Ezekiel 8

TI MAIKADUA A PARMATA NI EZEKIEL MAIPAPAN ITI DIOS

(8:1–10:22)

Panagdaydayaw kadagiti Imahen idiay Jerusalem

1Iti maikalima nga aldaw ti maikanem a bulan ti maikanem a tawen ti pannakaitalawmi a kas balud, agtugtugaw a makisarsarita kaniak iti balayko dagiti papangulo dagiti naitalaw a taga-Juda. Pagammoan, immay kaniak ti pannakabalin ti Apo a Dios. 2Timmangadak#Eze. 1:27. ket nakitak iti parmata ti umap-apuy a kasla tao. Manipud iti siket nga agpababa, kasla apuy ti bagina. Manipud iti siket nga agpangato naraniag a kasla napasileng a bronse. 3Inyunnatna ti kasla ima ti tao ket ginammatanna ti buokko. Iti daytoy a parmata, impangatonak ti espiritu ti Dios ket impannak idiay Jerusalem. Indissonak iti akin-uneg a pagserkan iti akin-amianan a ruangan ti Templo nga ayan ti maysa nga imahen a makarimon iti Dios.

4Nakitak#Eze. 1:28. sadiay ti makapurar a lawag a mangipakita iti kaadda ti Dios ti Israel, kas iti nakitak idi addaak iti igid ti Karayan Kebar. 5Kinuna ti Dios kaniak, “Anak ti tao, kumitaka iti amianan.” Kimmitaak, ket iti asideg ti altar iti ruangan a pagserkan nakitak ti estatua a makarimon iti Dios.

6Kinuna ti Dios kaniak, “Anak ti tao, makitam kadi ti ar-aramiden dagiti Israelita? Kitaem dagiti makarimon nga ar-aramidenda ditoy a pakaigapuan ti pannakayadayok iti nasantoan a lugarko. Ad-adunto pay ti makitam a dakdakes ngem dagitoy.”

7Impannak iti pagserkan ti akinruar a paraangan, ket impakitana kaniak ti maysa nga abut iti bakud. 8Kinunana, “Anak ti tao, palawaem dayta nga abut.” Tinubtobak ti bakud, ket nakitak ti maysa a ruangan. 9“Sumrekka,” kinunana, “ket kitaem ti agkakadakes ken makarimon nga ar-aramidenda ditoy.” 10Simrekak ngarud ket kinitak. Napno dagiti diding kadagiti naikur-it a ladawan dagiti uleg ken sabsabali nga animal a maibilang a narugit#10 NARUGIT NGA ANIMAL: Iparit ti Linteg ni Moises ti pannangan kadagiti animal a maibilang a narugit (Kitaenyo ti 4:13; Lev. 11). ken dagiti dadduma a banag a pagdaydayawan dagiti Israelita. 11Pitopulo a papangulo nga Israelita ti adda sadiay, agraman ni Jaazanias nga anak ni Safan. Siiiggem ti tunggal maysa iti pagpuoran iti insenso, ket umasimbuyok ti asuk ti insenso. 12Sinaludsod ti Dios kaniak, “Anak ti tao, makitam dagiti nalimed nga ar-aramiden dagiti papangulo dagiti Israelita? Addada amin nga agdaydayaw iti maysa a kuarto a napno kadagiti imahen. Kunada nga ipambar, ‘Saannatayo a makita ti Apo. Binaybay-anen ti Apo ti pagilian.’”

13Kalpasanna, kinuna ti Apo kaniak, “Makitamto ida nga agaramid kadagiti makarimon a banag a dakdakes ngem dagita.” 14Iti kasta, impannak iti akin-amianan a pagserkan ti Templo ket impakitana kaniak dagiti babbai nga agsasangit gapu iti ipapatay ni didiosen a Tammuz.#14 TAMMUZ: ti didiosen a maipagarup a matay no matay ti mula ket agbiag iti sumuno a tawen. Dung-awan idi dagiti babbai ti ipapatayna.

15Sinaludsodna, “Anak ti tao, makitam dayta? Ad-adunto pay ti makitam a makarimon.” 16Iti kasta, inserreknak iti akin-uneg a paraangan ti Templo. Adda agarup 25 a lallaki iti pagserkan ti santuario, iti nagbaetan ti altar ken ti pagnaan. Nakatallikudda iti santuario, ket agtamtamedda iti daya nga agdaydayaw iti lumlumgak nga init.

17Kinuna ti Apo kaniak, “Anak ti tao, makitam dayta? Saan a mapnek dagitoy a tattao ti Juda nga agar-aramid kadagiti makarimon a bambanag kas makitam ditoy, ken iti panangisaknapda ti kinaranggas iti entero a pagilian. Wen, saanda a mapnek. Masapul nga umayda ditoy mismo a Templo ket degdeganda ti pungtotko. Kitaem no kasano ti panangpabainda kaniak iti kadaksan a wagas! 18Mariknadanto ti amin a dawel ti pungtotko. Diakto pakawanen wenno kaasian ida. Uray no ipukkawda ti kararagda iti ingga ti kabaelanda, diakto ipangag ida.”

Currently Selected:

Ezekiel 8: RIPV

Highlight

Copy

Compare