लेवी 22
22
सुमी चढ़ेतीक रे जने ब्वने चाप्ब
1परमप्रभु यावेमी मोसा कली 2“गे हारून नु आ तौ आन कली मार शेंचा माल्नेवे देंशा हना, ‘इस्राएलीपुकीमी आं कली चढ़ेशो थोव़क आन पर्बम होस पा बाक्कीन। मिनु आं नें कली ग्रांग्रा दिशो मसेलीन। गो परमप्रभु यावे नङ’ दे शेंचा माल्नेवे” दे परमप्रभु यावेम मोसा कली देंत।
3मिनु मोसा कली “गो परमप्रभु यावे नङ। गे मेको आन कली ‘इन तौ, चच युइ आन पाला ङा तेकोइ मुर ग्रांग्रा दिशो दुम्शा, इस्राएलीपुकीमी परमप्रभु यावे कली चढ़ेशो थोव़क आन नेक्था जाक्तेक्म हना, मेको मुर आं ङोंइती रे तिल्चा पुंइसीब। गो परमप्रभु यावे नङ।
4मिनु हारून आ तौ, चच युइ आन दातेमी सुइ कुशुल ङा रोइ नु ग्रांग्रा यितीक पशो बाक्तेक्म हना, मेको ग्रांग्रा मदिशो सम्म आं कली चढ़ेशो मारेइ थोव़क जचा ब्वचा मदुम्ब। सुइमी बेक्शो मुर के कि बिउ यिशो मुर रे ग्रांग्रा दिशो दुम्शो मुर कली थीबा, #लेवी १३-१५ 5कि खपीम ग्रेशा गाक्ब जन्तु कली थिशो ग्रांग्रा दिशो दुम्शो मुर थीबा, कि मार मार आ पर्बम ग्रांग्रा दिशो बाक्त हना, 6मेको मुर नां मरिक्म सम्म ग्रांग्रा दिशो बाक्ब। मेकोमी मचिक्से सम्म ला आं कली चढ़ेशो जचा ब्वचा मदुम्ब। #लेवी ११ 7मोदेंशो मुर नां रिक्म नोले ला ग्रांग्रा मदिशो दुम्ब। मिनु नोले मेकोमी आं कली चढ़ेशो थोव़क जने ब्वने चाप्ब। मारदे हना मेको आं कली चढ़ेशो आ जचा ब्वचा थोव़क बाक्ब। 8मिनु बेक्शो, ब्वाकी ङा जन्तुपुकीम क्राइश्शा साइश्शो जन्तु, बस्तु भाव कली ब्वचा मदुम्ब। मोदेंशो पाप्तु हना, मेको मुर ग्रांग्रा दिशो सेल्सीब। गो परमप्रभु यावे नङ। #लेवी ७:२४
9चढ़ेबपुकीमी आं देंशो टिचा माल्नीम। मो मपाम्तेक्म हना, मेकोपुकीमी आं देंशो मटितेक्म हना, मेकोपुकी दोस तशा आं बाक्तीक ताम्बुमी बेक्नीम। मिनु गो मेको आन कली आंम आं मुर सेल्ब परमप्रभु यावे नङ।
10मिनु अर्को रागी ङा मुर नु चढ़ेब आ खिंम पौना बाक्शो कि गाल्च ताइब मुर आं कली चढ़ेशो थोव़क जचा ब्वचा मदुम्ब। 11तन्न चढ़ेबमी क्येट थाप्शा ग्याप्शो मुर नु मेको आ खिंम जरमेशो मुर चढ़ेब आ भाग रे जचा ब्वचा दुम्ब। 12मिनु चढ़ेब आ तमी अर्को खिं ङा मुर नु ग्युंबे पशो बाक्त हना, परमप्रभु कली चढ़ेशो जचा ब्वचा मदुम्ब। 13तन्न चढ़ेब आ तमी आ वोंइश बेक्शो कि प्रोंइचा पुंइसीशो बाक्त हना, आ तमी तौ मदुम्थु, आ आफ आ खिं लेत्त हना, आ आल ना ङा खोदेंशो पा आन आफ आ भाग ङा चढ़ेशो रे जने ब्वने चाप्ब। तन्न अर्को खिं ङा मुर मेको जचा ब्वचा मदुम्ब।
14मिनु मरुम मतुइक्थु परमप्रभु कली चढ़ेशो रे जाप्तु हना, मेकोमी चढ़ेब कली मेको आ जशो क्येङा ५ भाग तेम्शा, परमप्रभु कली चढ़ेशो खोदेंशो पा चढ़ेब कली लेत्चा माल्ब। #लेवी ५:१६ 15मोपा सुइमी इस्राएली आन परमप्रभु यावे कली चढ़ेशो थोव़क ग्रांग्रा सेल्चा मदुम्ब। 16मोदेंशो परमप्रभु कली चढ़ेशो जशो मुर दोस ताइनीम। मिनु मेकोमी गारशा आ पर्बम चढ़ेतीक चाक्चा माल्ब। मारदे हना मेकोमी परमप्रभु यावे कली चढ़ेशो जाप्तु ब्वाप्तु। गो परमप्रभु यावे नङ। मिनु गो मेको कली आंम आं मुर सेल्ता’ दे शेंदो” देंत।
17मिनु परमप्रभु यावेमी मोसा कली 18“गे हारून, आ तौपुकी नु इस्राएली नेल्ल आन कली ‘इस्राएली आन दातेमी मुर का कि इस्राएलम बाक्ब अर्को रागी ङा मुरुमी ग्येरशा परमप्रभु यावे कली चढ़ेतीके चोशा चढ़ेशो खोदेंशो परमप्रभु यावे कली चढ़ेचा दाक्ताक्व हना, 19मिनु परमप्रभु आ ङोंइती ब्रचा ङा पा मेकोमी मारेइ मदुम्शो थम रिम्शो ब्यफ, सांड कि बोका चढ़ेचा माल्ब। 20गार पाइश्शो बस्तु चढ़ेचा मदुम्ब। मारदे हना मेको मब्रचा ङा बाक्नीम। #ब्यवस्था १५:२१; ब्यवस्था १७:१; मलाकी १:८
21मिनु मुर कामी दुशा बाक्चा आ पर्बम चढ़ेतीके परमप्रभु यावे कली चढ़ेशा, आ पशो कसम खबानु, ग्येरशा परमप्रभु यावे कली चढ़ेतीके, खोदेंशो पा, मेको ब्रचा ङा दुम्पाइक्चा कली आ हुल रे मारेइ मदुम्शो थम रिम्शो बस्तु चढ़ेचा माल्ब। 22मिनु गेपुकीम परमप्रभु यावे कली मिक्च मताइब, गार दुम्शो, आन रां बिग्रेशो, ग्रांग्रा यितीके पाइब, कुशुल रोइ पाइब कि लुतो पाइब बस्तु भाव चढ़ेचा मदुम्ब। मोदेंशो मीम चोशा चढ़ेचा कली परमप्रभु यावे कली चढ़ेतीकेमी वोइक्चा मदुम्ब। 23मिनु गेपुकीमी लाइश्शा खोइल पाइश्शो ब्यफ कि भेडा चहिं ग्येरशा चढ़ेतीके चढ़ेतीनी हना दुम्ब। तन्न कसम जशोनु, इन चढ़ेतीके मब्राइब दुम्ब। 24तेको ब्यफ, क्यारश भेडा खसी पशो गार सेल्शो नु चेश्शो बाक्बा, मेको परमप्रभु यावे कली चढ़ेचा मदुम्ब। इन रागीम मो पचा मदुम्ब। 25गेपुकीमी मोदेंशो बस्तु भाव अर्को रागी ङा मुर रे ग्याप्शा ताक्शा इन परमप्रभु कली जचा थोव़क चढ़ेचा मदुम्ब। मेको आन रां बिग्रेशो नु गारम पतीके इन पर्बम मब्रतीक दुम्ब’ दे शेंदो” दे परमप्रभु यावेमी मोसा कली देंत।
26मिनु परमप्रभु यावेमी मोसा कली 27“बाछा, भेडा पाठा कि क्यारश पाठा जरमेशा, मेको ७ नाक्त सम्म आ ममा नु बाक्चा माल्ब। मिनु मेको कली ८ नाक्त रे चोशा चढ़ेशोनु, परमप्रभु यावेमी ब्राइब। #प्रस्थान २७:२१ 28तन्न गेपुकी बी नु आ चाइक्ब कि भेडा नु आ पाठा काबुमी क्योरचा मदुम्ब। #ब्यवस्था २२:६-७
29गेपुकीमी परमप्रभु यावे कली ‘गे रिम्शो पाइब बाक्नीनी’ दे चढ़ेशो चढ़ेनीनु, मेको इन पर्बम ब्रचा ङा पा चढ़ेने। #लेवी ७:१५ 30मेको चढ़ेशो नाक्ती मेको कली ब्वने। आ दीसा सुनी सम्म मारेइ महेंचा। गो परमप्रभु यावे नङ।
31मिनु गेपुकीमी आं शेंतीके तुइश्शा टिने। गो परमप्रभु यावे नङ। 32गे आं ग्रांग्रा रे ङोन बाक्शो नें ग्रांग्रा दिशो मसेलीन। मोपतीके गो इस्राएली आन दातेमी का ला ठेयब दुम्ती। गो परमप्रभु यावे नङ। मिनु गो इन कली आंम आं मुर सेल्ता। #लेवी २२:९,१६ 33मिनु इन परमप्रभु दुम्चा कली गो इन कली इजीप्त रागी रे ग्रुंइताक्ङ। गो परमप्रभु यावे नङ, दे शेंदो” देंत।
Currently Selected:
लेवी 22: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
