Job 15
15
Ti Maikadua a Bitla
(15:1–21:34)
Sumungbat manen ni Elifaz:
1-2Job, ubbaw dagiti imbalikasmo, ubbawda!
3Awan ti masirib nga agsao a kas kenka
wenno mangikalintegan iti bagina
kadagiti awan serserbina a sao.
4Dagiti agbuteng iti Dios maupayda;
lapdam ida nga agkararag kenkuana.
5Ti basolmo ti mamagsao kenka;
ab-abbongam dagiti basolmo kadagiti nasikap a sao.
6Saan a masapul nga ikeddengko a nagbasolka;
dagiti met la saom ti mangukom kenka.
7Ipagarupmo aya a sika ti kaunaan a nayanak?
Addaka kadin idi parsuaen ti Dios dagiti bantay?
8Nangngegmo kadi dagiti panggep ti Dios?
Siksika la aya ti tao nga adda ammona?
9Ammomi amin ti ammom.
10Nagtaud ti kinasiribmi
kadagiti ub-ubanan a lallakay,
lallaki a nayanak sakbay ni amam.
11Liwliwaennaka ti Dios ngem dimo ikaskaso;
iti naganna, naalumamay dagiti saomi ngem dimo ikankano.
12Nupay kasta, masair ta riknam,
ket sipupungtotka a mangkuskusilap kadakami.
13Kapungtotmo ti Dios,
ket agsaoka pay iti maibusor kenkuana.
14Adda#Jb. 25:4-6. aya tao a nadalus?
Adda kadi nalinteg iti imatang ti Dios?
15Di pay talken ti Dios dagiti anghelesna;
uray isuda, saanda a nadalus iti imatangna.
16Anianto ketdin ti narukop a tao nga awan serserbina,
Arub-obenna ti dakes a kas iti danum nga inumenna.
17Dumngegka, Job,
ta ibagak ti ammok.
18Insuro dagiti mamasirib kaniak
ti pudno a naadalda kadagiti ammada,
ket awan inlimlimedda.
19Awan ti mangyadayo kadakuada iti Dios,
ta awan ganggannaet a nakipagtaeng kadakuada.
20Ti dakes a tao a mangirurumen,
agtutuokto bayat ti panagbiagna.
21Nakabutbutengto nga ikkis dagiti mangngegna;
no ipagarupna nga awan ti pakaan-annoanna,
serken dagiti mannanakaw ti balayna.
22Awan namnamana a makaaon iti sipnget,
ta agur-uray ti kampilan a mangpapatay kenkuana.
23Agur-uray met dagiti buitre#23 buitre kuna ti maysa a kadaanan a patarus. Iti Hebreo, sadino ti yanna. a mangsida iti bangkayna.
Ammona a nasipnget ti masakbayanna,
24ta agur-uray kenkuana ti pannakadadael
kas nabileg nga ari a mangdarup kenkuana.
25Kasta ti pagtungpalan ti tao a bumusor iti Dios,
ti pagbanagan ti agsukir iti Mannakabalin-amin.
26-27Napalangguad ken nasukir ti kasta a tao;
sitatangsit a mangitag-ay iti kalasagna,
ket agdarasudos a mangsaranget iti Dios.
28Dayta ti tao a nangsakup kadagiti siudad
ken nangtagikua kadagiti balbalay
a dagiti akinkukua pimmanawda
ngem madadaelto dagitoy inton adda gubat.
29Dinto agbayag ti kinabaknangna;
dinto met agpaut ti sanikuana.
Mapukawto uray ti anniniwanna
30ket dinanto malisian ti sipnget.
Mayarigto iti kayo
a mauram dagiti sangsangana,
ken ipalais ti angin dagiti sabongna.#30 sabongna kuna ti maysa a kadaanan a patarus. Iti Hebreo, ti ngiwatna.
31No maag nga agtalged iti kinadakesna,
kinadakes met laeng ti apitenna.
32Malaylayto#32 Malaylayto kuna ti sumagmamano a kadaanan a patarus. Iti Hebreo, Mapnonto. sakbay ti naikeddeng a tiempona,
ket saanton a lumangto dagiti sangana.
33Kaslanto iti ubas a maregreg dagiti bungana
sakbay a maluomda;
kaslanto iti olibo nga agtinnag dagiti sabongna.
34Awanto ti kaputotan dagiti awan Diosna;
mauramto dagiti balay
a nabangon gapu iti pasuksok.
35Dagitoy dagiti tattao a dakes ti panggepda;
panangallilaw ti kanayon a pampanunotenda.
Currently Selected:
Job 15: RIPV
Highlight
Share
Compare
Copy
Want to have your highlights saved across all your devices? Sign up or sign in
© 1996 Philippine Bible Society
