1 Ar-ari 2
2
Ti Maudi a Bilin ni David ken ni Solomon
1Idi dandani matayen ni David, inayabanna ni Solomon nga anakna ket intedna dagiti maudi a bilinna: 2“Asidegen ti innak panaginana. Bumilegka ket ipakitam a malalakika. 3Aramidem dagiti pagrebbengam iti Apo a Diosmo. Tungpalem amin a linteg ken bilinna a kas nailanad iti Linteg ni Moises tapno agballigika iti amin nga aramidmo iti uray sadino a papanam. 4No aramidem daytoy, tungpalento ti Apo ti karina idi imbagana kaniak nga agturayto dagiti kaputotak iti Israel no la ket naannadda nga agtulnog kadagiti bilinko iti amin a puso ken kararuada.
5“Adda#2 Sam. 3:27; 2 Sam. 20:10. pay sabali nga ibilinko. Malagipmo ti inaramid kaniak ni Joab? Pinatayna dagiti dua a kapitan ti armada ti Israel—ni Abner nga anak ni Ner ken ni Amasa nga anak ni Jeter. Ammom a pinatayna ida iti tiempo ti talna a kas panagibalesna kadagiti panagpapatayda idi tiempo ti gubat. Pinatayna dagiti awan basolna;#5 awan basolna, kuna ti dadduma a kadaanan a patarus. Iti Hebreo, mannakigubat a lallaki. ita, siak ti agikaro iti inaramidna ket agsagabaak.#5 siak ti agikaro…ket agsagabaak, kuna ti dadduma a patarus. Iti Hebreo, isu ti agikaro…ket agsagsagaba. 6Ammomon ti aramidem. Masapul a nadawel ti ipapatayna.
7“Ngem#2 Sam. 17:27-29. kaasiam koma dagiti annak ni Barsillai a taga-Galaad. Aywanam ida. Ngamin, naimbagda kaniak idi itartarayak daydi kabsatmo nga Absalom.
8“Dakes#2 Sam. 16:5-13; 19:16-23. ti inaramid kaniak ni Simei nga anak ni Gera a taga-Bahurim iti sakup ti Benjamin. Inlunodnak iti daydi nga aldaw nga ipapanko idiay Mahanaim ngem idi masabatnak iti Karayan Jordan, insapatak kenkuana a diak papapatay. 9Nupay kasta, dusaem a dusaen. Ammom ti aramidem ket masapul a papapataymo.”
Matay ni David
10Natay ni David ket naitabon iti Siudad ni David. 11Uppat#2 Sam. 5:4-5; 1 Cron. 3:4. a pulo a tawen a nagari iti Israel. Pito a tawen a nagturay idiay Hebron ken 33 a tawen idiay Jerusalem.
12Nagari#1 Cron. 29:23. ni Solomon a sukat ni amana a David, ket natalged ti panagturayna iti pagarian.
Matay ni Adoniha
13Napan ni Adoniha nga anak ni Haggit ken ni Batseba nga ina ni Solomon. “Nasayaat kadi ti panggepmo nga immay?” sinaludsod ni Batseba.
“Wen,” insungbat ni Adoniha 14sana innayon, “Adda koma dawatek kenka.”
“Ania dayta?” sinaludsod ni Batseba.
15Kinuna ni Adoniha, “Ammom a siak koma ti nagari kas ninamnama ti amin iti Israel. Ngem sabali ti naaramid ta ni kabsatko ti nagari ta isu ti pagayatan ti Apo. 16Ita, adda kiddawek kenka ket dinak koma paayen.”
“Ania ti kiddawem?” sinaludsod ni Batseba.
17Kinuna#1 Ar. 1:3-4. ni Adoniha, “Ipakpakaasim ken ni Ari Solomon nga itedna nga asawak ni Abisag a Sunamita. Ammok a dinaka paayen.”
18“Ala wen,” insungbat ni Batseba. “Bay-am ta siak ti makisao iti ari.”
19Napan ni Batseba ken ni Ari Solomon tapno ibagana ti dawat ni Adoniha. Timmakder ti ari a nangkablaaw ken ni Batseba ket nagtamed ken ni inana. Nagtugaw iti tronona sa nagpaala iti pagtugawan ni inana. Nagtugaw ni Batseba iti makannawanna. 20Kinuna ni Batseba, “Adda la bassit kiddawek kenka. Dinak koma paayen.”
“Ania ti kiddawenyo?” sinaludsodna. “Dikayo mabalin a paayen.”
21Kinuna ni Batseba, “Itedmo koma ni Abisag nga asawaen ni kabsatmo nga Adoniha.”
22“Apay a kiddawem kaniak nga itedko ni Abisag ken ni Adoniha?” sinaludsod ti ari. “Kasla metten kiniddawmo nga itedko met kenkuana ti trono. Total, isu ti inauna a kabsatko ket kaduana pay ni Abiatar a padi ken ni Joab!”#22 kaduana pay ni Abiatar a padi…Joab kuna ti sumagmamano a kadaanan a patarus. Iti Hebreo, (kiddawem pay nga itedko kenkuana ti trono) ken ni Abiatar a padi ken ni Joab. 23Kalpasanna, insapata ni Solomon, “Gapu ta kiniddaw ni Adoniha daytoy, ti biagna ti pagbayadna. Patayennak ti Dios no diak aramiden daytoy! 24Natalged ti panangisaad ti Apo kaniak iti trono ni David nga amak. Tinungpalna ti karina ket intedna ti pagarian kaniak ken kadagiti kaputotak. Isapatak iti imatang ti sibibiag nga Apo a mapapatay ni Adoniha ita met la nga aldaw!”
25Binilin ni Ari Solomon ni Benaias. Rimmuar ni Benaias ket pinatayna ni Adoniha.
Mapagtalaw ni Abiatar
26Kinuna#2 Sam. 15:24; 1 Sam. 22:20-23. ni Ari Solomon ken ni Abiatar a padi, “Agawidka idiay ilim nga Anatot. Rumbeng a matayka, ngem dikan papapatay gapu ta inay-aywanam ti Lakasa ti Tulag ti Apo idi panawen ni David nga amak ken gapu ta nakipagrigrigatka kenkuana iti amin a nagpasaranna.”
27Iti#1 Sam. 2:27-36. kasta, inikkat ni Solomon ni Abiatar a kas padi ni Yahweh. Natungpal ngarud ti sao ni Yahweh idiay Silo maipapan ken ni Eli a padi ken dagiti kaputotanna.
Mapapatay ni Joab
28Idi nadamag ni Joab ti napasamak, nagkamang iti Tolda ti Dios ket kimpet kadagiti sinan-sara iti nagsusulian ti altar. (Inayonanna ni Adoniha ngem dina kinanunongan ni Absalom.) 29Idi maammoan ni Solomon a naglemmeng ni Joab iti nasagradoan a Tolda ket adda iti altar, nangibaon iti mapan mangsaludsod kenkuana no apay a nagkamang sadiay. Imbaga ni Joab a nagkamang ken ni Yahweh agsipud ta mabuteng ken ni Solomon. Ngarud, binaon ni Solomon ni Benaias a mapanna patayen ni Joab. 30Napan ni Benaias iti nasagradoan a Tolda ket kinunana ken ni Joab, “Imbilin ti ari a rummuarka.”
“Diak kayat,” insungbat ni Joab. “Matayak ditoy.”
Nagsubli ni Benaias iti ari ket impakaammona ti imbaga ni Joab.
31“Aramidem ti pagayatanna,” insungbat ni Solomon. “Patayem samo itabon. Iti kasta, saanen a siak ken ti familiak ti agikaro iti panangpatayna kadagiti tattao nga awan basolna. 32Dusaen ti Apo ni Joab gapu kadagitoy nga inaramidna a dina impakaammo ken ni amak a David. Pinatayna ti dua a lallaki a naim-imbag ngem isu: ni Abner a kapitan ti armada ti Israel ken ni Amasa a kapitan ti armada ti Juda. 33Agdissuor ken ni Joab ken kadagiti kaputotanna ti agnanayon a pannakadusada gapu kadagitoy nga inaramidna. Ngem kanayon a pagballigien ti Apo dagiti kaputotan ni David nga agtugaw iti tronona.”
34Napan ngarud ni Benaias iti nasagradoan a Tolda ket pinatayna ni Joab. Naitabon ni Joab iti balayna iti away. 35Kas sukat ni Joab, insaad ti ari ni Benaias a kapitan ti armada. Insaadna met ni Zadok a padi iti lugar ni Abiatar.
Matay ni Simei
36Pinaayaban ti ari ni Simei ket kinunana kenkuana, “Agpatakderka iti balaymo ditoy Jerusalem. Agnaedka ditoy ket dika pumampanaw iti siudad. 37No pumanawka ket mapanka iti labes ti Waig ti Kidron, awan duadua a matayka ket sikanto met la ti akimbasol.”
38“Aramidek ti ibagam, Natan-ok nga Ari,” insungbat ni Simei. Nabayag a nagnaed ni Simei idiay Jerusalem.
39Ngem kalpasan ti tallo a tawen, dua kadagiti tagabuna ti nagtalaw ket nagkamangda ken ni Aquis nga ari ti Gat ken anak ni Maaca. Idi madamag ni Simei nga addada idiay Gat, 40sinilyaanna ti asnona ket napan ken ni Ari Aquis tapno sapulenna dagiti tagabuna. Nasarakanna ida ket inyawidna ida.
41Idi nadamag ni Solomon ti inaramid ni Simei, 42pinaayabanna ket kinunana kenkuana, “Pinagkarika idi a dika pumampanaw ditoy Jerusalem. Binallaaganka a no rummuarka iti siudad, awan duadua ti pannakapapataymo. Dimo met aya imbaga a tungpalem daytoy? 43Apay ngarud a dimo tinungpal ti karim ket sinalungasingmo ti bilinko? 44Ammom ti amin a kinadakes nga inaramidmo iti daydi amak a David. Dusaennaka ti Apo iti daytoy. 45Ngem bendisionannak ti Apo ket ipasdekna a sitatalged iti agnanayon ti pagarian ni David.”
46Binilin ti ari ni Benaias. Rimmuar ni Benaias ket napanna pinatay ni Simei. Naan-anayen ti kinatalged ti panangituray ni Solomon iti pagarian.
Currently Selected:
1 Ar-ari 2: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society
