लेवी 9
9
हारून नु आ तौ आन गेय
1मिनु ८ नाक्ती मोसामी हारून, आ तौ नु इस्राएल ङा खाल्पा आन कली ब्रेत्ताक्मी। #लेवी ८:३३ 2मिनु मेकोमी हारून कली “गे पाप आ पर्बम चढ़ेचा कली मारेइ मदुम्शो थम रिम्शो बाछा का नु चोशा चढ़ेचा कली मारेइ मदुम्शो थम रिम्शो सांड का चाक्शा परमप्रभु यावे आ ङोंइती चढ़ेवो। 3मिनु इस्राएली आन कली ‘गेपुकीमी पाप आ पर्बम चढ़ेचा कली बोका का नु चोशा चढ़ेचा कली बर्स का दुम्शा, मारेइ मदुम्शो थम रिम्शो बाछा का नु मारेइ मदुम्शो थम रिम्शो पाठा का चाक्कीन। 4मिनु परमप्रभु यावे आ ङोंइती दुशा बाक्चा आ पर्बम चढ़ेचा कली ब्यफ का, सांड का नु तेलम निशो अन्न चढ़ेतीक यो चाक्कीन। मारदे हना मुलाक्ती परमप्रभु यावेमी इन कली तपांइसीब’ माइक्मी” देंत।
हारूनम आंम आ पर्बम चढ़ेशो
5मिनु मोसामी अरेशो खोदेंशो पा मेकोपुकीमी मारेइ मारेइ ग्रुम्तीक ताम्बु आ ङोंइती चाक्तेक्म। मिनु मुर नेल्ले परमप्रभु यावे आ ङोंइती जाक्शा राप्तेक्म। 6मिनु मोसामी “गेपुकीमी परमप्रभु यावेमी अरेशो पचा माल्शो गेय एकोन बाक्ब। मिनु परमप्रभु यावे आ छेङछेङम इन कली तपांइसीब” देंत।
7मिनु मोसाम हारून कली “चढ़ेतीक आ नेक्था जाक्शा, इ पाप आ पर्बम चढ़ेतीक नु इ चोशा चढ़ेतीक चढ़ेवो। मिनु आंम इ पर्बम नु मुर आन पर्बम पाप क्याम्तीक गेय पावो। परमप्रभु यावेमी अरेशो खोदेंशो पा मुर आन चाक्शो चढ़ेतीक चढ़ेशा, मुर आन पर्बम पाप क्याम्तीक गेय पावो” देंत। #लेवी १६:६,११,१५; हिब्रू ५:३; हिब्रू ७:२७
8मिनु हारून चढ़ेतीक आ नेक्था जाक्शा, आ पाप आ पर्बम चढ़ेतीक बाछा क्योरतु। 9मिनु हारून आ तौपुकीमी मेको आ हुश चाक्तेक्म। मिनु मेकोमी आ ब्रेप्चो हुशेम ख्रुम्शा चढ़ेतीक आ ग्रोव़पुकीम ख्रेक्ताक्व। मिनु लीशो हुश कली चढ़ेतीक आ पुंम मोइक्तु। 10मिनु मेकोमी पाप आ पर्बम चढ़ेशो आ बोंसो, चिच नु आइदीम क्येप्शो बोंसो चढ़ेतीकेम चोप्तु। परमप्रभु यावेमी मोसा कली दोदेंशो पा अरेवा, मोदेंशो पा हारूनमी पाप्तु। #लेवी ४:८-१२; लेवी ८:१४-१७ 11तन्न श्ये नु कुशुल चहिं मुर आन बाक्तीके क्येङा ङोन चोप्तु।
12मिनु नोले हारूनमी चोशा चढ़ेतीक क्योरतु। मिनु मेको आ तौपुकीमी मेको आ हुश चाक्शा गेम्तेक्म। मिनु मेकोमी मेको चढ़ेतीक आ एर ओंथ ब्रुइक्ताक्व। #लेवी १:१०-१३ 13मिनु मेकोपुकीमी मेको चोशा चढ़ेतीके टुक्रा टुक्रा पा चेक्शा, पिया सुन्दा चाक्शा, मेको कली गेम्तेक्म। मिनु हारूनमी मेको चढ़ेतीकेमी चोप्तु। 14मिनु मेकोमी गा क्यी नु खोइल मुरशा, चोशा चढ़ेतीके नु चोप्तु।
हारूनम अरु आन पर्बम चढ़ेशो
15मिनु नोले हारूनमी मुर आन पर्बम चढ़ेतीक चाक्शा, मेको आन पाप आ पर्बम चढ़ेशो बोका क्योरतु। मिनु ङोंइती ङा खोदेंशो पा पाप आ पर्बम चढ़ेतीके चढ़ेप्तु।
16मेको नोले चोशा चढ़ेतीक चाक्शा, अरेशो खोदेंशो पा चढ़ेप्तु। 17मिनु अन्न चढ़ेतीक चाक्शा, मुठी का हुइश्शा, सुनी ङा चोशा चढ़ेतीक नु चढ़ेप्तु।
18मिनु हारूनमी मुर आन कली दुशा बाक्चा आ पर्बम चढ़ेतीके ब्यफ नु सांड क्योरतु। मिनु हारून आ तौपुकीम हुश चाक्शा, मेको कली गेम्तेक्म। मिनु मेकोमी चढ़ेतीक आ एर ओंथ ब्रुइक्ताक्व। 19मिनु ब्यफ नु सांड आस बोंसो, बोंसो पाइश्शो मीलु, गा क्यी गिल्शो बोंसो, चिच निम्फा नु आइदीम क्येप्शो बोंसो लाइक्तेक्म। 20मिनु ङोंइती कुथ्रु तार वोइक्तेक्म। नोले बोंसो चढ़ेतीकेम चोम्तेक्म। 21मिनु मोसाम अरेशो खोदेंशो पा हारूनमी कुथ्रु नु ग्युरा फिला चहिं परमप्रभु यावे आ ङोंइती क्युक्शा हिम्शा चढ़ेतीके चढ़ेप्तु। #लेवी ७:३०-३४
22मिनु हारूनमी आ गुइ मुर आन गे पोक्शा, आसीक गेम्तीमी। मोपा पाप आ पर्बम चढ़ेतीके, चोशा चढ़ेतीके नु दुशा बाक्चा आ पर्बम चढ़ेतीके चढ़ेशा, मेको उइ तोंइसाक्व।
23मिनु मोसा नु हारून ग्रुम्तीक ताम्बु आगा ओव़ताक्स। मिनु ग्रूशा मुर आन कली आसीक गेम्ताक्स। मिनु परमप्रभु यावे आ छेङछेङ मुर नेल्लेमी ताम्तेक्म। #प्रस्थान १६:१०; प्रस्थान ४०:३४ 24मिनु परमप्रभु यावे आ ङोंइती रे मी ग्रूशा, चढ़ेतीकेम बाक्शो चोशा चढ़ेतीक नु मेक बाक्शो बोंसो नेक्तु। मिनु मुरपुकीमी मेको तशा, ठेयब सेंदा पा ग्येरसीशा, खुम्की पा बाप्तेक्म। #न्यायाधीस ६:२१; १ राजा १८:३८; १ इतिहास २१:२६; २ इतिहास ७:१
Currently Selected:
लेवी 9: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
