आ शेंसीब निक्शी आस कली “मेरे गाउं लसे। मेकेर जाक्दीश्शा, गधा नु आ चाइक्ब पाइश्शा वोइश्शो थित्नीसी। मेको निक्शी प्रोंइशा चाक्कीसे। 3मुरपुकीमी ‘एको गधा मारदे लाइक्सी?’ देंतेक्म हना ‘प्रभु मेको कली माल्ताक्व’ देंसीनु, लाइक्चा गेनीम” दे सोइक्ताक्सी। #मत्ती २६:१८ 4मोदेंशो दुम्चा माल्ब। मारदे हना साइ नेसी परमप्रभु यावे आ लोव़ पाइबमी 5“सियोन ङा तमी कली ओदें तुइक्पतीन। कोव़ङीन, इन पिप ब्रेम्शो दुम्शा, गधा गधैनी आ चाइक्ब ङोइश्शा, इन बाक्तीके गे पिन पिन बाक्ब” दे ब्रेक्शो बाक्ब। #जकरिया ९:९ 6मेको निक्शी लशा, येसु आ देंशो खोदेंशो पाम्से बाक्त। 7मिनु गधा नु आ चाइक्ब चाक्शा, आन वासी गधा तारी ब्राम्तेक्म। मिनु येसु ङोंइसाक्व। 8मिनु येसु आ नोले खोइक्बपुकीमी आन फेक्तीक वा लांमी ब्राम्तेक्म। खजूर रवा आ राशी जिक्शा, लांमी ब्रशा दारशो सेल्तेक्म। #२ राजा ९:१३ 9मिनु आ ङोंइती नोले गाक्बपुकीमी “दाऊद आ तौ कली होसन्ना, परमप्रभु यावे आ नेंमी जाक्ब कली जाइ, गे ठेयब बाक्नीनी” दे रेयके पा ठेयब सेल्ना सेल्न गाक्तेक्म। #भजन संग्रह ११८:२५-२६ 10मिनु यरूसलेम सहर ओव़मेनु, मेकेर बाक्बपुकीमी “मेको सु बाक्म, माइ” दे लोव़ पमुम्तेक्म। 11मिनु येसु नु काथा गाक्बपुकीमी “गालील रागी ङा नासरथ रे जाक्शो परमप्रभु यावे आ लोव़ पाइब येसु एको बाक्ब” देंतेक्म।
ग्याप्ब लेयब आन कली खेरशो
मर्कूस ११:१५-१९; लूका १९:४५-४८; यूहन्ना २:१३-१६
12मिनु येसु परमप्रभु यावे आ खिं ओव़त। मेकेर ग्याप्ब लेयब क्येट फाइक्ब आन कली खेरतीमी। क्येट फाइक्ब आन टेबल नु ढुकुर लेयब आन नित्तीके खोल्शा गेम्तीमी। 13मिनु “ ‘आं खिं आं कली मान पतीके बाक्ब’ दे ब्रेक्शो बाक्ब। गेपुकीमी चहिं खुइ आन बाक्तीके पुक्खी सेल्तीनी” दे हुइक्ताक्मी। #यसैया ५६:७; येरमीया ७:११
आलपुकीम येसु कली मान पशो
14मिनु मिक्च मताइब नु खोरन्डेपुकी जाक्तेक्म। मिनु येसुमी मेको आन कली सापाइक्तीमी। 15मिनु ठेयब चढ़ेब नु सास्त्रीपुकीमी येसुमी छक लाक्चा ङा गेय पशो नु आलपुकीमी “दाऊद आ तौ कली होसन्ना” दे शुश रेयके पा येसु कली ठेयब सुइश्शा मान पशो तशा, #२१:१५ होसन्ना आ देंशो “परमप्रभु वारच पने” बाक्ब। 16येसु कली “मेकोपुकीमी मार देंबाक्मा मनेंनीनी?” दे गाइश्शा देंतेक्म। मिनु येसुमी “नेंता। ‘आइक्च आल नु बुकलु आलपुकीमी इन कली ठेयब सेल्पांइसाक्नी’ दे ब्रेक्शो लोव़ मपढेनी?” दे माइक्तीमी। #भजन संग्रह ८:२ 17मिनु मेको आन कली प्रोंइशा, सहर रे ग्रूशा, बेथानी जाक्दीश्शा बास बाक्त।
सिश्शो फोव़शी रवा
मर्कूस ११:१२-१४,२०-२४
18आ दीसा सुनी यरूसलेम लेम्मेनु, शोव़लु बेक्माक्त। 19मिनु लां नेक्थामी फोव़शी रवा का तशा, फोव़शी सिश्शो बाक्म कों, दे कोव़ङानु, सफा ला ताप्तु। सफा ला तशा “मुल ङा मेरे गेनायो मसिप्ब रवा दुमो” दे माइक्तु। मिनु रवा साव सोव़त। #लूका १३:६ 20मिनु शेंसीबपुकीमी रवा सोव़शो तशा “रवा दोपा साव सोव़मे” दे छक लाक्तेक्म। 21मिनु येसुमी “नोफा दाइश्शा नेनीने, दल्गीर मपथु थमा सुइक्तीनी हना, फोव़शी रवा कली पशो खोदेंशो पचा ला ममाइ, डांडा कली एकेर रे समुन्द्रमी याक्सो देंतीनी हना, मेको डांडा यो याक्सीशा लाइब। #मत्ती १७:२० 22थमा सुइश्शा प्रार्थना पा पुंइतीनी हना, इन पुंइशो ताइनीनी” दे माइक्तीमी।
येसु आ अधिकार ते रे जाक्बा?
मर्कूस ११:२७-३३; लूका २०:१-८
23मिनु परमप्रभु यावे आ खिं ओव़शा, मुर आन कली शेंना शेंन बाक्मेनु, ठेयब चढ़ेब नु जोक्ब तुइक्ब खालपापुकी जाक्शा “तेको अधिकारमी मोदेंशो पवी? एको अधिकार सुमी गेवे?” देंतेक्म। #यूहन्ना २:१८; प्रेरित ४:७ 24मिनु येसुमी “गो इन कली लोव़ का हिल्लो पाइनुङ। गेम आं लोव़ लेत्ताक्नी हना, तेको अधिकारमी एको गेय पङा, दे शेंनन्नी। 25यूहन्नामी मुर आन कली ब्वाक्कुम ख्रुम्शा ग्रुंइतीके अधिकार स्वर्ग रे तवा, दे मुरपुकी रे तवा?” दे हिल्लो पाम्तीमी। मिनु लोव़सी पमुशा “स्वर्ग रे तवा बाक्त देंतय हना, मो हना यूहन्ना आ लोव़ मारदे थमा मसुइक्नी देंब। 26मुरपुकी रे तवा बाक्त देंयानु, मुरपुकीमी इं लोव़ मनेंथु मटीनीम। मारदे हना मुरपुकीमी यूहन्ना परमप्रभु यावे आ लोव़ पाइब बाक्त, दे थमा सुइश्शो बाक्नीम” देंमुम्तेक्म। #मत्ती १४:५ 27मोपतीके “मतुइक्नीकी” देंतेक्म। मिनु येसुमी “मो हना तेको अधिकारमी एको गेय पङा, गो यो मशेंनन्नी।
येसु कली ग्येरपाइक्ब
28अर्को लोव़ का नेंशा मिम्तीने। मुर का के तौ निक्शी बाक्सा बाक्त। मिनु काबु आफोमी आ जेठा कली ‘आं तौ, मुलाक्ती अङगुर रूमी गेय पथ लावो’ देंमाक्त। 29मिनु जेठामी ‘गो मलाइनुङ’ देंमाक्त। नोले आ थुं लेश्शा लमाक्त। 30मिनु आफोमी कान्छा कली यो ‘आं तौ, मुलाक्ती अङगुर रूमी गेय पथ लावो’ देंमाक्त। मेकोमी ‘दुम्ब, गो लाइनुङ’ देंमाक्त। तन्न मलमाक्त। #मत्ती ७:२१ 31आस आफ आ दाक्शो सुमी पवा? जेठामी पवा, दे कान्छामी पवा?” दे माइक्मीनु “जेठामी पवा बाक्त” देंतेक्म। मिनु येसुमी मेको आन कली “नोफा दाइश्शा नेनीने, इन क्येङा ङोंइती तिरो पोक्ब नु तेल्लेम पाइबपुकी परमप्रभु यावे आ राज्य ओव़चा ताइनीम। #लूका १८:९-१४ 32मारदे हना यूहन्नामी ठीक लां कोंइशा यो गेपुकीमी थमा सुइश्शा, इन थुं परमप्रभु यावे गे मलेत्तीनी। मेकोपुकीमी चहिं यूहन्ना कली थमा सुइश्शा, आन थुं परमप्रभु यावे गे लेत्ताक्म” देंत। #लूका ७:२९
मरिम्शो बुम्था पाइब
मर्कूस १२:१-२; लूका २०:९-१९
33मिनु येसुमी “लो, अर्को कथा का नेनीने। मुर कामी अङगुर ख्रुम्शा, थारपु हिरशा, अङगुर ख्राक्तीक नु वोइक्तीक सेल्शा, बुम्था पाइब माल्शा, मेको आन कली गेशा वोइश्शा, अर्को रागी लमाक्त। #यसैया ५:१-२ 34अङगुर मीशा सेक्ची जाक्मेनु, आ गेय पाइब आन कली आ भाग पोक्थ सोइक्तीमी बाक्त। 35मिनु गेय पाइबपुकी जाक्दीम्मानु, बुम्था पाइबपुकीमी का कली तुप्मे बाक्त, का कली सदमे बाक्त, का कली फुल्लु आप्शा खेरमे बाक्त। 36मिनु ङोंइती सोइश्शो क्येङा शुश आन कली सोइक्तीमी बाक्त। मेको आन कली यो में मोदेंशोन पामे बाक्त। 37मिनु ‘आं तौ कली टीनीम कों’ दे मिम्शा, आ तौ कली सोइक्ता बाक्त। 38मिनु बुम्था पाइबपुकीमी आ तौ कली पिशो तशा ‘एको अङस ताइब बाक्ब। लो साइक्चा। मिनु रू, अङगुर नेल्ल इं केन दुम्ब’ देंशा गारमा बाक्त। #मत्ती २६:३-५; यूहन्ना १:११ 39मिनु फि ग्याइश्शा, रू रे ग्रुंइशा, सदमे बाक्त। 40मो पाइब आन कली रू होव़प लेश्शा जाक्शा, मार पाइबा?” देंमेनु 41“मोदेंशो मरिम्शो पाइब आन कली साइक्पाइक्ब। आ रू चहिं सुमी अङगुर मीमेनु, पोक्थ जाक्ब आन कली गेब, मेको आन कली गेब” देंतेक्म। 42मिनु येसुमी “ओदेंशो ब्रेक्शो लोव़ मपढेनी? ‘खिं सेल्बपुकीमी गारो प्रोङमेनु, एको फुल्लु मगार, दे ताइक्तमे बाक्त। मेको मगारथु ताइश्शो फुल्लु चहिं सुर ङा सुरे फुल्लु दुम्माक्त। परमप्रभु यावेमी मोदेंशो पशो बाक्त। मिनु मेको इं दातेमी छक लाक्चा ङा बाक्ब’ दे ब्रेक्शो बाक्ब। #भजन संग्रह ११८:२२-२३; प्रेरित ४:११; १ पत्रुस २:४-८ 43मोपतीके परमप्रभु यावे आ राज्य इन गुइ रे रोइक्चा पुंइसीनीनी। मिनु फल सिप्ब अर्को जात ङा मुर आन कली गेब, दे माइक्तीमी। 44सुमी एको फुल्लुम दाल पांइसीशा राम्सीबा, मेको फस दुम्ब। एको फुल्लुमी सु कली चिप्बा, मेको चिम्सीशा बेक्ब” देंत। 45मिनु ठेयब चढ़ेब नु फरिसीपुकीमी येसुमी देंशो कथापुकी नेंशा “एहे, इं कली कका देंशो बाक्माक्त” दे रुप्मे बाक्त। 46मिनु ग्याइक्पाइक्चा माल्मे बाक्त। तन्न येसु कली “परमप्रभु यावे आ लोव़ पाइब बाक्ब” देंब आन कली तशा, हिंमा बाक्त।
Currently Selected:
मत्ती 21: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
