१ कोरिन्थी 16
16
क्येट पोक्चा आ पर्बम लोव़
1क्येट पोक्चा आ पर्बम गलातीया रागी ङा थमा सुइक्ब आन कली शेंशो इन कली यो शेंनन्नी। #२ कोरिन्थी ८:९; गलाती २:१० 2हप्ता ङा ङोंइती नाक्ती गे नेल्लेमी आंम के बाक्शो रे हेंशा, गो ओशो गेने चाप्नुङ, दे वोतीने। मो पाइतीनी हना, गो जाक्ङानु, क्येट मबा दे खिं खिं हिरशा पुंइशा गाक्चा ममाल्नीनी। #प्रेरित २०:७ 3मिनु आं जाक्ची ना मेको क्येट चोव़दीचा कली सु सु कली सोइक्चा दाक्नीनी, मेको आन कली योव़शा वोतीने। मिनु गो चिठी ब्रेक्शा, मेको क्येट नु चिठी इन योव़शो मुर कली यरूसलेम चोव़थ सोइक्नुङ। 4गो यो लचा माल्ताक्यी हना, मेको गो नु लाइनीमी।
पावल आ बाक्चा नु गाक्चा आ पर्बम
5गो मासीडोनीया रागी लाक्शा, इन कली ग्रुम्थ जाक्नुङ। #प्रेरित १९:२१ 6मिनु महिना का निक्शी हिउंद मलाक्गा सम्म गे नु बाक्नुङा कों? मिनु ते ते लाइनुङा, आं कली वारच पाइनीनी कों, दे मिम्शा बाक्ती। 7मुल ग्रुम्थ जाक्ती हना, काबु निक्बु ला बाक्चा ताइनुङ। तन्न प्रभुमी गेपुकी नु शुश बाक्चा गेयील दे आस पा बाक्ती। #प्रेरित २०:२ 8पेन्तीकोस नाक्त सम्म गो एफिसस सहरमी बाक्नुङ। #प्रेरित १९:१,१० 9मारदे हना शुश मुर आन कली ख्रीस्त आ पर्बम शेंचा नु नेंपाइक्चा ताइनुङमी। आं शेंशो लोव़ मदाक्बपुकी यो शुश बाक्नीम। #२ कोरिन्थी २:१२; कलस्सी ४:३
10तिमोथीमी एको चिठी कुरशा जाक्मेनु, मेको कली रिम्शो पतीने। आ लोव़ नेनीने। मारदे हना गो नु बाक्शा, आं यो प्रभु आ गेय पना पन बाक्ब। #१ कोरिन्थी ४:१७; फिलिप्पी २:१९-२२ 11सुइमी महिक्शो मुर खोदेंशो मपने। मान पा रिम्शो पा लेश्शा आं बाक्तीक सोइक्तीने। मारदे हना गो मेको नु लोक्ब आन कली रिम्शा बाक्नुङ।
12ङोंइती इं लोक्ब आपोल्लोस कली लोक्बपुकी नु गारशा “कोरिन्थी आन कली ग्रुम्थ लावो” दे शुश लोव़ पाता। आ चहिं “मुल लचा थुं मपङ” दे लने मबिस्से। आ गेय गारत हना, इन कली ग्रुम्थ पीब।
नोले ङा लोव़
13होस पा बाक्कीने। पोक्च थेक्शा थमा सुइश्शा बाक्कीन। ठेयब थुं पा बाक्कीने। सक्ति पाइश्शो गेय पना पन बाक्कीन। #एफिसी ६:१० 14मार पाइतीनी हना यो, दाक्मुशा पने। 15आं लोक्बपुकी, आकाया रागीम नेल्ल क्येङा ङोंइती थमा सुइक्बपुकी स्तीफानस नु आ खिं ङा मुर बाक्तेक्म दे तुइक्नीनी। मेकोपुकीमी थमा सुइक्ब आन कली वारच पा रिम्शो गेय पा शेंना शेंन गाक्नीम। #१ कोरिन्थी १:१६ 16मेको आन पशो खोदेंशो पा शेंना शेंन गाक्ब नेल्ल आन कली मान पा आन लोव़ नेंशा टिने। 17स्तीफानस, फोरटुनातस नु अकाइकस एक जाक्मानु, गो ग्येरसाक्यी। मेको आन कली ग्रुम्शा, इन कली ग्रुम्शो खोदेंशो पा, आं थुं नाइक्ताक्ङ। 18मारदे हना मेकोपुकीमी ग्येरपाइक्तीमी, आं थुं बारपाइक्तीमी। गे नु बाक्मानु, इन कली यो ग्येरपाइश्शा, इन थुं बारपदमे बाक्त दे तुइक्ताक्ङ। मोदेंशो मुर आन कली मान पतीने। #१ थिस्सलोनिकी ५:१२; फिलिप्पी २:२९
19एसीयाम बाक्ब थमा सुइक्बपुकीमी इन कली “रिम्शो बाक्कीन” देंतेक्म। अक्वीला, प्रिस्कीला नु आस खिंमी ग्रुम्ब थमा सुइक्बपुकीमी प्रभु आ नेंमी “रिम्शो बाक्कीन” देंतेक्म। #प्रेरित १८:२; रोमी १६:३,६ 20लोक्ब नेल्लेमी इन कली “रिम्शो बाक्कीन” देंतेक्म। प्रभु आ नेंमी मुम्मुशा आसीक गेमुने।
21गो पावलमी “रिम्शो बाक्कीन” दे आंम गुइमी ब्रेक्ताक्ङ। #गलाती ६:११; कलस्सी ४:१८; २ थिस्सलोनिकी ३:१७ 22प्रभु कली मदाक्बपुकी सराप रमल। इं प्रभु जाक्कीन। #प्रकाश २२:२० 23प्रभु येसुमी इन कली शिशी पा कोव़ङल। 24ख्रीस्त येसु आ नेंमी गो नेल्ल इन कली दाक्शा बाक्नुङ। आमेन।
Currently Selected:
१ कोरिन्थी 16: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
