Exodo 11

Maipakaammo ti Pannakapapatay dagiti Inauna nga Annak

1Kinuna ni Yahweh ken ni Moises, “Maysa laengen a didigra ti yegko iti ari ti Egipto ken kadagiti tattaona ket kalpasanna, palubosannakayton a pumanaw. Kinapudnona, pagtalawennakayto amin. 2Ita, ibagam kadagiti Israelita a dumawatda iti pirak ken balitok nga alahas iti kaarrubada.” 3Intan-ok ni Yahweh dagiti Israelita ket nagraem kadakuada dagiti Egipcio. Kinaagpaysona, imbilang dagiti ofisiales ken dagiti tattao a natan-ok unay ni Moises.

4Kinuna ni Moises iti ari, “Kastoy ti paibaga ti Apo: ‘Inton tumengnga ti rabii, sursorekto ti Egipto. 5Matayto dagiti amin nga inauna nga annak a lallaki iti amin a paset ti Egipto, manipud iti anak ti ari nga agtawid iti tronona agingga iti anak ti tagabu a babai a para giling. Matayto met ti inauna nga anak dagiti amin nga animal. 6Iti entero nga Egipto, addanto napigsa a dung-aw a di pay nangnangngeg idi wenno mangngeganto manen. 7Ngem awanto ti uray aso a mangtaul kadagiti Israelita wenno animalda tapno maammoanyo a dusaek dagiti Egipcio idinto a bendisionak dagiti Israelita.’” 8Inggibus ni Moises, “Umayto kaniak dagitoy ofisialesmo ket agrukbabdanto iti sangoanak. ‘Pumanawkayo, sika ken dagiti amin a tattaom!’ ipukkawdanto. Kalpasan dayta, pumanawakto.”

Ket sipupungtot ni Moises a nangpanaw iti ari.

9Kinuna ni Yahweh ken ni Moises, “Dinakanto ipangag ti ari tapno maaramidko ti ad-adu pay a milagro iti daytoy a daga.” 10Inaramid da Moises ken Aaron amin dagitoy a milagro iti sangoanan ti ari. Ngem pinatangken ni Yahweh ti puso ti ari ket dina pinalubosan dagiti Israelita a pumanaw iti pagilianna.

Currently Selected:

Exodo 11: RIPV

Highlight

Compare

Copy