Dagiti Salmo 96
96
Ti Dios a Kangatoan nga Ari
(1 Cron. 16:23-33)
1Kantaanyo ti Apo iti baro a kanta!
Kantaanyo ti Apo, dakayo amin a tattao iti daga.
2Wen, kantaanyo ti Apo ket idaydayawyo!
Inaldaw nga ipakaammoyo
ti damag ti panangisalakanna kadatayo.
3Ipakaammoyo ti dayagna kadagiti pagilian,
dagiti nabileg nga aramidna kadagiti amin a tattao.
4Naindaklan ti Apo
ket maikari a naindaklan ti panangidaydayawtayo.
Ad-adda a pagbutngan
ngem dagiti amin a dios.
5Imahen laeng dagiti didiosen dagiti pagilian;
ngem pinarsua ti Apo dagiti langit.
6Adda dayaw ken kinatan-ok iti sangoananna;
adda bileg ken pintas iti santuariona.
7Idaydayawyo#Sal. 29:1-2. ti Apo,
dakayo amin a tattao ditoy daga;
itan-okyo ti dayag ken pannakabalinna.
8Dayawenyo ti nadayag a nagan ti Apo;
mangitugotkayo iti sagut,
ket sumrekkayo iti Templona.
9Agrukbabkay iti Nasantoan inton agparang.#9 inton agparang; wenno iti kawes a pagdaydayaw.
Agpigergerkayo iti sangoananna,
dakayo amin a tattao.
10Ibagayo kadagiti nasion,
“Agari ti Apo!
Naipasdek a nalaing ti daga
ket awan ti pannakagunggonna.
Nalintegto ti panangukomna kadagiti tattaona.”
11Agragsakkayo, langit ken daga!
Agdaranudorka, taaw ken amin nga adda kenka.
12Agrag-okayo,
tay-ak ken amin nga adda kadakayo!
Amin a kayo iti kabakiran,
agriawkayo iti rag-o.
13Inton umay ukomen ti Apo ti daga,
nalinteg ken awan idumdumana iti panangukomna
iti amin a tattao ditoy lubong.
Currently Selected:
Dagiti Salmo 96: RIPV
Highlight
Copy
Compare
Share
Want to have your highlights saved across all your devices? Sign up or sign in
© 1996 Philippine Bible Society
