Genesis 36

Dagiti Kaputotan ni Esau

(1 Cron. 1:34-37)

1Dagitoy dagiti kaputotan ni Esau (Edom pay ti naganna). 2Nangasawa#Gen. 26:34. ni Esau kadagiti Cananea: ni Ada nga anak ni Elon a Heteo; ni Oholibama nga anak ni Ana a lalaki#2 anak…a lalaki kuna ti dadduma a patarus. Iti Hebreo a teksto, anak a babai wenno apoko a babai. nga anak ni Zibeon a Heveo; 3ken#Gen. 28:9. ni Basemat nga anak ni Ismael ken kabsat ni Nebayot. 4Inyanak ni Ada ni Elifaz; inyanak ni Basemat ni Reuel; 5ket inyanak met ni Oholibama da Jeus, Jaalam ken Kora. Annak ida ni Esau. Nayanakda amin idiay Canaan.

6Napan nagnaed ni Esau iti sabali a daga. Inkuyogna dagiti assawana, dagiti annakna ken dagiti amin a tattaona, agraman amin a baka ken sanikuana a naurnongna idiay Canaan. 7Pinanawanna ni Jacob idiay Canaan ta saanen nga umdas ti daga a mangbiag kadakuada nga agkabsat. Adu unayen ti arbanda ket dida mabalin ti agtipon. 8Napan nagnaed ni Esau iti katurturodan a pagilian ti Seir.

9Dagitoy dagiti kaputotan ni Esau a kapuonan dagiti Edomita iti katurturodan a pagilian ti Seir. 10-13Maysa ti anak ni Esau ken ni Ada; isu ni Elifaz. Lima ti lallaki nga annak ni Elifaz: Teman, Omar, Zefo, Gatam ken Kenaz. Maysa pay ti anakna ken ni Timna a maysa kadagiti assawana; isu ni Amalec.

Maysa ti anak ni Esau ken ni Basemat: ni Reuel. Uppat met ti lallaki nga annak ni Reuel: Nahat, Zera, Samma ken Mizza.

14Tallo ti lallaki nga annak ni Esau ken ni Oholibama nga anak ni Ana, ti lalaki#14 lalaki kuna ti dadduma a kadaanan a patarus. Iti Hebreo a teksto, babai, wennom apoko a babai. nga anak ni Zibeon: da Jeus, Jaalam ken Kora.

15-16Dagitoy dagiti tribu a nagtaud ken ni Esau. Ni Elifaz nga inauna nga anakna ti kapuonan dagiti sumaganad a tribu: Teman, Omar, Zefo, Kenaz, Kora, Gatam ken Amalec. Isuda dagiti nagtaud ken ni Ada.

17Ni Reuel nga anak ni Esau ti kapuonan dagiti sumaganad a tribu: Nahat, Zera, Samma ken Mizza. Isuda dagiti nagtaud ken ni Basemat.

18Dagiti sumaganad a tribu ti nagtaud ken ni Esau iti pannakiasawana ken ni Oholibama nga anak ni Ana: Jeus, Jaalam ken Kora. 19Nagtaud amin dagitoy a tribu ken ni Esau.

Dagiti Kaputotan ni Seir

(1 Cron. 1:38-42)

20-21Nabingay iti nadumaduma a tribu dagiti sigud nga agnaed iti Edom. Dagiti kaputotan ni Seir a maysa a Horeo ti nagtaudan dagiti kapuonanda: Lotan, Sobal, Zibeon, Ana, Dison, Ezer, ken Disan. 22Ni Lotan ti nagtaudan dagiti kapuonan da Hori ken Heman. (Adda babai a kabsat ni Lotan ket Timna ti naganna.)

23Ni Sobal ti nagtaudan dagiti kapuonan da Alban, Manahat, Ebal, Sefo ken Onam.

24Dua ti lallaki nga annak ni Zibeon: Aya ken Ana. (Ni Ana ti nakasarak iti napudot nga ubbog iti let-ang idi ipaspastorna dagiti asno ni tatangna.) 25-26Ni Ana ti ama ni Dison a nagtaudan dagiti kapuonan da Hemdan, Esban, Itran ken Keran. Adda met babai nga anak ni Ana nga agnagan iti Oholibama.

27Ni Ezer ti nagtaudan dagiti kapuonan da Bilhan, Zaavan ken Akan. 28Ni Disan ti nagtaudan dagitoy a kapuonan da Uz ken Aran. 29-30Dagitoy ti tribu dagiti Horeo iti daga ti Edom: Lotan, Sobal, Zibeon, Ana, Dison, Ezer ken Disan.

Dagiti Ari ti Edom

(1 Cron. 1:43-54)

31-39Dagitoy sumaganad nga ar-ari ti nagsasaruno a nangituray iti Edom sakbay nga adda ari iti Israel:

Bela nga anak ni Beor a taga-Dinhaba

Jobab nga anak ni Zera a taga-Bozra

Husam iti deppaar ti Teman

Hadad nga anak ni Bedad a taga-Avit. (Pinarmekna dagiti Midianita iti maysa a gubat iti pagilian ti Moab.)

Samla a taga-Masrecca

Saul a taga-Rehobot-iti-Karayan

Baal Hanan nga anak ni Akbor

Hadad a taga-Pau. (Asawana ni Mehetabel nga anak ni Matred ken apoko ni Mezaab.)

40-43Ni Esau ti kapuonan dagitoy sumaganad a tribu dagiti Edomita: Timna, Alva, Jetet, Oholibama, Ela, Pinon, Kenaz, Teman, Mibzar, Magdiel ken Iram. Ti lugar a pagnaedan ti tunggal maysa kadagitoy a tribu isu met ti naipanagan kadakuada.

Currently Selected:

Genesis 36: RIPV

Highlight

Copy