Paltiing 21
21
Ti Baro a Langit ken ti Baro a Daga
1Kalpasanna,#Is. 65:17; 66:22; 2 Ped. 3:13. nakitak ti baro a langit ken ti baro a daga. Awanen ti immuna a langit ken ti immuna a daga. Awan metten ti taaw. 2Ket#Is. 52:1; Pal. 3:12; Is. 61:10. nakitak ti Nasantoan a Siudad, ti baro a Jerusalem, a bumabbaba manipud langit nga aggapu iti Dios, a kas iti babai a nakawesan nga agkasar ken mangpadpadaan iti lalaki a mangikallaysa kenkuana. 3Nakangngegak#Eze. 37:27; Lev. 26:11, 12. iti napigsa a timek a naggapu iti trono. Kunana: “Agnaeden ti Dios iti sidong dagiti tattao! Makipagtaengto kadakuada ket isudanto ti ilina. Kaduadanto ti Dios, ket isunto ti Diosda.#3 Awan ti isunto ti Diosda iti dadduma a manuskrito. 4Punasennanto#Is. 25:8; Is. 35:10; 65:19. dagiti luada. Awanton ti patay, ladingit, sangsangit wenno ut-ot agsipud ta limmabasen dagiti immun-una a banag.”
5Kinuna ti nakatugaw iti trono, “Pabaroekon ti amin a banag!” Kinunana pay kaniak, “Isuratmo daytoy: Mapangnamnamaan ken pudno dagitoy a sao.” 6Kinunana#Is. 55:1. pay, “Natungpalen! Siak ti Alfa ken ti Omega, ti pangrugian ken ti panungpalan. Siasinoman a mawaw, ikkakto iti kalintegan nga uminum iti ubbog ti danum ti biag. 7Daytoy#2 Sam. 7:14; Sal. 89:26-27. ti gunggona ti agballigi: Siakto ti Diosna ket isunto ti anakko. 8Ngem nakabutbutengto ti pagbanagan dagiti takrot, dagiti traidor, dagiti naderrep, dagiti mammapatay, dagiti mannakikamalala, dagiti managanito, dagiti agrukbab kadagiti didiosen ken amin nga ulbod—agyandanto iti dan-aw ti gumilgil-ayab nga apuy ken asufre nga isu ti maikadua nga ipapatay.”
Ti Baro a Jerusalem
9Inasitgannak ti maysa kadagiti pito nga angheles nga addaan iti pito a malukong a napno kadagiti pito a maudi a didigra. “Umayka,” kinunana, “ket ipakitak kenka ti babai nga ikasar ti Kordero.”
10Addaak#Eze. 40:2. iti pannakabalin ti Espiritu ket impannak ti anghel iti rabaw ti nakangatngato a bantay. Impakitana kaniak ti Jerusalem, ti Nasantoan a Siudad a bumabbaba manipud langit nga aggapu iti Dios. 11Agranraniag daytoy gapu iti dayag ti Dios. Agrimatrimat a kas iti alahas a haspe ken aganninaw a kas iti kristal. 12Napuskol#Eze. 48:30-35. ken nangato ti bakud ket adda sangapulo ket dua a ruanganna a nagsaggaysaan a bambantayan ti sangapulo ket dua nga angheles. Iti tunggal ruangan, adda nagan a naisurat. Dagitoy dagiti nagan dagiti sangapulo ket dua a tribu ti Israel. 13Tallo ti ruangan ti tunggal benneg ti bakud: tallo iti daya, tallo iti abagatan, tallo iti amianan ken tallo iti laud. 14Nabangon ti bakud ti siudad iti sangapulo ket dua a bato a nakaisuratan ti nagan dagiti sangapulo ket dua nga apostoles ti Kordero.
15Adda#Eze. 40:3. balitok a pagrukod ti anghel a nagsao kaniak. Rukodenna ti siudad, dagiti ruangan ken bakudna. 16Kuadrado ti siudad: 2,400 a kilometro ti kaatiddog; kasta met ti kaakaba ken kangatona. 17Rinukod ti anghel ti bakud ket 216 a kadapan ti kangatona kas mayannurot iti rukod nga ar-aramaten dagiti tattao. 18Haspe#Is. 54:11-12. ti bakud, puro a balitok ti siudad, ket aganninaw a kas kristal. 19Namontaran dagiti fondasion a bato ti bakud kadagiti agkakapateg a bato. Haspe ti umuna; safiro ti maikadua; kalsedonia ti maikatlo; esmeralda ti maikapat; 20sardonika ti maikalima; karnelia ti maikanem; krisolito ti maikapito; berilo ti maikawalo; topasio ti maikasiam; krisoprasio ti maikasangapulo; hasinto ti maikasangapulo ket maysa ken amatista ti maikasangapulo ket dua. 21Perlas dagiti sangapulo ket dua a ruangan; naaramid ti tunggal maysa iti sangkanayon a perlas. Paspasig a balitok dagiti kalsada ti siudad; aganninaw a kas kristal.
22Nadlawko nga awan templo iti siudad agsipud ta ni Apo Dios a Mannakabalin-amin ken ti Kordero ti pannakatemplona. 23Saanen#Is. 60:19-20. a masapul ti init ken ti bulan a manglawag iti siudad agsipud ta ti dayag ti Dios ti mangranraniag ket ti Kordero ti pagsilawan. 24Iti#Is. 60:3. lawagna, magnanto dagiti amin a tattao ket ipanto sadiay dagiti ari ditoy daga ti kinadayagda. 25Agmalmalem#Is. 60:11. a silulukat dagiti ruangan ti siudad agsipud ta awanen ti rabii sadiay. 26Maipanto iti siudad ti dayag ken dayaw dagiti nasion. 27Ngem#Is. 52:1; Eze. 44:9. saanto a makastrek sadiay ti uray ania a saan a nadalus iti imatang ti Dios, ti siasinoman nga agar-aramid iti nakababain ken dagiti naulbod. Dagitinto laeng naisurat ti naganna iti libro ti biag nga adda iti ikut ti Kordero ti makastrek iti siudad.
Currently Selected:
Paltiing 21: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society