Joel 2
2
Dagiti Dudon a Mangipakdaar iti Aldaw ni Yahweh
1Puyotenyo ti trumpeta;
ipakdaaryo a dumteng ti peggad idiay Sion,
ti nasantoan a turod#1 NASANTOAN A TUROD: Bantay Sion (kitaen ti glosario). ti Dios.
Agpigergerkayo, dakay amin a taga-Juda,
ta asidegen ti yaay ti aldaw ti Apo!
2Nasipnget ken nalidemto dayta nga aldaw,
aldaw a nalulem ken naulep.
Sumungad ti dakkel a pangen ti dudon,
kas iti sipnget nga agsaknap kadagiti bantay.
Awan pay napasamak a kas iti daytoy,
ket awanton ti kasta a mapasamak iti masakbayan.
3Kasda la apuy nga agkaan kadagiti mula.
Kasla Hardin ti Eden
ti sangpetanda a daga,
ngem no panawandan
maysan a let-ang nga awan nagyanna.
Awan ti lisianda.
4Kasda#Pal. 9:7-9. la kabalio;
dumarupda a kasla kabalio a pakigubat.
5Iti panaglagtolagtoda kadagiti bambantay,
kumaradakadda a kas kadagiti lugan a pakigubat.
Kumarasakasda a kas iti nagango
a ruot a maur-uram.
Naintarda a kasla nabileg nga armada
a nakasagana a makigubat.
6Agbuteng dagiti makakita iti isusungadda,
ket uray la a bumbumsagda amin.
7Dumarupda a kasla mannakigubat;
kasda la soldado a mangkalay-at iti bakud.
Naurnos ti pannagnada;
sangsangkamaysa ti turongda,
8ket saanda nga agsisinnali.
Sarienda dagiti sarikedked,
ket awan ti makalapped kadakuada.
9Sipapardasda a mangraut iti siudad;
kalay-atenda dagiti bakud;
ulienda dagiti balbalay,
ket kasda la mannanakaw a sumrek iti tawa.
10Agkintayeg#Pal. 8:12. ti daga iti isusungadda;
agpigerger ti tangatang.
Agsipnget ti init ken ti bulan;
saanen nga agraniag dagiti bituen.
11Bilinen#Pal. 6:17. ti Apo ti armadana;
kasla gurruod ti timekna.
Adu ken nabileg dagiti soldado
nga agtulnog kenkuana.
Nakabutbuteng ti aldaw ti Apo!
Siasinonto ti makalasat iti dayta nga aldaw?
Maawis dagiti Tattao nga Agbabawi
12Kuna ti Apo: “Ngem uray
ita, agbabawikayo iti amin a pusoyo ket agsublikayo kaniak;
agayunar, agsangit ken agdung-awkayo.
13Ipakitayo ti agsensennaay a pusoyo iti ladingit;
saan nga umdas ti panangray-abyo iti pagan-anayyo.”
Agsublikay iti Apo a Diosyo.
Naasi ken managparabur,
naanus ken tungpalenna ti karina;
sidadaan a mamakawan, saan a mangdusa.
14Nalabit a baliwan ti Apo a Diosyo ti panunotna,
ket paraburannakayto iti adu nga apit.
Iti kasta, addanto makan ken arak
nga idatonyo kenkuana.
15Puyotenyo ti trumpeta idiay Bantay Sion;
ibilinyo ti panagayunar dagiti tattao,
ket angayenyo ti gimong.
16Ummongenyo dagiti tattao;
isaganayo ida a tumabuno iti sagrado a gimong.
Yegyo dagiti babbaket ken lallakay;
ummongenyo dagiti ubbing,
uray pay dagiti maladaga.
Uray dagiti kakaskasar,
masapul a panawanda ti balayda ket umayda.
17Dakayo#1 Mac. 7:36-38. a papadi nga agserserbi ti Apo
iti nagbaetan ti altar ken ti ruangan ti Templo,
masapul nga agsangit ken agkararagkayo.
Kunayo, “Kaasiam dagiti tattaom, O Apo.
Dimo ipalubos a lalaisen ken pagang-angawandakami
dagiti sabali a nasion iti panagkunada:
‘Sadino ti ayan ti Diosyo?’”
Isubli ti Dios ti Kinabaknang ti Daga
18Kalpasanna, impakita ti Apo ti panangipategna iti dagana;
kinaasianna dagiti tattaona.
19Impangagna ida, ket kinunana:
“Ita, ikkankayo iti trigo, arak ken lana,
ket mapnekkayto.
Didakayton laisen dagiti sabali a nasion.
20Ipanawkonto kadakayo dagiti pangen ti dudon a naggapu iti amianan,
ket ipankonto iti let-ang ti dadduma kadakuada.
Sunsonekto ti akin-sango a bunggoyda
agingga iti Natay a Baybay.
Iturongkonto ti akinlikud a buyotda
agingga idiay Taaw Mediterranean.
Agbuyokto dagiti bangkayda,
ket agadiwaranto ti bangsitda.
Dadaelekto ida
gapu kadagiti amin nga inaramidda kadakayo.
21“Dakayo a talon, dikay agbuteng
ngem agrag-o ken agragsakkayo,
gapu iti amin nga impaay ti Apo kadakayo.
22Dikay agbuteng, dakayo nga animal;
nalangto manen dagiti pagaraban.
Agbungan dagiti kayo,
ket adu ti bunga ti igos ken ubas.
23“Agragsakkayo, tattao ti Sion;
agragsakkayo gapu iti impaay kadakayo ti Apo a Diosyo.
Inikkannakayo iti tumutop nga umuna a tudo;#23 tumutop nga umuna a tudo; wenno umuna a tudo agsipud ta nalinteg.
nagbayakabak iti tiempo ti tudtudo
ket kas iti sigud, inikkannakayo iti naladaw a tudo.
24Mapnonto iti trigo dagiti pagirikan;
aglippiasto iti arak ken lana
dagiti tangke iti abay dagiti pagpespesan.
25Isublikto ti napukawyo kadagiti napalabas a tawen
idi kinnan dagiti pinangen a dudon dagiti apityo.
Imbaonko daytoy nga armada a nangraut kadakayo.
26Adunton ti taraonyo,
ket mapnekkayto.
Idaydayawyonto ti Apo a Diosyo,
a nagaramid kadagiti nakaskasdaaw
a banag nga agpaay kadakayo.
Saanton a malalais dagiti tattaok.
27Dakayo nga Israelita,
maammoanyonto nga addaak kadakayo,
ket siak, ni Yahweh, siak ti Diosyo,
awan ti sabali.
Saanton a malalais dagiti tattaok.”
Ti Aldaw ni Yahweh
28Kuna#Ara. 2:17-21. ti Apo: “Kalpasanna,
ibuyatkonto ti Espirituk iti amin a tao.
Ipakaammonto dagiti annakyo ti mensahek;
agdarepdepto dagiti lallakayyo,
ket agparmatanto dagiti lallaki nga agtutuboyo.
29Iti dayta a tiempo, ibuyatkonto ti Espirituk
uray pay kadagiti adipen,
lalaki man wenno babai.
30“Iti dayta nga aldaw,
agipakitaakto kadagiti ballaag
iti tangatang ken ditoy daga.
Addanto pannakaibuyat ti dara,
addanto apuy ken asimbuyok.
31Agsipngetto#Mat. 24:29; Mar. 13:24-25; Luc. 21:25; Pal. 6:12-13. ti init,
ket lumabbaganto ti bulan a kas iti dara
sakbay a dumteng ti naindaklan
ken nakabutbuteng nga aldaw ni Yahweh.
32Ngem#Rom. 10:13. maispalto dagiti amin nga agpatulong ken ni Yahweh.
Kas kinunana, ‘Addanto dagiti makalasat idiay Jerusalem;
makalassatto dagiti piliek.’”
Currently Selected:
Joel 2: RIPV
Highlight
Share
Compare
Copy
Want to have your highlights saved across all your devices? Sign up or sign in
© 1996 Philippine Bible Society
