Josue 5
5
Ti Pannakakugit dagiti Lallaki idiay Gilgal
1Nadamag dagiti amin nga ari dagiti Amorreo iti laud ti Jordan ken dagiti ari dagiti Cananeo iti igid ti Taaw Mediterranean a pinagmaga ti Apo ti Jordan agingga a nakaballasiw dagiti Israelita. Nagbutengda ket timmakrotda a mangsango kadagiti Israelita.
2Kinuna ni Yahweh ken ni Josue, “Agaramidka kadagiti imuko iti natangken a bato ket kugitem amin dagiti Israelita.” 3Iti kasta, nagaramid ni Josue kadagiti natadem a bato ket kinugitna dagiti Israelita iti maysa a lugar a maaw-awagan iti Gibeat-haaralot.#3 GIBEAT-HAARALOT: kayatna a sawen, turod a pagkugitan. 4-6Idi#Num. 14:28-35. pumanaw dagiti Israelita idiay Egipto, nakugit aminen dagiti lallaki. Ngem iti unos ti 40 a tawen a panagdaliasat dagiti Israelita idiay let-ang, awan ti maladaga a nakugit. Maysa pay, kalpasan dayta a tiempo, natay dagiti amin a mannakigubat a lallaki a rimmuar idiay Egipto, agsipud ta nagsukirda iti Apo. Kas insapatana, dina impalubos a makitada ti nabaknang ken nadam-eg a daga nga inkarina nga ited kadagiti kapuonanda. 7Saan a nakugit dagiti annakda ket daytoy baro a kaputotan ti kinugit ni Josue.
8Kalpasan ti pannakakugitda, nagtalinaed ti entero a nasion iti kampo agingga nga immimbag dagiti sugatda. 9Kinuna ni Yahweh ken ni Josue, “Ita nga aldaw, inikkatko kadakayo ti pannakaibabainyo a kas tagabu idiay Egipto.” Isut' gapuna a Gilgal#9 GILGAL: Iti Hebreo, umasping iti naikkat ti pannakabalikas ti Gilgal. ti naipanagan iti dayta a disso, ket isu pay laeng ti naganna agpapan ita.
10Bayat#Ex. 12:1-13. ti panagkampo dagiti Israelita idiay Gilgal, iti tanap ti Jerico, nginilinda ti Paskua iti rabii ti maika-14 nga aldaw ti bulan. 11Iti sumuno nga aldaw, damo a nanganda iti taraon a naapit idiay Canaan: iniruban ken tinapay nga awan lebadurana. 12Nagsardeng#Ex. 16:35. idin a nagtinnag ti mana. Awanen ti mana ket manipud iti dayta a tawen, ti apit ti Canaan ti paggapuan ti kanenda.
Ni Josue ken ti Lalaki a Nakaiggem iti Kampilan
13Idi adda ni Josue iti asideg ti Jerico, kellaat nakakita iti maysa a lalaki a siiiggem iti kampilan nga agtaktakder iti sangoananna. Inasitgan ni Josue ket sinaludsodna, “Maysaka kadi kadagiti soldadomi wenno maysaka a kabusor?”
14“Saan,” insungbat ti lalaki. “Addaak ditoy a kas kapitan ti buyot ti Apo.”
Nagrukbab ni Josue a nagdaydayaw kenkuana ket kinunana, “Sidadaanak nga agserbi kenka, apo. Ania ti kayatmo nga aramidek?”
15Kinuna ti kapitan ti buyot ni Yahweh, “Ikkatem ta pallokam ta nasantoan a daga ti pagtaktakderam.” Nagtungpal ni Josue.
Currently Selected:
Josue 5: RIPV
Highlight
Share
Compare
Copy
Want to have your highlights saved across all your devices? Sign up or sign in
© 1996 Philippine Bible Society
