कलस्सी 2
2
दूली शेंब क्येङा होस पने
1गो इन पर्बम, लाओडीसीया सहर ङा थमा सुइक्ब आन पर्बम नु का निक्शी अरु आं कली गेनायो मताइब मुर आन पर्बम गिश श्येत जङा, मेको नेल्ल इन कली तुइक्पाइक्चा दाक्नुङ। 2मेकोपुकी दाक्मुशा आन थुं बारपदमेक्ल। थमा पा रुप्तीके गिश ठेयब बाक्बा, परमप्रभु यावेमी ख्रीस्त आ पर्बम ख्रुइश्शो लोव़ मार बाक्बा, मेको नेल्ल रुप्मेक्ल। 3रुप्तीके तुइक्तीके नेल्ल ख्रीस्त आगाम ख्रुइश्शो बाक्नीम। #१ कोरिन्थी १:२४,३० 4मारदे इन कली मो देंती देंशा हना, जोल पा शेंब जाक्शा, शुश मिलो शिलो लोव़ पशा, दूली शेंने मचाप्मेक्ल, दे मो देंती। #रोमी १६:१८ 5गो इन नेक्था मबाक्ती हना यो, आं थुंमी गेपुकी नु बाक्नुङ। इन रिम्शो पशो नु ख्रीस्त कली बोल्यो पा थमा सुइश्शो तशा ग्येरसाक्यी। #१ कोरिन्थी १४:४०
नेल्ल ख्रीस्तम बाक्ब
6गेपुकी दोपा ङोंइती प्रभु ख्रीस्त येसु कली ओव़चा गेनी, मोपा मेको नु बाक्कीन। 7खप आगामी शाक्श थोक्शो रवा खोदेंशो पा, ख्रीस्त आगा ङा बोल्यो मुर दुम्शा बाक्कीन। दोपा शेंसीनी, मोपा बोल्यो पा थमा सुइश्शा, परमप्रभु यावे कली “गे रिम्शो पाइतीनी” दे शुश देंना देंन बाक्कीन। #एफिसी ३:१७
8मिनु गेपुकी दूली लोव़ शेंब आन नोले मखोतीन। मेकोपुकीमी इन कली मुर आन मिम्तीके नु फश लोव़ पशा, मुर आन रिती थिती ला शेंनीमी। मेको रागी रागी ङा मुर आन थुं ङा बाक्ब, ख्रीस्त के ममाइ। 9मारदे हना परमप्रभु यावे आ सक्ति नेल्ल ख्रीस्तम बाक्ब। #यूहन्ना १:१४-१६ 10गेपुकी मेको नु बाक्शा, आ ब्रोंइतीक सक्तिम ब्रीशो मुर दुम्तीनी। मेको नेल्ल हुकुम पाइब नु नेल्ल अधिकार पाइब आन पिया बाक्ब। #एफिसी १:२१ 11मेको आ पशोमी ख्रोइक्तीक चिनु पाइश्शो खोदेंशो दुम्तीनी। मेको ख्रोइक्तीक चिनु मुरुमी ख्रोइश्शो ममाइ, गेपुकी ख्रीस्त कली थमा सुइश्शा, इन मरिम्शो पशो ताइश्शो इन ख्रोइक्तीक चिनु दुम्त। #रोमी २:२९; रोमी ६:५; १ पत्रुस ३:२१ 12मिनु गेपुकी ब्वाक्कुम ख्रुम्शा ग्रुंइचा पुंइसीनीनु, मेको नु बेक्शा थिम्शो दुम्तीनी। परमप्रभु यावे आ पतीके कली थमा सुइक्तीके मेको नु बेक्शो रे सेंशो यो बाक्नीनी। #रोमी ६:४; कलस्सी ३:१ 13ङोंइती गेपुकी मरिम्शो पाइब दुम्शा, ख्रोइक्तीक चिनु इन रांमी मख्रोइक्थु, बेक्शो मुर खोदेंशो बाक्तीनी। परमप्रभु यावेमी इं मरिम्शो पतीके नेल्ल क्याम्शा, इं कली येसु ख्रीस्त नु ब्रोंइपाइक्तु। #एफिसी २:१,५ 14नेल्ल गेचा चिक्शो दोस नु सजाइ ब्रेक्शो कागज लाइश्शा, कांटी थोक्शा साइक्तीक शीम वोइक्तु। #एफिसी २:१५ 15मेकोमी हुकुम पाइब नु अधिकार पाइब आन कली आन या रोइश्शा फ्रुम्तीमी। मोदेंशो पा ग्राशा, नेल्ल आन कली कोंइताक्व। परमप्रभु यावे येसु ख्रीस्त आ पशो तशा शुश ग्येरसाक्व। #कलस्सी १:१३; एफिसी ४:८ 16मोदेंशो दुम्शा इन कली मार मार जचा तूचा दुम्बा, मार मार जचा तूचा मदुम्बा, मार मार चाड मानेचा, तेको औंसी ठेयब सेल्चा, तेक तेको नाइक्तीक नाक्ती ठेयब सेल्चा देंब मुर आन लोव़ मनेनीन। #रोमी १४:१-१२ 17मेको दुम्चा चिक्शो आ वांकु ला बाक्नीम। थमा सुइक्तीक रां चहिं ख्रीस्त के बाक्ब। #हिब्रू ८:५; हिब्रू १०:१ 18सुइमी इन कली “मतुइक्ब मुर ननी” देंचा मगेने। मेकोपुकीमी आंम मिम्शो पशो बाक्नीम, स्वर्ग ङा गेय पाइब आन कली सेउ पचा माल्नीनी, दे शेंनीमी। “गो ङोमु खोदेंशो पा ततीके तुइक्ताक्क” देंनीमी। मेको मुरपुकी मो ठेयब लेश्शा बाक्शा, आन मिम्शो ला शेंनीम। 19मेकोपुकी पिया नु मबाक्शो बाक्नीम। मेको पियामी रां कली थुल्ना थुल्न बाक्मेनु, नाडी नु रुशेम बोइक्पाइश्शा, परमप्रभु यावेमी मेको रां कली कोल्पाइक्ब। #एफिसी ४:१५-१६
20गेपुकी ख्रीस्त नु बेक्तीनी हना, रागी ङा थोव़क नेल्ल इन कली आइक्च बाक्ब। मिनु मारदे गेपुकी रागी ङा मुर खोदेंशो पा पाइनीनी? मारदे गेपुकी रिती थिती पचा टीनीनी? #गलाती ४:९-१० 21मेकोपुकीमी “मेको थिचा मदुम्ब, थाम्चा मदुम्ब, पचा मदुम्ब” देंनीम। 22मेको शेंबपुकीमी गेय पना पन जाम्ब थोव़क आन पर्बम लोव़ पाइनीम। मेको लोव़ मुर आन मिम्शो लोव़ ला ममाइ ङा? #मत्ती १५:९ 23मिनु मेको रिती थिती पचा, शुश धर्म पचा नु मुर आन माल्शो मपथु, थमा पा जोक्ब तुइक्ब नु ब्रेम्शो दुम्खु पाइनीम। तन्न मोदेंशो पतीकेमी मुर आ मरिम्शो पतीके तेक्ने मचाप्ब। #१ तिमोथी ४:३; रोमी १३:१४
Currently Selected:
कलस्सी 2: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
