एफिसी 5
5
छेङछेङम ब्रोंइशो मुर
1गेपुकी परमप्रभु यावे आ दाक्शो तमी तौ दुम्तीके मेकोमी दोदेंशो पवा, मोदेंशो पने। #लूका ६:३६ 2मिनु येसु ख्रीस्तमी इं कली दाक्शो खोदेंशो पा दाक्मुने। मेकोमी दोपा दाक्ताक्व देंशा हना, आंम कली ममिम्थु, ब्रोव़शो रिना पाइश्शो धूप नु क्योरशा चढ़ेशो खोदेंशो पा, इं पाप क्याम्चा कली बेक्शा, परमप्रभु यावे कली जिम्मा गेंसाक्व। 3मोपतीके गेपुकी परमप्रभु यावे आ मुर दुम्शा, इन दातेमी तेल्लेम पचा, ग्रांग्रा दिचा ङा गेय पचा नु शिंम पचा आ पर्बम लोव़ सम्म यो मपने। मेको परमप्रभु यावे आ मुर आन कली रिम्शो दुम्ब। #कलस्सी ३:५ 4गेपुकी मुने दोक्चा ङा हेंथे लोव़ नु मूर्ख लोव़ पचा इन कली मगारब। मेको आ पा ङा परमप्रभु यावे कली “गे आंइ कली रिम्शो पाइतीनी” देंचा माल्नीनी। #एफिसी ४:२९ 5तेल्लेम पाइब, ग्रांग्रा दिचा ङा गेय पाइब नु शिंम पाइबपुकी ख्रीस्त नु परमप्रभु यावे आ राज्यमी ओव़चा मताइनीम, दे रिम्शो पा तुइक्चा माल्नीनी। मेको नेल्ल मूर्ति पूजा पचा खोदेंशो बाक्ब। #१ कोरिन्थी ६:९-१०; प्रकाश २१:८; प्रकाश २२:१५ 6सुइ मुरुमी इन कली फश लोव़ पा, हेंथे लां खोइक्पाइक्चा मगेने। मारदे हना परमप्रभु यावे आ कली मटीब आन कली तशा गाइक्ब। #कलस्सी ३:६
7मिनु गेपुकी मोदेंशो मुर नु वारच्बु मदुमीन। 8गेपुकी यो ङोंइती छिङछिङ ङा गेय पाइब बाक्तीनी। मुल चहिं प्रभु कली थमा सुइश्शा, छेङछेङ ङा गेय पाइब दुम्तीनी। मोपतीके गेपुकी छेङछेङ ङा तमी तौ खोदेंशो दुम्शा बाक्कीन। #एफिसी २:१; १ पत्रुस २:९; मत्ती ५:१४; यूहन्ना १२:३६; १ थिस्सलोनिकी ५:५ 9छेङछेङ ङा फल दोदेंशो बाक्ब देंशा हना, नेल्ल शिशी पतीकेमी, ठीक पतीकेमी नु थमा पतीकेमी बाक्ब। #गलाती ५:२२; फिलिप्पी १:११ 10मिनु गेपुकीमी प्रभु आ दाक्शो मार बाक्बा, मेको तुइक्चा माल्नीनी। #रोमी १२:२; फिलिप्पी १:१०
11छिङछिङ ङा गेयमी काइ फल मथिंसीब। मोदेंशो गेय पाइबपुकी नु मबाक्कीन। मेको गेय यो मपने। तन्न मेको गेय मरिम्शो बाक्ब, दे कोंइदीन। 12मिनु मेको आन ख्रुइश्शा पशो आ पर्बम लोव़ पचा यो मुने बाक्ब। #रोमी १:२४ 13तन्न मेको ख्रुइश्शा पशो गेय छेङछेङमी तांइसीब। 14मोपतीके “ए निन्द्रा पाइब, बोक्को। मिनु बेक्शो रे सेंसीशा बाक्को। मो पवीनु, ख्रीस्तमी इ कली आ छेङछेङ गेब” देंशो बाक्ब। #यूहन्ना ३:२०-२१; रोमी १३:११; यसैया ६०:१; यूहन्ना ८:१२ 15मोपतीके होस पा बाक्कीन। मतुइक्ब ममाइ, तुइक्ब मुर दुम्शा बाक्कीन। #मत्ती १०:१६; कलस्सी ४:५ 16मुरपुकीमी मरिम्शो गेय पना पन बाक्तेक्म हना यो, गेपुकीमी नेल्ल नाक्त रिम्शो गेय पने। 17मोपतीके गेपुकी मूर्ख मदुमीन, प्रभु आ दाक्शो मार बाक्मे मेको रुपीन। 18राकसी शांबुमी मदुक्कीन। मारदे हना दुक्ब मुरपुकी ग्येत्थ मलाइनीम। तन्न गेपुकी परमप्रभु यावे आ सोक्तीम ब्रीशो दुमीन। #लूका २१:२४ 19परमप्रभु यावे आ लोव़ ङा कुम्सो, परमप्रभु यावे कली ठेयब सेल्ब कुम्सो नु परमप्रभु यावे आ सोक्तीम इन कली शेंशो कुम्सो पने। मोपा इन थुं बार पमुशा, प्रभु कली कुम्सो पना पन बाक्कीन। #भजन संग्रह ३३:२-३; कलस्सी ३:१६ 20मिनु गेपुकीमी मार दुम्त हना यो, गेना हना यो इं आफ परमप्रभु यावे कली “गे रिम्शो पाइतीनी” दे प्रभु येसु ख्रीस्त आ नेंमी देंचा माल्नीनी। #१ थिस्सलोनिकी ५:१८थिस्सलोनिकी
थमा सुइक्ब आन कली लोव़
21गेपुकी ख्रीस्त कली मान पा हिंशा बिम्मुने। #१ पत्रुस ५:५ 22गे मीश मुरपुकी, प्रभु कली टिशो खोदेंशो पा आंम वोंइश कली यो टिने। #उत्पत्ती ३:१६; तीतस २:५ 23मारदे हना वोंइश मुर मीश मुर आन पिया बाक्नीम। मिनु ख्रीस्त थमा सुइक्ब आन पिया बाक्ब। थमा सुइक्बपुकी ख्रीस्त आ रां बाक्नीम। मिनु येसु ख्रीस्त थमा सुइक्ब आन कली पाप रे प्रोंइब बाक्ब। #१ कोरिन्थी ११:३; एफिसी १:२२-२३ 24दोपा थमा सुइक्बपुकीमी ख्रीस्त कली टीनीमी, मोपा मीश मुरपुकीमी आंम वोंइश आ देंशो नेल्ल टिचा माल्नीमी।
25गे वोंइश मुरपुकी, आंम मीश कली दाक्तीने। दोपा ख्रीस्तमी थमा सुइक्ब आन कली दाक्शा, मेको आन कली पाप रे प्रोंइचा, दे आंम रां जिम्मा गेवा, मोपा वोंइश मुरुमी आंम मीश कली दाक्चा माल्नीमी। 26मारदे ख्रीस्तमी मो पाप्तु देंशा हना, थमा सुइक्बपुकी परमप्रभु यावे आ ङोंइती शिरशो मुर दुम्मल, दे मो पाप्तु। ङोंइती ख्रीस्तमी मेको आन कली लोव़ रे पा चिक्शो खोदेंशो पाप्तु। #तीतस ३:५; हिब्रू १०:२२ 27मोदेंशो पा थमा सुइश्शा, छेङछेङ पाइश्शो मुरपुकी आंम कली वोइश्शो बाक्त। मेकोपुकी मारेइ मलुम्सीशो, मरोम्सीशो, थम दारशो नु परमप्रभु यावे आ मुर दुम्शा, दोस मताइब मुरपुकी बाक्नीमी। #२ कोरिन्थी ११:२; कलस्सी १:२२ 28मेको खोदेंशो पा वोंइश मुरपुकीमी आंम मीश कली “आंम रां बाक्ब” दे मेको कली दाक्चा माल्नीमी। सु आंम मीश कली दाक्बा, मेकोमी आंम कली यो दाक्ब। 29सुइमी आंम रां कली खेदा मपाइनीम, थुल्शा रिम्शो पाइनीम। ख्रीस्तमी यो थमा सुइक्ब आन कली मोदेंशो पाइब। #एफिसी १:२३ 30मिनु गोपुकी आ रां ङा गुइ खोइल बाक्नय। 31मो दुम्तीके वोंइश मुरुमी आ आम आफ आस कली प्रोंइब। मिनु आ मीश नु काथा बाक्ब। मेको निक्शी रां का दुम्नीसी। #उत्पत्ती २:२४ 32मेको आ ख्रुइश्शो अर्थ ठेयब बाक्ब। मिनु मार बाक्ब देंशा हना, गो ख्रीस्त नु थमा सुइक्ब आन पर्बम लोव़ पाइनुङ। 33मार दुम्त हना यो, गे नेल्लेमी आंम मीश कली आंम कली दाक्शो खोदेंशो पा दाक्तीन। मीश मुरपुकीमी चहिं आंम वोंइश कली मान पा हिक्चा माल्नीमी।
Currently Selected:
एफिसी 5: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
