२ कोरिन्थी 4
4
ख्रीस्त आ वाइल दुम्शा, शेंशा गाक्शो
1गोपुकी नु परमप्रभु यावे आ शिशी बाक्तीके मेको शेंब दुम्तक। मोपतीके गेनायो आइक्च थुं पाइश्शो मदुम्नीकी। #२ कोरिन्थी ३:६; १ कोरिन्थी ७:२५ 2गोपुकीमी मुने दोक्तीक ख्रुइश्शा पतीक गेय प्रोंइशो बाक्नीक। मरिम्शो पा परमप्रभु यावे आ लोव़ फाइक्चा रे ङोन बाक्नीकी। तन्न परमप्रभु यावे आ लोव़ तुइक्पाइक्तीकेमी मुर नेल्ल नु परमप्रभु यावे आ ङोंइती ब्रचा ङा बाक्नीकी। #२ कोरिन्थी २:१७; १ थिस्सलोनिकी २:५ 3आंइ शेंशो ग्येरपाइक्तीक लोव़ वाम गिल्सीशो बाक्त हना यो, जाम्शा लाइब मुर कली ला मोपा गिल्सीशो बाक्ब। #१ कोरिन्थी १:१८ 4मेको आन थुं दोपा मोदेंशो दुम्त देंशा हना, रागी कली हुकुम पाइब सैतानमी मेको आन कली मिक्च मताइब खोदेंशो पा मरुप्ब सेल्शो बाक्त। मोपा ख्रीस्त आ ग्येरपाइक्ब लोव़ आ छेङछेङ तने मचाप्नीम। ख्रीस्त परमप्रभु यावे आ कोंइतीके बाक्ब। #हिब्रू १:३ 5गो आंम पर्बम मशेंनीकी। तन्न येसु ख्रीस्त प्रभु बाक्ब, दे शेंनीकी। मिनु येसु आ पतीके गो इन गेय पाइब दुम्तक। 6परमप्रभु यावेमी “छिङछिङ जाम्शा, छेङछेङ दुम्ल” देंमाक्त। मेकोमी आंइ थुंमी छेङछेङ ब्रपाइश्शो बाक्त। गो परमप्रभु यावे आ छेङछेङ ख्रीस्त रे पा रुप्नीकी। #उत्पत्ती १:३; २ कोरिन्थी ३:१८
खप के गरम शोंप कुरशो
7मेको ठेयब सक्ति परमप्रभु यावे के बाक्ब, दे कोंइचा कली मेको छेङछेङ खप के गर गो आंइ रां आगाम बाक्ब। #१ कोरिन्थी ४:११-१३; २ कोरिन्थी ११:२३-२७ 8गो शुश श्येत जाइतक हना यो, खतम मदुम्क। मारेइ पने मचाप्ब दुम्तक हना यो, आइक्च थुं पाइश्शो मदुम्क। 9गो खेदा पचा पुंइसाक्क हना यो, आंइ कली कोव़ब बाक्ब। खोल्चा पुंइसाक्क हना यो, मनुप्क। 10येसु आ लोव़ शेंना शेंन गाक्कानु, येसु बेक्चा ङा श्येत जशो खोदेंशो पा, गो यो बेक्चा ङा श्येत जाइनीकी। तन्न येसु बेक्शो रे सेंचा पुंइसीशो खोदेंशो पा, सक्ति पाइश्शो दुम्नीकी। #१ कोरिन्थी १५:३१; गलाती ६:१७ 11ब्रोंइतक हना यो, येसु आ पर्बम बेक्चा ङा बाक्नीकी। मोपा आंइ बेक्चा ङा रांमी येसु आ ब्रोंइतीक सक्ति बाक्ब। #रोमी ८:३६; फिलिप्पी ३:२१ 12आंइ रांमी बेक्चा ङा श्येत जशा, इन कली ख्रीस्त आ लोव़ शेंताक्क। आंइ गेय रे पा गे ब्रोंइचा ताइतीनी।
13साइ ङा लोव़ ब्रेक्ब कामी “गो थमा सुइक्नुङ। मोपतीके आं थमा सुइश्शो नेंपाइक्नुङमी” दे ब्रेक्शो बाक्ब। मोदेंशो ब्रेक्ब थमा सुइक्तीक सोक्त का दुम्शा, गो यो थमा सुइक्नीकी। मिनु आंइ थमा सुइश्शो मुर आन कली नेंपाइक्नीकी। #भजन संग्रह ११६:१० 14मार लोव़ थमा सुइश्शा, नेंपाइक्नीकी देंशा हना “प्रभु येसु कली बेक्शो रे सेंबमी आंइ कली यो येसु नु सेंब” दे लोव़ बाक्ब। मिनु मेकोमी गे, गो नेल्ल इं कली आ ङोंइती बाक्चा गेब। #१ कोरिन्थी ६:१४ 15मारदे हना मेको नेल्ल इन पर्बम बाक्ब। परमप्रभु यावे आ शिशी शुश मुरुम नेंतेक्म हना, मेको क्येङा शुश मुरुम मेको कली ठेयब सेल्नीम। #२ कोरिन्थी १:६,११
16ठेयब थुं पा शेंना शेंन गाक्नीकी। आंइ रां बेक्चशो तांइसाक्व हना यो, आंइ थुं चहिं बारना बारन लशो बाक्ब। #एफिसी ३:१६ 17मारदे हना मुल जशो श्येत इच्का ला बाक्ब। नोले मेकोमी इं कली मरुप्चा ङा ठेयब छेङछेङमी बाक्चा गेब। #रोमी ८:१७-१८; १ पत्रुस १:६ 18मारदे हना गो मिक्चीमी तशो थोव़क ममाइ। तन्न मिक्चीम मतशो थोव़क ला कोव़नीकी। तशो थोव़क जाम्शा लाइनीम। मतशो थोव़क चहिं मजाम्थु, गेना हना यो लीनीम। #हिब्रू ११:१
Currently Selected:
२ कोरिन्थी 4: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
