Taga-Roma 16
16
Kablaaw iti Nadumaduma a Tattao
1Irekomendarko kadakayo ni kabsattayo a Febe nga agserserbi iti iglesia idiay Cencrea. 2Awatenyo iti nagan ti Apo kas rumbeng nga aramiden dagiti tattao ti Dios. Tulonganyo iti aniaman a kasapulanna, ta adu a tattao ti tinultulonganna, ket maysaak kadakuada.
3Pakomustaak#Ara. 18:2. da Priscila ken Akila a kakaduak a nagserserbi ken ni Cristo Jesus. 4Nagpeggad ti biagda gapu kaniak. Saan la a siak ti agyaman kadakuada no di pay ket ti amin nga iglesia dagiti Hentil. 5Pakomustaak met ti iglesia nga aggigimong iti balayda.
Pakomustaak ni Epeneto a patgek a gayyem. Isu ti immuna a namati ken ni Cristo iti probinsia ti Asia. 6Pakomustaak ni Maria a nagrigrigat a nagtrabaho para kadakayo. 7Pakomustaak da Adronico ken Junia a kadaraak ken kakaduak a naibalud. Am-ammo unay ida dagiti apostoles. Immun-unada ngem siak a nagbalin a Kristiano.
8Pakomustaak met ni Ampliato a patgek a gayyem iti pannakikadkadua iti Apo. 9Kasta met ni Urbano a katrabahoanmi iti panagserbi ken Cristo ken ni Estakis a patgek a gayyem. 10Pakomustaak ni Apeles a napaneknekanen ti kinapudnona ken ni Cristo. Kasta met ti familia ni Aristobulo. 11Pakomustaak ni Herodion a padak a Judio ken dagiti kakabsat a Kristiano iti familia ni Narciso.
12Pakomustaak da Trifena ken Trifosa nga agserserbi iti Apo, kasta met ti patgek a gayyem, ni Persida nga adu ti nagapuananna a maipaay iti Apo. 13Pakomustaak#Mar. 15:21. ni Rufo a nalatak nga agserserbi iti Apo, agraman ni inana a nangibilang kaniak a kas maysa nga anakna. 14Pakomustaak da Asincrito, Flegonte, Hermes, Patrobas, Hermas ken dagiti amin a kakabsat a kakaduada. 15Pakomustaak pay da Filologo ken Julia, ni Nereo ken ti kabsatna a babai, ni Olimpas, ken amin a tattao ti Dios a kakaduada.
16Agkikinnablaawkayo iti nainkabsatan nga agek. Pakomustaandakayo dagiti amin nga iglesia ni Cristo.
Maudi a Pammagbaga
17Kakabsatko, dawatek nga agannadkayo kadagiti tattao a mamagsisina ken mangyaw-awan kadakayo iti pammati ken dagiti agsao iti maibusor iti pannursuro nga inawatyo. Adaywanyo ida. 18Dagiti agaramid kadagitoy, saanda nga agserserbi ken ni Cristo nga Apotayo, no di ket iti bukodda a paggarteman. Allilawenda dagiti nasingpet a tattao babaen kadagiti napipintas a balikas ken makaay-ayo a panagsao. 19Agdindinamag ti kinapudnoyo iti ebanghelio, ket daytoy ti gapuna a maragsakanak kadakayo. Kayatko a masiribkayo a mangammo no ania ti naimbag, ngem awan koma ti ammoyo maipapan iti dakes. 20Iti mabiit, ti Dios a pagtaudan ti talna, parmekennanto ni Satanas.
Adda koma kadakayo ti parabur ni Apotayo a Jesus.
21Pakomustaannakayo#Ara. 16:1. ni Timoteo a katrabahoak. Agpakomusta met da Lucio, Jason ken Sosipatro a padak a Judio.
22Siak, ni Tercio a nangisurat iti daytoy, idanonko met kadakayo ti nakristianoan a pakomusta.
23Pakomustaannakayo#Ara. 19:29; 1 Cor. 1:14; 2 Tim. 4:20. ni Gayo a mangsangsangaili kaniak ken akimbalay iti paggigimongan dagiti mamati. Pakomustaannakayo met ni Erasto a tesorero ti siudad, ken ni kabsattayo a Cuarto.#23 Inayon dagiti dadduma a manuskrito ti bersikulo 24: Adda koma kadakayo amin ti parabur ni Apotayo a Jesu-Cristo. Amen.
Pangserra a Kararag ti Panagdaydayaw
25Madaydayaw ti Dios! Mabalinnakayo a pagtalinaeden a natibker iti pammatiyo, kas mayannurot iti Naimbag a Damag nga ikaskasabak maipapan ken Jesu-Cristo, ken kas mayannurot iti naiparangarang a palimed ti kinapudno a nailemmeng manipud idi punganay. 26Ngem ita, nailatak dayta a kinapudno. Babaen kadagiti sinuratan dagiti profeta ken kas mayannurot iti bilin ti agnanayon a Dios, naipakaammo daytoy kadagiti amin a nasion tapno mamati ken agtulnog amin a tattao.
27Madaydayaw koma iti agnanayon babaen ken Jesu-Cristo ti maymaysa a Dios, isu a kakaisuna a masirib iti amin! Amen.#27 Adda dagiti manuskrito a mangiraman ditoy dagiti bersikulo 25-27 ken kalpasan ti 14:23; adda met dagiti dadduma a mangiraman laeng kalpasan ti 14:23; adda maysa a manuskrito a mangiraman kalpasan ti 15:33.
Currently Selected:
Taga-Roma 16: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society