Isaias 15
15
Dadaelen ti Dios ti Moab
1Daytoy#Is. 25:10-12; Jer. 48:1-47; Eze. 25:8-11; Am. 2:1-3; Sof. 2:8-11. ti pakdaar maipapan iti Moab.
Madadael dagiti siudad ti Ar ken Kir iti las-ud ti maysa a rabii ket naulimek ti entero a daga ti Moab. 2Sumang-at dagiti tattao ti Dibon#2 DIBON, mabalin a patarus. Iti Hebreo, tattao ken Dibon. iti turod tapno mapanda agsangit iti lugar a pagdaydayawan. Dung-awan dagiti taga-Moab dagiti siudad ti Nebo ken Medeba. Kinuskosanda dagiti uloda ket inikkatda dagiti barbasda gapu iti ladingitda. 3Kadagiti kalsada, nakaarruat dagiti tattao iti nakersang a lupot. Kadagiti plasa ken tuktok dagiti balbalay, agdudung-aw ken agsasangit dagiti tattao. 4Agsasangit dagiti tattao ti Hesbon ken Eleale ket mangngeg agingga idiay Jaaz dagiti sangsangitda. Uray dagiti soldado agpigergerda ket awanen ti turedda. 5Maasiaanak unay iti Moab! Nagkamang dagiti tattao idiay ili ti Zoar ken idiay Eglat Selisia. Adda dagiti agturong idiay Luhit. Agsasangitda bayat ti isasang-atda iti dalan. Adda dagiti aglibas a mapan idiay Horonaim ket agdudung-awda iti napigsa. 6Nagmagan ti Waig Nimrim, nalaylay dagiti ruot iti igidna ket awanen natda a nalangto a mula. 7Ballasiwen dagiti tattao ti Waig ti Karawawe. Kayatda ti aglibas agraman dagiti amin a sanikuada. 8Mangngeg ti sangsangit iti amin a suli ti Moab ket dumanon kadagiti ili ti Eglaim ken Beerelim. 9Iti ili ti Dibon, nalabbaga ti karayan gapu iti dara, ngem adda pay nakarkaro a didigra nga idissuor ti Dios kadagiti tattao sadiay. Wen, addanto nakaam-ames a panagpapatay a mangibus kadagiti nabati idiay Moab.
Currently Selected:
Isaias 15: RIPV
Highlight
Share
Compare
Copy
Want to have your highlights saved across all your devices? Sign up or sign in
© 1996 Philippine Bible Society
