1 Ar-ari 6

Bangonen ni Solomon ti Templo

1Rinugian ni Solomon a bangonen ti Templo iti maikadua a bulan a maaw-awagan iti Zif, iti maikapat a tawen a panagturayna iti Israel. Maika-480 a tawen idin kalpasan ti ipapanaw dagiti Israelita idiay Egipto. 2Kastoy ti rukod ti uneg ti Templo: 90 a kadapan ti kaatiddogna, 30 a kadapan ti kaakabana ken 45 a kadapan ti kangatoan. 3Akaba a kas iti santuario ti kuarto iti pagserkan. Sangapulo ket lima a kadapan ti kaunegna ken 30 a kadapan ti kaakabana. 4Adda sinan-tawa dagiti bakud ti Templo; nail-ilet ti akinruar ngem ti akin-uneg. 5Adda patakder a naikamang iti akinruar a bakud iti agsumbangir a sikigan ken iti likudan ti Templo. Tallo a katukad ti kangato ti tunggal patakder—7 1/2 a kadapan ti tunggal tukad. 6Pito ket gudua a kadapan ti kaakaba ti tunggal kuarto iti akimbaba a tukad, siam a kadapan iti akintengnga, ken 10 1/2 a kadapan iti kangatoan. Uming-ingpis ti bakud ti Templo iti tunggal tukad tapno agsadag dagiti kuarto iti bakud ket saanen a maiseksek dagiti pasanggir iti bakud.

7Iti kabambantayan ti nakaisaganaan dagiti bato tapno awan a pulos ti mangngeg a pak-ol ti martilio, wasay wenno aniaman a landok a remienta bayat ti pannakabangon ti Templo.

8Adda iti akin-abagatan a bangir ti Templo ti ruangan ti akimbaba a tukad. Adda dagiti agdan nga agturong iti maikadua, kasta met iti maikatlo a tukad. 9Idi malpas ti Templo, naikabil dagiti busoran ket nabobedaan kadagiti tabla a sedro. 10Dagiti tallo a kadsaaran—7 1/2 a kadapan ti tunggal kadsaaran—ket naikamang iti akinruar a bakud ti Templo babaen kadagiti busoran a sedro.

11Kinuna ni Yahweh ken ni Solomon, 12“No tungpalem ti amin a linteg ken bilinko, aramidekto kenka daydi inkarik ken ni amam a David. 13Agnaedakto iti sidong dagiti tattaok nga Israelita, iti daytoy a Templo a bangbangonem, ket pulos a diak baybay-an ida.”

14Lineppas ngarud ni Solomon ti panangbangonna iti Templo.

Dagiti Arkos iti Uneg ti Templo

(2 Cron. 3:8-14)

15Nakalupkopan ti akin-uneg a diding kadagiti tabla a sedro, manipud suelo agingga iti bobeda. Saleng ti suelona. 16Adda#Ex. 26:33-34. akin-uneg a kuarto a naaramid iti kaunegan a paset ti Templo. Maawagan daytoy iti Kasasantoan a Disso. Tallopulo a kadapan ti katayagna ket nadibisionan kadagiti tabla a sedro manipud suelo agingga iti bobeda.#16 bobeda, kuna ti maysa a kadaanan a patarus; iti Hebreo, bakud. 17Innem a pulo a kadapan ti kaatiddog ti masungad a santuario. 18Nakitikitan dagiti tabla a sedro kadagiti sinan-busel ken sinan-sabong. Tinapkalanda ti akin-uneg a diding kadagiti tabla a sedro isut' gapuna nga awan ti makita a bato kadagiti bakud ti Templo.

19Iti akinlaud a paset ti Templo, naaramid ti akin-uneg a kuarto a pakaikabilan ti Lakasa ti Tulag ni Yahweh. 20Tallopulo a kadapan ti kaatiddog, 30 a kadapan ti kaakaba ken 30 a kadapan ti kangato ti akin-uneg a santuario a nakalupkopan amin iti puro a balitok. Nadidingan met ti altar kadagiti tabla a sedro. 21Nakalupkopan iti balitok ti uneg ti Templo. Adda kawar a balitok a naibanteng iti ruangan ti akin-uneg a kuarto a nakalupkopan met iti balitok. 22Nakalupkopan#Ex. 30:1-3. iti balitok ti entero nga uneg ti Templo, kasta met ti altar iti akin-uneg a kuarto.

23Naaramid#Ex. 25:18-20. ti dua a sinan-kerubim iti kayo nga olibo ket naikabil iti Kasasantoan a Disso. Agtayag iti 15 a kadapan ti tunggal maysa. 24-26Agpadada iti katayag ken forma. Dua ti payak ti tunggal maysa ket 7 1/2 a kadapan ti kaatiddog ti maysa a payak, isu a 15 a kadapan ti nagbaetan dagiti murdong dagiti payak. 27Nagabayda iti Kasasantoan a Disso ket agsinnagid ti dua kadagiti siuukrad a payakda iti tengnga ti kuarto, dumanon met dagiti dua a payak kadagiti agsumbangir a bakud. 28Nakalupkopan iti balitok dagiti dua a sinan-kerubim.

29Naarkosan dagiti diding ti masungad a kuarto kadagiti nakitikitan nga imahen dagiti kerubim, kaykayo a palma ken sabsabong. 30Uray ti suelo, nakalupkopan iti balitok.

31Dua a panid ti rikep ti ridaw ti Kasasantoan a Disso. Naaramidda iti kayo ti olibo. Nagarko ti ngatoen ti ridaw. 32Nakitikitan dagiti rikep ti ridaw kadagiti imahen dagiti kerubim, kayo a palma ken sabsabong. Nakalupkopan iti balitok dagiti panid ti ridaw, dagiti kerubim ken kaykayo a palma. 33Naaramid iti kayo nga olibo ti bastidor ti ridaw a sumrek iti dakkel a kuarto. 34Dua a kanaig a kayo a saleng ti rikep ti ridaw. Agkupin dagitoy ket 35naarkosanda kadagiti nakitikitan a imahen dagiti kerubim, kaykayo a palma ken sabsabong nga agpapada ti kapuskol ti naikalupkop a balitok.

36Adda akin-uneg a paraangan iti sango ti Templo. Nalikmut daytoy iti bakud a naaramid iti batbato ken tabla a sedro. Naibaet ti pedaso ti sedro, iti tunggal tallo a katuon a bato.

37Naipasdek ti fondasion ti Templo iti maikapat a tawen a panagturay ni Solomon iti maikadua a bulan ti Zif. 38Iti maika-11 a tawen a panagturay ni Solomon, iti maika-8 a bulan ti Bul, nalpas ti Templo kas mayannurot iti plano. Pito a tawen a binangon ni Solomon ti Templo.

Currently Selected:

1 Ar-ari 6: RIPV

Highlight

Copy