San Lucas 23
23
Mayawat ni Jesus ken ni Pilato
(Mat. 27:1-2, 11-14; Mar. 15:1-5; Jn. 18:28-38)
1Timmakder dagiti amin a kamkameng ti Sanhedrin ket impanda ni Jesus ken ni Pilato. 2Rinugianda ti nagiparang kadagiti pammabasolda kenkuana.
“Natiliwanmi daytoy a tao a mangal-allilaw kadagiti kailianmi,” kinunada. “Iparparitna ti panagbayad iti buis iti Emperador. Kunkunana pay nga isu ti Cristo a maysa nga ari.”
3“Sika kadi ti Ari dagiti Judio?” sinaludsod ni Pilato.
“Nasaomon,” insungbat ni Jesus.
4Ket kinuna ni Pilato kadagiti panguloen a papadi ken kadagiti tattao, “Awan masarakak a pakaigapuan iti pannakadusa daytoy a tao.”
5Ngem inyad-addada ti nagkuna: “Babaen iti pannursurona, sugsoganna dagiti tattao a mangriribuk iti entero a Judea. Inrugina idiay Galilea, ket adda ditoyen.”
Ni Jesus iti Saklang ni Herodes
6“Taga-Galilea kadi daytoy a tao?” sinaludsod ni Pilato idi mangngegna daytoy.
7Ket naammoanna a naggapu ni Jesus iti lugar nga iturayan ni Herodes. Imbaonna ngarud ken ni Herodes nga adda idi idiay Jerusalem.
8Nabayagen a kayat ni Herodes a makitana ni Jesus. Maragsakan unay idi maidatag kenkuana ta nadamdamagnan ti maipapan kenkuana ket ninamnamana ti makakita iti milagro nga iparang ni Jesus. 9Adu ti sinaludsod ni Herodes, ngem pulos a saan a simmungbat ni Jesus.
10Adda a nakatakder sadiay dagiti panguloen a papadi ken mamaestro iti Linteg ket indatagda dagiti agkakadagsen a pammabasolda ken ni Jesus. 11Pinagang-angawan ken linalais ni Herodes ken dagiti soldado. Kinawesanda ni Jesus iti narangrang a lupot sada pinaisubli ken ni Pilato.
12Manipud iti dayta nga aldaw, aggayyemen da Herodes ken ni Pilato, numan pay aggin-ginnurada idi.
Maikeddeng a Matay ni Jesus
(Mat. 27:15-26; Mar. 15:6-15; Jn. 18:39–19:16)
13Pinaayaban ni Pilato dagiti panguloen a papadi, dagiti agtuturay ken dagiti tattao.
14Kinunana kadakuada, “Insaklangyo kaniak daytoy a tao ket imbagayo nga al-allilawenna dagiti tattao. Inusigko iti imatangyo ket awan nasarakak nga inaramidna kadagiti ipabpabasolyo kenkuana. 15Uray ni Herodes, awan nasarakanna, isut' gapuna a pinaisublina kadatayo. Awan naaramid daytoy a tao a pakaigapuan ti pannakapapatayna. 16Ngarud, pasaplitko laeng sakonto palubosan.”#16 Iraman dagiti dadduma a manuskrito ti bersikulo 17: Tunggal Fiesta ti Paskua, kadawyan ni Pilato ti mangwayawaya iti maysa a balud.
18Ngem sangsangkamaysa dagiti tattao a nangipukkaw, “Papapataymo! Ni Barrabas ti kayatmi a wayawayaam!” ( 19Naibalud ni Barrabas gapu iti riribuk a naaramid iti siudad, ken gapu ta pimmatay.)
20Kayat ni Pilato a wayawayaan ni Jesus, isut' gapuna a kinasaona manen dagiti tattao. 21Ngem impukkawda, “Pailansam iti krus! Pailansam iti krus!”
22Pinitlo ni Pilato ti nagkuna kadakuada, “Ania kadi ti basolna? Awan nasarakak nga inaramidna a pakaigapuan ti pannakapapatayna. Pasaplitko laeng sakonto palubosan.”
23Ngem inyad-adda dagiti tattao ti nangyikkis a mailansa ni Jesus iti krus ket iti kamaudianna, naipangag ti dawatda. 24Inkeddeng ni Pilato ti sentensia, kas kiddawda. 25Winayawayaanna ti lalaki a kayatda, ti naibalud gapu iti riribuk ken pammapatay, ket inyawatna ni Jesus kadakuada tapno aramidenda ti kaykayatda.
Mailansa ni Jesus iti Krus
(Mat. 27:32-44; Mar. 15:21-32; Jn. 19:17-27)
26Impanaw dagiti soldado ni Jesus. Iti dalan, nasabetda ti maysa a lalaki nga agnagan Simon a taga-Cirene a naggapu iti away, ket agturong iti siudad. Tiniliwda ket impabaklayda kenkuana ti krus sada impasaruno ken ni Jesus.
27Adu a tattao ti simmurot ken ni Jesus. Sumagmamano kadakuada ti babbai. Sangsangitan ken dungdung-awanda ni Jesus.
28Tinaliawna ida ket kinunana, “Babbai a taga-Jerusalem, didak sangsangitan! Dagiti bagbagiyo ken dagiti annakyo ketdi ti sangitanyo! 29Ta umasidegen dagiti aldaw a panagkunanto dagiti tat-tao, ‘Nagasat dagiti babbai a di nagan-anak, di nagsikog ken di nagpasuso!’ 30Daytanto#Os. 10:8; Pal. 6:16. ti tiempo a panagkuna dagiti tattao kadagiti bambantay, ‘Tupakandakami!’ ken kadagiti turturod, ‘Gaburandakami!’ 31No kastoy ti maaramid no naata ti kayo, anianto ketdin no nagango?”
32Adda dua a kriminal nga inkuyogda a mapapatay met a kagiddan ken ni Jesus. 33Idi dimtengda iti lugar a managan “Bangabanga,” inlansada ni Jesus iti krus. Inlansada met dagiti dua a kriminal, maysa iti makannawan ket ti sabali iti makannigid ni Jesus.
34“Ama,”#Sal. 22:18. kinuna ni Jesus, “pakawanem ida ta dida ammo ti ar-aramidenda.”
Nagbibingayan dagiti soldado dagiti pagan-anay ni Jesus babaen iti panagbibinnunotda.
35Nagtatakder#Sal. 22:7. sadiay dagiti tattao nga agbuybuya idinto a linalais dagiti panguloen a Judio a kunkunada, “Insalakanna dagiti dadduma. Isalakanna man ngarud ti bagina no isu ti Cristo a pinili ti Dios!”
36Linalais#Sal. 69:21. met dagiti soldado. Immasidegda ken ni Jesus sada inyawatan iti suka. 37“Isalakanmo ta bagim, no sika ti Ari dagiti Judio!” kinunada.
38Adda kastoy a naisurat iti ngatoen ni Jesus:#38 Jesus; iti lengguahe a Latin, Hebreo ken Griego, inayon ti dadduma a kadaanan a patarus. “Daytoy ti Ari dagiti Judio.”
39Pinabpabainan ti maysa kadagiti kriminal a nailansa. “Saan kadi a sika ti Cristo?” kinunana. “Isalakanmo ngarud ta bagim ket isalakannakami met!”
40Ngem binabalaw ti kaduana a kriminal. “Dika aya agbuteng iti Dios?” kinunana. “Agpapadatayo amin a madusdusa. 41Rebbengna nga agsagabata gapu iti inaramidta. Ngem daytoy a tao, awan dakes nga inaramidna.” 42Ket kinunana ken ni Jesus, “Laglagipennak, Jesus, inton mapanka iti pagariam.”
43Kinuna ni Jesus kenkuana, “Ibagak kenka daytoy: Ita nga aldaw, makipagyankanto kaniak idiay Paraiso.”
Ti Ipapatay ni Jesus
(Mat. 27:45-56; Mar. 15:33-41; Jn. 19:28-30)
44Dandani tengnga ti aldaw idi agsipnget iti entero a daga ket nagpaut agingga iti alas tres iti malem. 45Napigis#Ex. 26:31-33. a naggudua ti kurtina a naibengbeng iti Templo.
46Nagpukkaw#Sal. 31:5. ni Jesus iti napigsa: “Ama, kadagita imam yawatko ti espirituk!” Apaman a nasaona daytoy, nauyosen ti biagna.
47Idi makita ti kapitan dagiti soldado ti napasamak, nagdaydayaw iti Dios. “Pudno nga awan basol daytoy a tao!” kinunana.
48Nakita dagiti tattao a napan nagbuya ti napasamak ket nagawidda amin a mangdandanog iti barukongda a mangipakita iti panagladingitda.
49Iti#Luc. 8:2-3. adayo bassit, nakatakder dagiti amin a gagayyem ni Jesus ken dagiti babbai a simmursurot kenkuana manipud Galilea. Nakitada dagitoy a napasamak.
Ti Pannakaitanem ni Jesus
(Mat. 27:57-61; Mar. 15:42-47; Jn. 19:38-42)
50-52Adda lalaki a napan ken ni Pilato tapno dawatenna ti bangkay ni Jesus. Isu ni Jose a naggapu iti ili ti Arimatea idiay Judea. Nalinteg ken natakneng a tao ni Jose ken paspasungadenna ti idadateng ti Pagarian ti Dios. Nupay maysa a kameng ti Sanhedrin, saan nga immanamong iti inkeddeng ken inaramidda.
53Kalpasan ti panangibabana iti bangkay, binungonna iti linen a lupot sana inkabil iti tanem a naikungkong iti bato ken di pay nausar. 54Aldaw idi a Panagsagana, ket dandani mangrugin ti Aldaw a Panaginana.
55Simmurot ken ni Jose dagiti babbai a kimmuykuyog ken ni Jesus manipud Galilea. Nakitada ti tanem ken ti pannakaikabil ti bangkayna. 56Kalpasanna,#Ex. 20:10; Deut. 5:14. nagawidda ket insaganada dagiti bangbanglo ken sapsapo nga agpaay iti bangkay.
Ket iti Aldaw a Panaginana, naginanada kas sagudayen ti Linteg.
Currently Selected:
San Lucas 23: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society