Ezekiel 34
34
Dagiti Agpaspastor iti Israel
1Nagsao ti Apo kaniak. 2Kinunana, “Anak ti tao, babalawem dagiti agtuturay iti Israel. Ibagam kadakuada a siak nga Apo a Dios, kastoy ti kunak: ‘Naitudingen ti dusayo, dakayo nga agpaspastor ti Israel. Dagiti la bagbagiyo ti asikasoenyo ngem bay-anyo met dagiti karnero. 3Inumenyo ti gatasda, aramidenyo a badoyo ti duddotda ken partien ken sidaenyo ti kalukmegan a karnero. Ngem pulos a diyo asikasoen dagiti karnero. 4Diyo tinaripato dagiti agkakapsut. Diyo inagasan dagiti masakit. Diyo binedbedan dagiti nadunor. Diyo sinapul dagiti nayaw-awan wenno binirok dagiti napukaw. Naranggaskayo ketdi kadakuada. 5Gapu#Num. 27:17; 1 Ar. 22:17; Mat. 9:36; Mar. 6:34. ta awan ti mangipastor kadagiti karnero, nawarawarada, ket pinatay ken linamut ida dagiti narungsot nga animal. 6Ngarud, nagtawataw dagiti karnerok kadagiti nangato a turod ken kabambantayan. Naiwaraswarasda iti rabaw ti daga ket awan ti nangbirok wenno nangsapul kadakuada.’
7“Ita, dakayo nga agpaspastor, denggenyo ti kunak kadakayo. 8Isapatak iti naganko a Dios a sibibiag a masapul a denggendak: ‘Dinarup dagiti narungsot nga animal dagiti karnerok, ket pinatay ken linamutda ida agsipud ta awan ti mangaywan kadakuada. Saan a binirok dagiti pagpaspastorek dagiti karnero. As-asikasoenda dagiti bagbagida a saan ketdi a dagiti karnerok. 9Ipangagdak ngarud, dakayo nga agpaspastor. 10Siak nga Apo a Dios ipakaammok a siak ti kabusoryo. Alaek dagiti karnerok nga ay-aywananyo ket diakton ipaaywan ida kadakayo. Diakon ipalubos a dagiti laeng bagbagiyo ti asikasoenyo. Ispalek dagiti karnerok tapno diyo lamuten ida.’”
Ti Naimbag a Pastor
11“Siak nga Apo a Dios ibagak kadakayo a siak a mismo ti mangsapul kadagiti karnerok ket siak ti mangaywan kadakuada, 12kas iti panangaywan ti agpaspastor kadagiti nawarawara a karnerona a naummong manen. Alaekto ida kadagiti amin a lugar a nakaiwarawaraanda iti daydi nasipnget ken nakabutbuteng nga aldaw. 13Iruarkonto ida kadagiti ganggannaet a pagilian, ummongekto ida ket isublikto ida iti bukodda a daga. Isublikto ida kadagiti kabambantayan ken kadagiti agay-ayus a danum ti Israel ket ipaarabko ida kadagiti nalangto a karuotan. 14Agarabdanto nga awan pagbutnganda kadagiti bakras ti bantay ken tantanap ken iti amin a nalangto a pagaraban iti daga ti Israel. 15Siakto a mismo ti mangipastor iti arbanko. Ibirokakto ida iti paginanaanda. Siak nga Apo a Dios ti nangibaga iti daytoy.
16“Birokekto dagiti napukaw, yawidkonto dagiti nagtawataw, bedbedakto dagiti nadunor, ken agasakto dagiti masakit. Ngem patayekto dagiti nalukmeg ken nasalun-at agsipud ta maysaak a pastor nga agaramid iti naimbag.
17“Ita ngarud, arbanko, kastoy ti kunak nga Apo a Dios: Ukomekto ti tunggal maysa ket isinakto dagiti naimbag kadagiti dakes, dagiti karnero kadagiti kalding. 18Saan a mapnek ti sumagmamano kadakayo nga agarab kadagiti kasayaatan a ruot. Baddebaddekenyo pay dagiti teddayo. Uminumkayo iti nalitnaw a danum ket libegenyo ti naginumanyo. 19Kapilitan nga araben dagiti dadduma a karnerok ti binaddebaddekyo a ruot ken inumenda ti danum a linibegyo.
20“Ngarud, siak nga Apo a Dios, ibagak kadakayo nga ukomekto dagiti nalukmeg ken dagiti nakuttong a karnero. 21Induronyo dagiti masaksakit ket sinangdosangdoyo ida agingga a nayadayoda iti arban. 22Ngem ispalekto dagiti karnerok ket diakton ipalubos a maparparigatda. 23Itedkonto#Pal. 7:17. kadakuada ni David nga adipenko a pastorda a kakaisuna ket aywanannanto ida. 24Siakto,#Eze. 37:24. ni Yahweh, ti Diosda ket ninto David nga adipenko ti mangituray kadakuada.” Daytoy ti sao ni Yahweh. 25“Makitulagakto kadakuada. Daytoyto ti mangpatalged nga awan ti pakaan-anoanda. Paksiatekto dagiti narungsot nga animal iti daga tapno mapakapagnaed a sitatalged dagiti karnerok iti taltalon ken mabalinda ti maturog iti kabakiran.
26“Bendisionakto ida ket palubosakto ida nga agnaed iti likmut ti nasantoan a turodko. Pagtudoekto iti tiempo a kasapulanda. 27Agbunganto dagiti kayo, adunto ti maapit kadagiti taltalon ket agnaedto a sitatalged ti tunggal maysa iti bukodna a daga. Inton wayawayaak dagiti tattaok kadagiti nangtagabu kadakuada, inton pugsatek dagiti kawarda, maammoandanton a siak ni Yahweh. 28Saanton a samsaman ida dagiti awan diosna a pagilian. Saanto metten a patayen ken lamuten ida dagiti narungsot nga animal. Natalgedto ti panagbiagda ket awanto ti mangbutbuteng kadakuada. 29Ikkakto ida kadagiti nadam-eg a talon ket gibusakton ti bisin iti daga. Saanton a laisen ida dagiti sabali a nasion. 30Maammoanto ti amin a salsalaknibak ti Israel ket isuda dagiti tattaok. Siak nga Apo a Dios ti nangibaga iti daytoy.
31“Dakayo a karnerok, ti arban a tartaraonak, tattaokayo ket siak ti Diosyo,” kuna ti Apo a Dios.
Currently Selected:
Ezekiel 34: RIPV
Highlight
Copy
Compare
Share
Want to have your highlights saved across all your devices? Sign up or sign in
© 1996 Philippine Bible Society
