Job 1
1
Suoten ni Satanas ni Job
1Adda idi maysa a tao nga agnagan iti Job nga agnanaed idiay Uz.#1 UZ: maysa a lugar nga awan ti makaammo iti eksakto a lokasionna. Agdaydayaw iti Dios ket napudno kenkuana. Naimbag a tao ni Job ket saan nga agaramid iti dakes. 2Sangapulo ti annakna: pito a lallaki ken tallo a babbai. 3Adu ti animal a tarakenna: 7,000 a karnero, 3,000 a kamelio, 1,000 a baka ken 500 nga asno. Adu met ti adipenna ket isu ti kabaknangan iti deppaar ti Daya.
4Agsisinnublat nga agpadaya dagiti lallaki nga annak ni Job ket kanayon met nga awisenda a dumar-ay dagiti kakabsatda a babbai. 5Tunggal malpas ti padaya, bumangon a masapa ni Job ket agpuor kadagiti daton a maipaay iti pannakadalus dagiti annakna. Naipaugali nga aramidenna daytoy ta kunkunana iti bagina, “Amangan no nagbasol dagiti annakko babaen iti pananglaisda iti Dios iti unegda.”
6Idi#Gen. 6:2. dumteng ti aldaw a panagparang dagiti nailangitan a parsua#6 NAILANGITAN A PARSUA: Karkarna a parsua nga agserserbi iti Dios sadi langit. iti saklang ni Yahweh, kimmuyog met kadakuada ni Satanas.#6 SATANAS: Karkarna a parsua; ipakita ti naganna nga isu ket maibilang a kabusor ti tao. 7Sinaludsod ni Yahweh kenkuana, “Sadino ti naggapuam?”
“Sinursursorko ti entero a daga,” insungbat ni Satanas.
8“Napaliiwmo kadi ni adipenko a Job?” sinaludsod ni Yahweh. “Awan iti daga ti napudno ken awan pakapilawanna a kas kenkuana. Managbuteng kaniak ket saan nga agaramid iti dakes.”
9Kinuna#Pal. 12:10. ni Satanas, “Agdaydayaw ngata kenka ni Job no awan ti imbag a magun-odna? 10Sinalaknibam ni Job agraman ti familiana ken ti amin a sanikuana. Bendisionam ti amin nga aramidna ket inikkam iti adu unay nga animalna a mangsaknap iti entero a pagilian. 11Ngem padasem man nga alaen ti amin a sanikuana ta kitaem no dinakanto ilunod!”
12Kinuna ni Yahweh ken ni Satanas, “Ala wen, aramidem ti aniaman a kayatmo kadagiti amin nga adda kenkuana, ngem saanmo a dangran ni Job.” Ket pimmanaw ni Satanas iti imatang ni Yahweh.
Matay dagiti Annak ni Job ken Mapukaw ti Kinabaknangna
13Iti maysa nga aldaw, idi agrarambak dagiti annak ni Job iti balay ti inauna a kabsatda a lalaki, 14nagtartaray ti maysa a babaonen a napan ken ni Job. Kinunana, “Agar-aradokami iti talon ket agar-arab met dagiti asno iti asidegmi. 15Pagammoan, rimmaut dagiti taga-Sabe#15 TAGA-SABE: Maysa nga agalla-alla a tribu a rumaraut manipud iti abagatan. ket intalawda dagiti amin nga animal. Pinatayda dagiti amin nga adipenmo! Siak laeng ti nakalibas a mangipakaammo kenka iti napasamak.”
16Agsasao pay laeng ti adipen idi dumteng ti sabali nga adipen ket kinunana, “Nakimat dagiti karnero ken dagiti agpaspastor ket natayda amin! Siak laeng ti nakalasat a mangipakaammo kenka iti napasamak.”
17Agsasao pay laeng ti adipen idi dumteng ti sabali pay nga adipen ket kinunana, “Adda tallo a grupo dagiti Caldeo#17 CALDEO: Maysa nga agalla-alla a tribu a rumaraut manipud iti amianan. a nangdarup kadakami. Innalada amin a kamelio ket pinatayda amin nga adipenmo! Siak laeng ti nakalibas a mangibaga kenka iti napasamak.”
18Saan pay a nalpas a nagsao ti adipen idi dumteng ti sabali manen nga adipen ket kinunana, “Agrarambak dagiti annakmo iti balay ti inauna a kabsatda. 19Pagammoan, dimteng ti napigsa nga angin a naggapu iti let-ang. Rinebbana ti balay ket natay amin nga annakmo! Siak laeng ti nabati a mangibaga kenka iti napasamak.”
20Timmakder ni Job ket rinay-abna ti pagan-anayna gapu iti ladingitna. Kinuskosanna ti ulona sa nagpakleb iti daga ket nagdaydayaw. 21Kinunana,#Sir. 40:1; 11:14. “Lamolamoak a nayanak ket matayakto met a lamolamo. Ti Apo ti nangted ket ita, isu met laeng ti nangala. Madaydayaw koma ti naganna!” 22Ngem uray kasta ti naaramid, saan a nagbasol ni Job. Dina pinabasol ti Dios gapu iti napasamak.
Currently Selected:
Job 1: RIPV
Highlight
Share
Compare
Copy
Want to have your highlights saved across all your devices? Sign up or sign in
© 1996 Philippine Bible Society
