Ezekiel 32
32
Mayarig ti Ari ti Egipto iti Buaya
1Iti umuna nga aldaw, iti maika-12 a bulan iti maika-12 a tawen, nagsao ti Apo kaniak. 2Kinunana, “Anak ti tao, ballaagam ti ari ti Egipto. Ibagam kenkuana ti saok, ‘Arigmo ti leon iti baet dagiti nasion. Ngem ad-adda a kaskala buaya iti karayan a mangkibkibur iti danum. Libegem ti danum ket rugitam dagiti karayan. 3Inton aguummong ti adu a nasion, sarwagankanto iti iketko. Sakonto bilinen ida a mangisang-at kenka. 4Itinnagkanto iti daga; ipurruakkanto iti tay-ak ket yegkonto amin a tumatayab ken animal iti lubong nga agkaan kenka. 5Makumotanto dagiti bantay ken tanap iti agruprupsa a bangkaymo. 6Ibuyatkonto ti daram agingga a malayus dagiti bantay ket mapno dagiti waig. 7Inton#Is. 13:10; Mat. 24:29; Mar. 13:24-25; Luc. 21:25; Pal. 6:12-13; 8:12. dadaelenka, abbongakto ti tangatang ket saanto nga agraniag dagiti bituen. Maulpanto ti init ket dinto agraniag ti bulan. 8Diakto pagraniagen dagiti amin a silaw ti langit ket pagsipngetekto ti lubongmo.’ Daytoy ti sao ti Apo a Dios.
9“Adunto a nasion ti makigtot inton isaknapko ti damag kadagiti pagilian a dimo pay nadamdamag maipapan iti pannakadadaelmo. 10Makigtotto ti adu a nasion gapu iti aramidek kenka. Inton iwasawasko ti kampilanko, agkullayawto iti buteng dagiti ari. Inton aldaw a pannakarpuogmo, agpigergerdanto amin iti buteng gapu iti mapasamak iti biagda.”
11Kuna ti Apo a Dios iti ari ti Egipto: “Sangoemto ti kampilan ti ari ti Babilonia. 12Bay-akto dagiti mannakigubat a naggapu kadagiti naranggas a nasion a mangasut kadagiti kampilanda tapno patayenda amin a tattaom. Ikisapdanto dagiti amin a pagtangtangsitmo ken amin a tattaom. 13Papatayekto dagiti animalmo iti tunggal igid ti danum. Awanton ti tao wenno animal a manglibeg iti danum. 14Pagarinsaedekto ti danummo ket aglitnawto. Nalinakto ti panagayus dagiti karayanmo. Daytoy ti imbagak, siak nga Apo a Dios. 15Inton paglangalangek ti Egipto ket ikisapko ti amin nga agnaed sadiay, maammoandanto a siak ni Yahweh. 16Agbalinto a dung-aw daytoy a ballaag. Kantaento dagiti babbai nga umili kadagiti nasion a pangdung-awda iti Egipto ken kadagiti amin a tattaona. Siak nga Apo a Dios ti nangibaga iti daytoy.”
Ti Lubong dagiti Natay
17Iti maika-15 nga aldaw, iti umuna a bulan iti maika-12 a tawen, nagsao ti Apo kaniak. 18Kinunana, “Anak ti tao, dung-awam dagiti adu a tattao ti Egipto. Ibaonmo ida iti lubong dagiti natay agraman dagiti dadduma a nabileg a nasion. 19Ibagam kadakuada:
Ipagarupmo nga awan umartap ti kinapintasmo?
Inka agidda iti tanem dagiti awanan Dios.#19 awanan Dios; wenno saan a nakugit.
20“Mairaman a mapasag dagiti Egipcio kadagiti mapapatay iti paggugubatan. Adda kampilan a nakasagana a mangpatay kadakuada amin. 21Mapanto dagiti Egipcio iti lubong dagiti natay ket siaayatto a pasangbayen ida dagiti katurdan a bannuar agraman dagiti kaduada a nakigubat. Ipukkawdanto, ‘Bimmaban dagiti awan diosna a napapatay iti gubat ket ditoy ti pagyananda!’
22“Adda sadiay ti Asiria a nalikmut kadagiti tanem dagiti soldadona a pasig a napapatay iti gubat. 23Adda dagiti tanemda iti kaunggan a paset ti lubong dagiti natay. Napapatay dagiti amin a soldadona iti dangadang ket nalikmut ti tanemna kadagiti tanemda. Isuda idi ti nangisaknap iti buteng iti daga dagiti sibibiag.
24“Adda sadiay ti Elam a nalikmut kadagiti tanem dagiti soldadona. Napapatayda amin iti paggugubatan ket naipababada, a saan a nakugit, iti lubong dagiti natay. Idi sibibiagda, insaknapda ti buteng ngem ita, natay ken naipababadan. 25Naitanem ti Elam kadagiti napapatay iti paggugubatan ket nalikmut kadagiti tanem dagiti soldadona. Saanda a nakugit ken napapatayda amin iti paggugubatan. Idi sibibiagda, insaknapda ti buteng ngem ita, natay ken naipababada. Sagabaenda met ti sagabaen dagiti napapatay iti paggugubatan.
26“Adda sadiay ti Mesec ken ti Tubal a nalikmut kadagiti tanem dagiti soldadoda. Saanda a nakugit ken napapatayda amin iti paggugubatan. Isuda idi ti nangisaknap iti buteng iti daga dagiti sibibiag. 27Saan a nangayed ti pannakaitabonda a kas kadagiti bannuar idi un-unana#27 idi un-unana kuna ti dadduma a patarus. Iti Hebreo, a saan a nakugit. a siaarmas a napan iti lubong dagiti natay. Nagpungananda ti kampilanda ket naiparabaw dagiti kalasagda iti bangkayda. Nabileg idi dagitoy a bannuar a namutbuteng kadagiti sibibiag.
28“Kastanto ti pannakapasag dagiti Egipcio a mairaman kadagiti saan a nakugit a napapatay iti paggugubatan.
29“Adda sadiay ti Edom agraman dagiti ari ken agtuturayna. Nabilegda idi a mannakigubat ngem ita addadan iti lubong dagiti natay a kaduada dagiti saan a nakugit a napapatay iti paggugubatan.
30“Adda sadiay dagiti amin a prinsipe iti amianan kasta met dagiti Sidonio. Ti bilegda idi ti nangisaknap iti buteng ngem ita maipababada a maibabain. Kaduada dagiti napapatay iti paggugubatan ket maitanemda a di nakugit. Mairamanda iti pannakaibabain dagiti maitappuak iti lubong dagiti natay.
31“Pakaragsakanto ti ari ti Egipto ken ti armadana iti pannakakitada amin dagitoy a natay iti paggugubatan,” kuna ti Apo a Dios.
32“Imbaonko ti ari ti Egipto a mangbutbuteng kadagiti sibibiag ngem isu ken ti amin a soldadona mapapataydanto ket maitanemda a mairaman kadagiti amin a di nakugit a matay iti paggugubatan.” Daytoy ti kuna ti Apo a Dios.
Currently Selected:
Ezekiel 32: RIPV
Highlight
Copy
Compare
Share
Want to have your highlights saved across all your devices? Sign up or sign in
© 1996 Philippine Bible Society
