Isaias 8
8
Maipasngay ti Anak ni Isaias
1Kinuna ni Yahweh kaniak, “Mangalaka iti dakkel a pagsuratan ket isuratmo iti dadakkel a letra:#1 dadakkel a letra; wenno leletra a mabalin a mabasa ti siasinoman. ‘Maher-salal-has-baz.’#1 Nagan ti Hebreo, kayatna a sawen, alisto nga agarang, napardas nga agsamsam. 2Mangalaka iti dua a mapagtalkan a lallaki nga agserbi a saksi, ni Urias a padi ken ni Zacarias nga anak ni Jeberekias.”
3Iti saan a nabayag kalpasanna, nagsikog ti asawak. Idi maipasngay ti lalaki nga anakmi, imbaga kaniak ni Yahweh a ti naganna ket “Maher-salal-has-baz.” 4Sakbay a mabalikas ti ubing ti “Ina” ken “Ama,” italawto ti ari ti Asiria ti amin a sanikua ti Damasco ken ti amin a sinamsam ti Samaria.
Umayen ti Ari ti Asiria
5Nagsao manen kaniak ti Apo. 6Kinunana, “Gapu ta linaksid dagitoy a tattao ti nalinak a danum ti Waig Siloa#6 WAIG SILOA: Aggapu daytoy a waig iti dakkel nga ubbog iti akindaya a paset ti Jerusalem. ken agtigergerda#6 wenno agrag-o. iti sango ni Ari Rezin ken Ari Peka, 7siak nga Apo, yegkonto ti emperador ti Asiria ken dagiti amin a soldadona a mangraut iti Juda. Dumarupdanto a kas iti danum nga aggapu iti Karayan Eufrates no dumakkel ti karayan a manglapunos iti amin a teppangna. 8Layusendanto ti Juda; ngumatodanto a kasla danum agingga iti abaga ket malapunos ti amin.”
Immanuel! Siuukrad dagiti payakna a mangsalaknib iti daga.
9Sibubutengkayo nga aguummong, dakayo a nasion! Dumngegkayo, dakayo nga adda iti adayo a daga. Uray no agsaganakayo a makigubat, agbutengkayto! Wen, agsaganakayo ngem agbutengkayo! 10Agplanokayo ngem dinto agballigi dagiti panggepyo. Agsaokayo iti kaykayatyo! Ngem awanto ti serserbina ta adda kadakami ti Dios.
Pakdaaran ni Yahweh ti Profeta
11Babaen iti dakkel a pannakabalin ni Yahweh, pinakdaarannak a saanak a magna iti dalan a pagpagnaan dagiti tattao. Kinunana, 12“Saanka#1 Ped. 3:14-15. a makiraman kadagiti dakes a panggep dagiti tattao ket saanka met nga agbuteng kadagiti banag a kabutengda. 13Laglagipem a siak, ni Yahweh a Mannakabalin-amin, nasantoanak; siak ti masapul a kabutengmo. 14Gapu#1 Ped. 2:8. iti kinasantok a mangabbukay iti panagdaydayaw, mayarigak iti bato a pakaitibkolan dagiti tattao; kaslaak la palab-og a pakaitinnagan dagiti tattao kadagiti pagarian ti Juda ken Israel ken dagiti agnaed iti Jerusalem. 15Adunto ti maitibkol ken matnag. Matnagdanto ket marumrumekda. Maipalab-ogdanto.”
Maiparit ti Makiuman kadagiti Natay
16Dakayo nga adalak, salluadan ken taginayonenyo dagiti mensahe nga inted kaniak ti Apo. 17Inlemmengan#Heb. 2:13. ti Apo dagiti tattaona ngem agtalekak kenkuana ket isu ti pangnamnamaak.
18Adtoykami#Heb. 2:13. kadagiti annakko nga inted kaniak ti Apo a Mannakabalin-amin a naisaad ti tronona idiay Bantay Sion. Imbaonnakami a kas sibibiag a mensahe kadagiti Israelita.
19Ibaganto dagiti tattao a makiumankayo kadagiti mammadles ken mammuyon nga agar-arasaas ken agtantanamitim. Addanto agkuna, “Makiumankayo kadagiti mammadles ken mammuyon nga agar-arasaas ken agtantanamitim.” Ngem saan kadi a ti Dios ti pakiumanan dagiti tattao? Rumbeng kadi a makiumanda kadagiti natay nga agpaay kadagiti sibibiag?
20Kastoyto ti isungbatyo kadakuada, “Ipangagyo ti isursuro kadakayo ti Apo! Diyo ipangag dagiti makiuman kadagiti natay ta awan magunggonayo iti ibagada kadakayo.”
Tiempo ti Rigat
21Maupay ken mabisbisinanto dagiti tattao nga agalla-alla iti daga. Gapu iti bisin ken pungtotda, ilunoddanto ti arida ken ti Diosda. Uray tumangaddanto sadi langit 22wenno mulenglenganda ti daga, awanto ti makitada no di pasig a rigat ken sipnget, ti nakabutbuteng a sipnget a pakaituronganda.
Currently Selected:
Isaias 8: RIPV
Highlight
Share
Compare
Copy
Want to have your highlights saved across all your devices? Sign up or sign in
© 1996 Philippine Bible Society
