Exodo 14
14
Bumallasiw dagiti Israelita iti Nalabaga a Baybay
1Kinuna ni Yahweh ken ni Moises, 2“Pagsubliem dagiti Israelita ta mapanda agkampo iti sango ti Pihahirot iti nagbaetan ti Migdol ken ti Nalabaga a Baybay, iti asideg ti Baal Zefon. 3Ipagarupto ti ari ti Egipto a nayaw-awanda ket napupokda iti let-ang. 4Patangkenekto ti pusona ket kamatennanto ida. Maidaydayawakto iti panangparmekko kenkuana ken iti amin nga armadana. Maammoanto dagiti Egipcio a siak ni Yahweh.” Tinungpal dagiti Israelita ti naibilin kadakuada.
5Idi naibaga iti ari ti Egipto a nakapanawen dagiti Israelita, nagbaliw ti panunotna, kasta met dagiti ofisialesna ket kinunada, “Ania daytoy nga inaramidtayo? Impalubostayo a pumanaw dagiti Israelita ket ita, awandan a tagabutayo!”
6Pinaisagana ti ari ti luganna a pakigubat ken ti armadana. 7Nagrubbuat a kaduana ti amin a lugan a pakigubat agraman dagiti 600 a kasayaatan a lugan nga impanguloan dagiti ofisialesda. 8Pinatangken ni Yahweh ti puso ti ari ket kinamatna dagiti Israelita a pumampanaw a sibaballigi.#8 sibaballigi; wenno babaen iti panangsalaknib ti Apo. 9Sinunson ida ti armada ti Egipto—dagiti amin a kabalio, dagiti lugan a pakigubat, ken dagiti nagkabalio a soldado. Nakamakamda dagiti Israelita iti kampoda iti igid ti Nalabaga a Baybay, iti asideg ti Pihahirot ken Baal Zefon.
10Idi makita dagiti Israelita ti ari ken ti armadana a kumamkamat kadakuada, kasta unay ti butengda ket immawagda ken ni Yahweh.
11Kinunada ken ni Moises, “Apay pay laeng nga inyegnakami a matay ditoy let-ang? Awan aya ti pagitaneman idiay Egipto? Kitaem ti nagbanagan ti panangiruarmo kadakami iti Egipto! 12Sakbay a pimmanawtayo, imbagami kenkan a kastoy ti mapasamak! Kinunami idi a bay-annakami lattan a tagabu dagiti Egipcio. Naim-imbag a tagabukami sadiay ngem ti mataykami ditoy let-ang.”
13Kinuna ni Moises kadakuada, “Dikay agbuteng. Patibkerenyo ti pakinakemyo. Ita nga aldaw, makitayo ti panangisalakan ti Apo kadakayo. Diyonton makita dagiti Egipcio. 14Ti Apo ti makigubat ket awan nasken nga aramidenyo.”
15“Apay nga awagannak?” kinuna ni Yahweh ken ni Moises. “Bilinem dagiti Israelita nga ituloyda ti magna. 16Ilayatmo ta sarukodmo iti baybay. Mabingayto ti danumna tapno mabalin dagiti Israelita ti magna iti namaga a daga. 17Patangkenek iti kasta unay ti puso dagiti Egipcio tapno kamatenda ida. Maidaydayawakto iti panangparmekko iti ari, iti armadana, kadagiti luganna ken kadagiti nagkabalio a soldadona. 18Maammoanto dagiti Egipcio a siak ni Yahweh inton maparmekko ida.”
19Nagpalikud ti anghel ti Dios a magmagna iti sangoanan dagiti Israelita. Immalis met ti monmon nga ulep ket 20nagyan iti nagbaetan ti armada dagiti Egipcio ken dagiti Israelita. Gapu iti ulep, nasipnget ti ayan dagiti Egipcio ngem nalawag ti yan dagiti Israelita,#20 Gapu iti ulep…Israelita. Saan a nalawag daytoy a paset iti Hebreo a teksto. isu a nagpatpatnag a saan a nakapaginnasideg dagiti dua nga armada.
21Inlayat ni Moises ti imana iti baybay. Imbulos ni Yahweh ti napigsa nga angin manipud iti daya. Nagpatpatnag a nagang-angin agingga a nagmaga ti baybay. Nagbisngay ti danum, 22ket#1 Cor. 10:1-2; Heb. 11:29. limmasat dagiti Israelita iti namaga a lansad ti baybay. Nagbalin a pader dagiti danum iti agsumbangir. 23Kinamat ida dagiti Egipcio ken dagiti amin a kabalio ti ari, dagiti lugan ken dagiti nagkabalio a soldadona. Sinurotda ida iti baybay. 24Idi agbannawag, manipud iti monmon nga apuy ken ulep, tinannawagan ni Yahweh ti armada dagiti Egipcio ket pinagkakaribusona ida. 25Tiningalanna#25 Tiningalanna kuna ti dadduma a patarus. Iti Hebreo, Inikkatna. ti pilid dagiti luganda ket narigat ti panaggunayda. Kinuna dagiti Egipcio, “Ti Apo ti kagubgubattayo, saan a dagiti Israelita. Pumanawtayo ditoy!”
26“Ilayatmo ta imam iti baybay tapno agsubli ti danum, ket malapunosto dagiti Egipcio, dagiti luganda ken dagiti nagkabalio a soldadoda,” kinuna ni Yahweh ken ni Moises.
27Inlayat ni Moises ti imana iti baybay ket idi aglawag, nagsubli ti danum iti sigud a kaadalemna. Kayat dagiti Egipcio a malisian ngem linemmes ida ni Yahweh iti baybay. 28Nagsubli ti danum ket nalapunos dagiti lugan, dagiti nagkabalio a soldadona ken amin nga armada ti ari a simmurot kadagiti Israelita iti baybay. Awan ti uray maysa kadakuada a nakalasat. 29Ngem namaga a daga ti nagnaan dagiti Israelita ta nagbalin a pader dagiti danum iti agsumbangir.
30Iti dayta nga aldaw, insalakan ni Yahweh dagiti Israelita kadagiti Egipcio. Nakitada dagiti naiwalang a bangkay dagiti Egipcio iti igid ti baybay. 31Nagbutengda ken ni Yahweh idi nakitada ti dakkel a pannakabalin a pinangparmekna kadagiti Egipcio. Nagtalekda ken ni Yahweh, kasta met ken ni Moises nga adipenna.
Currently Selected:
Exodo 14: RIPV
Highlight
Share
Compare
Copy
Want to have your highlights saved across all your devices? Sign up or sign in
© 1996 Philippine Bible Society
