Ezekiel 22
22
Dagiti Basol ti Jerusalem
1Nagsao ti Apo kaniak. 2Kinunana, “Anak ti tao, nakasaganaka kadi a mangukom iti siudad a napno iti mammapatay? Ipakaammom ngarud kenkuana dagiti amin a makarimon nga inar-aramidna. 3Ibagam iti siudad a siak nga Apo a Dios kastoy ti kunak. Gapu ta adu unay ti pinapataymo kadagiti tattaom ken tinulawam ti bagim babaen ti panagdaydayawmo kadagiti didiosen, dumtengen ti kanibusanam. 4Nagbasolka gapu kadagita a panagpapatay, ket natulawanka kadagiti didiosen nga inaramidmo. Iti kasta, dumtengen ti aldawmo ket agpatinggakan! Pinagbalinka a pagang-angawan dagiti nasion ken lalaisen dagiti pagilian. 5Umsiendakanto dagiti ili, asideg man wenno adayo, gapu iti nalabes a kinadakesmo. 6Agtalek dagiti amin a pangulo ti Israel kadagiti bukodda a pigsa ket agpapatayda. 7Awan#Ex. 20:12; Deut. 5:16; Ex. 22:21-22; Deut. 24:17. tao iti siudad nga agraem kadagiti nagannak kadakuada. Saurem dagiti ganggannaet ket gundawayam dagiti balo a babbai ken dagiti ulila. 8Awan#Lev. 19:30; 26:2. panagraemmo kadagiti nasantoan a lugar ket dimo ngilinen ti Aldaw a Panaginana. 9Adda dagiti tattaom nga agsaksi iti ulbod tapno mapapatay ti padada a tao. Mangan ti dadduma kadagiti taraon a naidaton kadagiti didiosen. Adda dagiti kankanayon nga agaramid iti kinaderrep. 10Kaiddaen#Lev. 18:7-20. ti dadduma ti asawa dagiti ammada. Adda met mangpilit a mangkaidda kadagiti babbai a madama nga agkadawyan. 11Adda dagiti makikamalala ken adda met dagiti mangsulisog kadagiti manugangda a babbai, adda pay dagiti mangtulaw kadagiti kakabsatda iti ama wenno kakabsatda iti ina. 12Matangdanan#Ex. 23:8; Deut. 16:19; Ex. 22:25; Lev. 25:36-37; Deut. 23:19. ti dadduma kadakayo tapno agpapatayda. Paanakan ti dadduma ti pautangda kadagiti padada nga Israelita ket bumaknangda iti pananggundawayda kadakuada. Nalipatandak.” Daytoy ti kuna ti Apo a Dios.
13“Ita, dusaenkayo gapu kadagiti panagtakaw ken panagpapataymo. 14Ipagarupmo aya nga addanto mabati a tured ken pigsam a mangingato iti imam no naipapaskon ti pungtotko kenka? Siak, ni Yahweh, ti nagsao ket tungpalekto ti saok. 15Warawaraekto dagiti tattaom ket iwaraskonto ida kadagiti nadumaduma a nasion ken pagilian. Iti kasta, gibusakto ti amin a dakes nga aramidmo. 16Ibabaindakanto dagiti dadduma a nasion, ngem maammoamto a siak ni Yahweh.”
Ti Urno ti Dios
17Kinuna ti Apo kaniak, 18“Anak ti tao, awan serserbi kaniak dagiti Israelita. Kasda la naglalaok a gambang, lata, landok ken buli a natda kalpasan ti pannakagugor ti pirak iti urno. 19Isut' gapuna a siak nga Apo a Dios kunak kadakuada a kasta ti arigda nga awan serserbina. Urnongekto amin ida idiay Jerusalem 20a kas iti pirak, gambang, landok, buli ken lata a maikabil iti urno. Lunagento ida ti napalalo a pungtotko a kas iti pananglunag ti apuy iti metal. 21Wen, ummongekto ida idiay Jerusalem, sungrodakto ida ket lunagekto ida iti pungtotko. 22Malunagdanto idiay Jerusalem a kas iti pannakalunag ti pirak iti urno. Iti kasta, maammoandanto a marikriknada ti pungtotko.”
Ti Basol dagiti Papangulo ti Israel
23Nagsao manen ti Apo kaniak. 24Kinunana, “Anak ti tao, ibagam kadagiti Israelita a saan a nasantoan ti dagada, isu a dusdusaek ida gapu iti pungtotko. 25Arig dagiti papangulo#25 dagiti papangulo kuna ti maysa a kadaanan a patarus. Iti Hebreo, panagtutulag dagiti profetana. dagiti leon a mangngerngernger kadagiti animal a pinatayda. Patayenda dagiti tattao, alaenda amin a kuarta ken sanikua a masarakanda, ket adu a babbai ti mabalo gapu kadakuada. 26Salungasingen#Lev. 10:10. dagiti papadi ti lintegko ket dida raemen ti nasantoan. Saanda a paglasinen ti nasantoan ken ti natulawan ken dida isuro no ania ti paggiddiatan ti nadalus ken saan a nadalus. Dida ngilinen ti Aldaw a Panaginana. Daytoy ti gapuna a didak raemen dagiti Israelita. 27Kasla lobo dagiti ofisiales ti gobierno a mangrangrangkay kadagiti animal a pinapatayda. Agpapatayda tapno bumaknangda. 28Kalkaluban dagiti profeta dagitoy a kinadakes, kas iti bakud a mapintaan iti puraw. Saan nga agpayso dagiti parmata ken padtoda. Ibagada nga agsaoda iti sao ti Apo a Dios, ngem siak ni Yahweh, diak nagsao kadakuada. 29Agsaur ken agtakaw dagiti nabaknang. Idadanesda dagiti napanglaw ket gundawayanda dagiti ganggannaet. 30Nangbirokak iti makabael a mangbangon iti bakud ken mangtarimaan kadagiti narba a paset ti bakud ken mangikaluya iti daga inton dandani agdissuor ti pungtotko. Ngem awan ti nasarakak. 31Isut' gapuna nga idissuorko kadakuada ti pungtotko ket kas iti apuy, dadaelek ida a mamimpinsan gapu kadagiti aramidda.” Daytoy ti kuna ti Apo a Dios.
Currently Selected:
Ezekiel 22: RIPV
Highlight
Copy
Compare
Share
Want to have your highlights saved across all your devices? Sign up or sign in
© 1996 Philippine Bible Society
