Exodo 17

Ti Danum nga Aggapu iti Bato

(Num. 20:1-13)

1Pimmanaw#Num. 20:2-13. ti amin nga Israelita iti let-ang ti Sin. Nagalis-alisda iti nadumaduma a disso kas bilin ni Yahweh. Nagkampoda idiay Refidim ngem awan ti danum sadiay a mabalin nga inumen dagiti tattao. 2Iti kasta, pinabasolda ni Moises. “Ikkannakam iti inumen,” kinunada.

“Apay a pabasolendak?” kinuna ni Moises. “Apay a suotenyo ti Apo?”

3Ngem mawaw unay dagiti tattao ket intuloyda ti nagreklamo. Kinunada, “Apay ngamin nga inruarnakami idiay Egipto? Tapno patayennakami iti waw, agraman dagiti annakmi ken dagiti animalmi?”

4Immawag ni Moises ken ni Yahweh. Kinunana, “Ania ti aramidek kadagitoy a tattao? Kayatdakon a batoen.”

5Kinuna ni Yahweh ken ni Moises, “Mangikuyogka iti sumagmamano a pangulo ti Israel ket umun-unakayo a magna ngem dagiti tattao. Itugotmo ti sarukod nga imbautmo idi iti Karayan Nile. 6Agtakderakto iti imatangyo iti bato iti Bantay Horeb. Ibautmo ti sarukodmo iti bato ket agpussuakto iti danum nga inumen dagiti tattao.”

Kasta ti inaramid ni Moises iti imatang dagiti pangulo ti Israel. 7Napanaganan ti disso iti Massa ken Meriba#7 MASSA KEN MERIBA: “Nagsuotan” ken “Nagsusuppiatan” ti kayatna a sawen iti Hebreo. gapu ta nakisuppiat dagiti Israelita ken sinuotda ni Yahweh idi saludsodenda, “Adda met la ti Apo kadatayo wenno awan?”

Ti Pannakigubat kadagiti Amalekita

8Dimteng dagiti Amalekita ket ginubatda dagiti Israelita idiay Refidim. 9Kinuna ni Moises ken ni Josue, “Pumilika kadagiti lallaki a kaduam a mapan manggubat kadagiti Amalekita inton bigat. Agtakderakto iti tapaw ti turod a nakaiggem iti sarukod nga inted ti Dios.”

10Inaramid ni Josue ti imbilin ni Moises ket napanna ginubat dagiti Amalekita. Simmang-at met da Moises, Aaron ken Hur iti turod. 11No nakangato dagiti takiag ni Moises, mangab-abak dagiti Israelita, ngem no ibabana, dagiti met Amalekita ti mangab-abak. 12Idi maktangan dagiti takiag ni Moises, nangala da Aaron ken Hur iti bato sada inkabil a nagtugawanna idinto a nagsinsinanda nga impangato dagiti imana. Iniggamanda dagiti imana agingga a limnek ti init. 13Kastoy ti panangparmek ni Josue kadagiti Amalekita.

14Kalpasanna,#Deut. 25:17-19; 1 Sam. 15:2-9. kinuna ni Yahweh ken ni Moises, “Isuratmo ti pakasaritaan ti napasamak tapno saan a malipatan. Ibagam ken ni Josue nga ikisapkonto dagiti Amalekita.” 15Nangbangon ni Moises iti altar a pinanagananna iti Yahweh-nissi.#15 Yahweh-nissi, kayatna a sawen, “Ni Yahweh ti Banderak.” 16Kinunana, “Ipangatom ti bandera.#16 bandera, kuna ti maysa a mapattapatta a teksto. Saanto nga agsardeng ni Yahweh a manggubat kadagiti Amalekita!”

Currently Selected:

Exodo 17: RIPV

Highlight

Compare

Copy