Oseas 14
14
Ti Isusubli ti Israel ken ni Yahweh
1Tattao ti Israel, agsublikayo iti Apo a Diosyo. Naitibkol ken natnagkayo gapu iti basolyo. 2Agsublikayo iti Apo ket yebkasyo daytoy a kararag a kas datonyo kenkuana: “Pakawanem koma dagiti basbasolmi ken ipangagmo koma ti kararagmi ket idaydayawdaka kas inkarimi. 3Dinakami maisalakan ti Asiria, ket dinakami masalakniban dagiti kabalio a pakigubat. Dimi awaganen a diosmi dagiti imahen nga aramid dagiti imami. O Apo, kaasiam dagiti awan sabali a pagkamanganda.”
Baro a Biag para iti Israel
4Kuna ti Apo,
“Pakawanekon dagiti tattaok
Ayatek ida iti amin a pusok
ta nagbaawen ti pungtotko kadakuada.
5Linnaaw ti arigkonto kadagiti tattao ti Israel
agsabongdanto a kas iti lirio.
Agramutto a kas kadagiti kayo iti Libano.
6Rumangpayanto dagiti sangada.
Napintasdanto a kas iti kayo ti olibo.
Agayamuomto ti bangloda,
kas kadagiti sedro iti Libano.
7Agnaeddanto manen iti salinongko.
Lumangtodanto a kas iti minuyongan.
Agsabongdanto a kas iti ubas.
Agayamuomdanto a kas iti arak ti Libano.
8Ania pay la ti pakasapulan dagiti tattao
ti Israel#8 tattao ti Israel, kuna ti maysa a kadaanan a patarus; iti Hebreo, Israel, Siak. kadagiti didiosen
idinto a siak ti mangted
iti dawatda ken mangaywan kadakuada?
Siak ti saleng a salinongda.
Siak ti pagtaudan ti amin a bendisionda.”
Paggibusan
9Awaten koma dagiti masirib dagiti naisurat ditoy, ket ammoenda ti kaipapananda. Ngamin, nalinteg dagiti wagas ni Yahweh, ket suroten dagiti nalinteg ti panagbiagna ngem saan nga ikankano dagiti managbasol isu a maitibkol ken matnagda.
Currently Selected:
Oseas 14: RIPV
Highlight
Share
Compare
Copy
Want to have your highlights saved across all your devices? Sign up or sign in
© 1996 Philippine Bible Society
