1 Ar-ari 8
8
Maiserrek ti Lakasa ti Tulag iti Templo
(2 Cron. 5:2–6:2)
1Pinaayaban#2 Sam. 6:12-16; 1 Cron. 15:25-29. ni Ari Solomon dagiti panglakayen ti Israel, dagiti pangulo dagiti tribu ken dagiti familia tapno mapanda kenkuana idiay Jerusalem. Mapanda alaen ti Lakasa ti Tulag ni Yahweh idiay Sion a Siudad ni David ket ipanda iti Templo. 2Immayda#Lev. 23:34. amin iti Fiesta dagiti Abong-abong, iti bulan ti Etanim, ti maikapito a bulan. 3Idi nagummong dagiti amin a panglakayen, innala dagiti papadi ti Lakasa ti Tulag. 4Babaen iti tulong dagiti Levita, binagkat ti lakasa agraman ti Tolda ti Dios ken amin nga alikamenna, ket impanda iti Templo. 5Naguummong da Ari Solomon ken dagiti amin nga Israelita iti sangoanan ti Lakasa ti Tulag. Nagidatonda iti adu a karnero ken baka—nakaad-adu ket saan a mabilang. 6Kalpasanna, inserrek dagiti papadi ti Lakasa ti Tulag iti Templo, ket impanda iti Kasasantoan a Disso iti baba dagiti payak dagiti kerubim. 7Siuukrad dagiti payak dagiti kerubim ket linlinonganda ti lakasa ken dagiti assiwna. 8Nakaat-atiddog dagiti assiw isut' gapuna a makita dagiti murdongda iti masungad a kuarto iti sangoanan ti akin-uneg a santuario. Ngem saan ida a makita iti ruar. Addada pay la sadiay kadagitoy nga aldaw. 9Awan#Deut. 10:5. karga ti Lakasa ti Tulag malaksid dagiti dua a tapi ti bato nga inkabil ni Moises idiay Bantay Sinai, ti bantay a nakitulagan ni Yahweh kadagiti Israelita idi rummuarda idiay Egipto.
10Idi#Ex. 40:34-35. rummuar dagiti papadi iti Templo, pagammoan ta adda ulep a nangin-inut a nangpunno iti Templo. 11Saan a makastrek dagiti papadi iti Templo tapno aramidenda dagiti annongda gapu ta napno ti Templo iti dayag ni Yahweh. 12Kalpasanna,#Sal. 18:11; 97:2. nagkararag ni Solomon:
“Sika, O Apo, ti nangisaad iti init iti tangatang,#12 Sika…tangatang, kuna ti maysa a kadaanan a patarus. Awan dagitoy a balikas iti Hebreo.
ngem pinilim ti agnaed iti ulep ken sipnget.
13Ita, nangbangonak iti nadaeg a templo
a taengmo iti agnanayon.”
Ti Mensahe ni Solomon kadagiti Tattao
(2 Cron. 6:3-11)
14Bayat ti panagtakder dagiti amin a tattao sadiay, sinango ni Solomon ida ket dinawatna iti Dios a bendisionanna ida. 15Kinunana, “Madaydayaw ti Apo a Dios ti Israel! Tinungpalna ti inkarina ken ni amak a David idi imbagana kenkuana, 16‘Manipud#2 Sam. 7:4-11; 1 Cron. 17:3-10. idi inruarko dagiti tattaok nga Israelita idiay Egipto, awan ti pinilik a siudad iti entero nga Israel a rumbeng a pakabangonan ti templo a pakaidaydayawak. Ngem pinilika, David, a mangituray kadagiti tattaok.’”
17Ket#2 Sam. 7:1-3; 1 Cron. 17:1-2. intuloy ni Solomon, “Panggep idi ni amak a David ti mangbangon iti templo a pagdaydayawan iti Apo a Dios ti Israel. 18Ngem kinuna ti Apo kenkuana, ‘Napintas ti tarigagaymo a mangipatakder iti templok, 19ngem#2 Sam. 7:12-13; 1 Cron. 17:11-12. saanto a sika ti mangbangon. Tinto mismo nga anakmo ti mangbangon iti templok.’ 20Ita, tinungpalen ti Apo ti inkarina. Siak ti naisaad nga ari ti Israel a sukat daydi amak a David ket binangonko ti Templo a pagdaydayawan iti Apo a Dios ti Israel. 21Nangitudingak met iti maysa a lugar iti uneg ti Templo a pakaikabilan ti Lakasa ti Tulag a nakaidulinan dagiti tapi ti bato a nakailanadan ti katulagan ti Apo kadagidi kapuonantayo idi inruarna ida idiay Egipto.”
Ti Kararag ni Solomon
(2 Cron. 6:12-42)
22Iti imatang dagiti tattao, napan nagtakder ni Solomon iti sango ti altar. Intayagna dagiti imana 23ket inkararagna: “O Apo a Dios ti Israel, awan ti Dios a kas kenka sadi langit wenno ditoy daga! Tungpalem ti katulagan kadagiti tattaom. Ipakitam ti di agbalbaliw nga ayatmo kadagiti agtulnog kenka iti amin a pusoda. 24Tinungpalmo ti inkarim ken ni amak a David nga adipenmo ket ita nga aldaw, tinungpalmo ti saom. 25Ita,#1 Ar. 2:4. O Apo a Dios ti Israel, dawatek a tungpalem met ti sabali pay nga inkarim ken ni amak a David idi imbagam kenkuana, ‘Addanto latta kaputotam a dutokak a kas ari ti Israel, no la ket kas kenka nga agtalinaed a napudno kaniak.’ 26Ngarud, O Dios ti Israel, dawatek a tungpalem daytoy a karim ken ni amak a David nga adipenmo.
27“Ngem#2 Cron. 2:6. pudno kadi, O Dios, nga agnaedka ditoy daga? No bassit ti langit ket dinaka malaon, kasano a malaonnaka daytoy Templo a binangonko? 28Nupay kasta, ipangagmo koma ti kararag ken asugko, O Apo a Diosko. Denggem ti asugko ken ti kararagko kenka ita nga aldaw. 29Bantayam#Deut. 12:11. daytoy a Templo iti aldaw ken rabii, daytoy a disso a pinilim a pagdaydayawan kenka dagiti tattao. Denggennak bayat ti panagkararagko iti Templo. 30Ipangagmo dagiti kararagko ken dagiti kararag dagiti tattaom no agkararagda kenka iti daytoy a disso. Iti taengmo dita langit, ipangagnakami ket pakawanennakami.
31“No mapabasol ti maysa a tao a nakaaramid iti dakes iti padana a tao ket maidatag iti altarmo iti daytoy a Templo tapno agsapata nga awan ti basolna, 32dumngegka, O Apo, dita langit ket usigem dagiti adipenmo. Dusaem ti nakabasol a kas kaikarianna ket absueltoem ti awan basolna.
33“No parmeken ti kabusor dagiti tattaom nga Israelita gapu ta nagbasolda kenka ngem agsublida kenka, agdaydayawda kenka ken agkararagda ditoy Templo ket agdawatda iti pammakawan, 34ipangagmo koma dita langit nga ayanmo. Pakawanem dagiti tattaom ket isublim ida iti daga nga intedmo kadagiti kapuonanda.
35“No dimo pagtudoen gapu ta nagbasol kenka dagiti tattaom, ngem agbabawida, sumangoda iti daytoy a Templo, ket sipapakumbabada nga agkararag kenka, 36ipangagmo koma ida dita langit nga ayanmo. Pakawanem dagiti basol ti ari ken dagiti Israelita. Isurom koma ida iti tumutop a panagbiagda ket pagtudoem iti daga nga impatawidmo kadagiti tattaom.
37“No adda bisin iti daga wenno angol wenno dadaelen ti napudot nga angin dagiti mula wenno iggesen dagitoy wenno ibusen ti pangen ti dudon, wenno rauten dagiti kabusor dagiti tattaom wenno adda aniaman a didigra wenno sakit a mapagtengda, 38ipangagmo koma ti kararagda. No adda kadagiti tattaom ti naimpusoan ti panagbabawina ket yunnatna ti imana nga agkararag iti daytoy a Templo, 39ipangagmo koma ti kararagna. Ipangagmo koma ida dita langit a taengmo. Pakawanem koma ida ket agtignayka. Siksika ti makaammo iti panunot ti tao. Aramidem iti tunggal tao ti kas iti maikari iti aramidna 40tapno agbuteng kenka dagiti tattaom iti unos ti panagbiagda iti daga nga intedmo kadagiti kapuonanmi.
41-42“No adda ganggannaet iti adayo a daga a makadamag iti kinatan-okmo ken kadagiti naindaklan nga aramid nga impaaymo kadagiti tattaom ket umay agdaydayaw ken agkararag kenka iti daytoy a Templo, 43ipangagmo koma ti kararagna. Ipangagmo koma dita langit a taengmo ket patgam ti dawatna kenka tapno maammoan ken agbuteng dagiti amin a tattao ditoy lubong a kas iti panagbuteng kenka dagiti tattaom. Maammoandanto a daytoy a Templo a binangonko ti lugar a pagdaydayawan kenka.
44“No bilinem dagiti tattaom a gubatenda dagiti kabusorda, ket agkararagda a sisasango iti daytoy a siudad a pinilim ken iti daytoy a Templo a binangonko nga agpaay kenka, 45ipangagmo koma ti kararagda. Ipangagmo koma ida dita langit ket pagballigiem ida.
46“No agbasol kenka dagiti tattaom ta awan met ti tao a di agbasol—ket gapu iti pungtotmo, ipalubosmo a parmeken ida dagiti kabusorda ken italawda ida a kas balud iti sabali a daga, asideg man wenno adayo, 47ipangagmo koma ti kararag dagiti tattaom. Iti dayta a daga, no agbabawi ken agkararagda ket ipudnoda kenka ti kinamanagbasol ken kinadakesda, ipangagmo koma, O Apo, dagiti kararagda. 48Iti dayta a daga, no napudno ken napasnek ti panagbabawida ket agkararagda a sumango iti daytoy a daga nga intedmo kadagiti kapuonanda, iti daytoy a siudad a pinilim ken iti daytoy a Templo a binangonko nga agpaay kenka, 49ipangagmo koma ngarud ti kararagda. Ipangagmo koma ida dita langit a taengmo ket kaasiam ida. 50Pakawanem koma dagiti amin a basolda ken ti ibubusorda kenka. Ipamuspusam a kaasian ida dagiti kabusorda. 51Tattaom ida nga inruarmo idiay Egipto, iti dayta gumilgil-ayab nga urno.
52“O Apo Dios, paraburam koma a kanayon dagiti tattaom nga Israelita ken ti arida ket ipangagmo ti kararagda no agpatulongda kenka. 53Pinilim ida kadagiti amin a tattao tapno agbalinda a tattaom kas impakaammom ken ni Moises nga adipenmo idi inruarmo dagiti kapuonanmi idiay Egipto.”
Ti Paggibusan ti Kararag ni Solomon
54Nakaparintumeng ni Solomon a sitatayag dagiti imana. Kalpasan ti panagkararagna ken ni Yahweh, timmakder iti sangoanan ti altar ket 55iti napigsa a timek, dinawatna a bendisionan ti Dios dagiti amin a tattao a naummong sadiay. Kinunana, 56“Madaydayaw#Deut. 12:10; Jos. 21:44-45. ti Apo a nangted iti kappia kadagiti tattaona kas inkarina. Tinungpalna amin a naparabur a karina nga imbagana ken ni Moises nga adipenna. 57Adda koma kadatayo ti Apo a Diostayo a kas iti kaaddana idi kadagiti kapuonantayo. Sapay koma ta dinatay panawan wenno baybay-an. 58Isuronatayo koma nga agtulnog kenkuana tapno agbiagtayo a kanayon a kas iti kayatna a panagbiagtayo ket tungpalentayo dagiti bilin ken linteg nga intedna kadagiti kapuonantayo. 59Sapay koma ta iti amin a tiempo, laglagipen ti Apo a Diostayo dagitoy a dawatko kenkuana. Sapay koma ta kaasianna a kanayon dagiti tattaona nga Israelita ken ti arida, kas mayannatup iti kasapulanda iti inaldaw. 60Iti kasta, maammoanto dagiti amin a pagilian ditoy lubong a ti Apo laeng ti Dios—awanen sabali. 61Ngarud, agtalinaedkayo koma, dakayo a tattaona, a napudno iti Apo a Diostayo. Tungpalenyo dagiti bilin ken lintegna a kas iti aramidenyo ita nga aldaw.”
Maikonsagrar ti Templo
(2 Cron. 7:4-10)
62Kalpasanna, nangidaton ni Ari Solomon ken dagiti amin a tattao sadiay iti sakrifisio ken ni Yahweh. 63Nangidatag ni Solomon iti 22,000 a toro a baka ken 120,000 a karnero a kas daton a pakikappia. Kastoy ti panangikonsagrar ti ari ken dagiti amin a tattao iti Templo a pagdaydayawan ken ni Yahweh. 64Iti dayta met la nga aldaw, indaton ti ari ti tengnga ti paraangan iti sango ti Templo. Sadiay, nangidaton kadagiti animal a mapuoran a sibubukel iti altar, daton a makan ken ti taba dagiti animal para iti daton a pakikappia. Inaramidna daytoy ta bassit ti bronse nga altar iti paraangan ti Templo ket saan a malaon amin dagitoy a daton.
65Sadiay, rinambakan ni Solomon ken dagiti amin a tattao ti Israel ti Fiesta dagiti Abong-abong. Dimmar-ay dagiti amin nga Israelita manipud Bessang ti Hamat iti amianan agingga iti beddeng ti Egipto iti abagatan. Pito#65 Pito, kuna ti maysa a kadaanan a patarus; iti Hebreo, sangapulo ket uppat. nga aldaw ti rambak. 66Iti maikawalo nga aldaw, pinagawid ni Solomon dagiti tattao. Dinaydayawda ti ari ket siraragsakda a pimmanaw gapu kadagiti amin a naimbag a banag nga impaay ni Yahweh ken ni David nga adipenna ken kadagiti tattaona nga Israelita.
Currently Selected:
1 Ar-ari 8: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society
