1 Ar-ari 10
10
Bisitaen ti Reyna ti Seba ni Solomon
(2 Cron. 9:1-12)
1Nagdindinamag#Mat. 12:42; Luc. 11:31. ni Solomon ket naammoan ti reyna ti Seba ti maipapan kenkuana. Ngarud, nagdaliasat a napan idiay Jerusalem tapno tingitingenna ti kinasirib ti ari babaen kadagiti narikut a salsaludsod. 2Nangikuyog iti adu a tagabu agraman bunggoy ti kamelio a nagkarga kadagiti bangbanglo, alahas ken adu a balitok. Idi addan iti sangoanan ni Solomon, sinaludsodna kenkuana ti amin a saludsod a mapanunotna. 3Nasungbatan ni Solomon ti amin a saludsod; awan ti narigat kenkuana nga ilawlawag. 4Kasta unay ti panagdayaw ti reyna iti nagpaiduma a kinasirib ni Solomon. Nakitana ti palasio a binangonna, 5ti taraon nga idasdasarna, dagiti ofisiales nga agserserbi iti tronona, ti kinalaing dagiti adipenna nga agserbi ken ti nadaeg a pagan-anayda, dagiti para-serbi iti arak, ken dagiti daton a mapuoran nga idatdatagna iti Templo. Masmasdaaw a nakakita amin kadagitoy ket kasta unay ti panagdayawna. 6Kinunana iti ari, “Pudno ti nadamagko idi addaak iti dagak maipapan kenka ken iti kinasiribmo! 7Ngem narigatko a patien agingga nga immayak ket mismo a napaneknekak. Ngem kurang pay a kaguduana laeng ti nadamagko; nasirsirib ken nabakbaknangka nga adayo ngem iti nadamagko. 8Naggasat ketdin dagiti assawam!#8 assawam: Iti Hebreo, tattaom. Ket naggasat ketdin dagiti adipenmo a kanayon a makangngeg kadagiti nainsiriban a saom. 9Madaydayaw koma ti Apo a Diosmo! Impakitana a maragsakan kenka babaen iti panangisaadna kenka nga ari ti Israel. Gapu ta agnanayon ti panagayatna iti Israel, pinagbalinnaka nga ari tapno pagtalinaedem ti linteg ken hustisia.”
10Indatag ti reyna ti Seba dagiti intugotna a sagut nga agpaay ken ni Solomon: dandani lima a tonelada a balitok ken nakaad-adu nga alahas ken bangbanglo. Awan pay ti kastoy a kaadu a bangbanglo a naawat ni Solomon iti uray ania a tiempo.
( 11Saan la a dagitoy ti inawatna. Nangyeg pay dagiti barko ni Hiram iti adu a kayo ti almug ken al-alahas a naggapu idiay Ofir. Dagitoy met la a barko ti nakailuganan dagiti balitok a naggapu manipud sadiay. 12Inaramidna dagitoy a kayo a barandilias ti Templo ken ti palasio, agraman lira ken arpa dagiti musiko. Daytoy ti kapintasan a kayo nga almug a naipan iti Israel ket awanen ti kasta a kita agpapan ita.)
13Inted ni Ari Solomon ti amin a kiniddaw ti reyna ti Seba kenkuana malaksid pay dagiti gagangay a sagut nga intedna a sibubuslon. Kalpasanna, nagsubli ti reyna agraman dagiti adipenna iti daga ti Seba.
Ti Adu a Sanikua ni Solomon
(2 Cron. 9:13-29)
14Tinawen nga umawat ni Solomon iti nasurok a 25 a tonelada a balitok, 15malaksid dagiti buis#15 buis, kuna ti maysa a kadaanan a patarus; iti Hebreo, lallaki. dagiti agtagtagilako, dagiti maganansia iti pannakilinnako iti sabali a pagilian, ken dagiti ited dagiti ari ti Arabia ken dagiti gobernador ti probinsia a kas panangbigbigda iti panagarina.
16Nangaramid ni Ari Solomon iti 200 a dadakkel a kalasag. Nakalupkopan ti tunggal kalasag iti dandani 15 a libra a balitok. 17Nangaramid pay iti 300 a babbabassit a kalasag. Nakalupkopan iti dandani uppat a libra a balitok ti tunggal maysa. Pinaikabilna amin dagitoy iti Salas a maaw-awagan iti Bakir ti Libano.
18Nangaramid pay ti ari iti dakkel a trono a kinalupkopanna iti marfil ken balitok. 19-20Innem ti tukad ti agdan a mapan iti trono. Adda sinan-leon iti tunggal murdong iti tunggal tukad ket agdagupda amin iti sangapulo ket dua. Iti likudan ti trono, adda sinan-ulo ti baka ket iti abay dagiti dua nga ima ti trono, adda sinan-leon, maysa iti tunggal ima. Awan ti ari a naaddaan iti kastoy a trono.
21Balitok amin a baso ni Solomon. Puro a balitok met dagiti alikamen iti Salas ti Bakir ti Libano. Awan alikamen a pirak ta awan pateg ti pirak idi tiempo ni Solomon. 22Adda bunggoy ti barko ti ari nga agbibiahe kadagiti sabali a pagilian ket makikuykuyog iti bunggoy ti barko ni Hiram. Tunggal tallo a tawen, agawid dagiti barko nga agisangpet kadagiti balitok, pirak, marfil, burangen ken bakes.
23Awanen ti sabali nga ari a nabakbaknang ken nasirsirib ngem ni Ari Solomon. 24Tinarigagayan ti sangalubongan a mapan denggen ti sirib nga imparabur ti Dios kenkuana. 25Nangitugot ti tunggal maysa iti sagutna iti ari: alikamen a balitok ken pirak, kagay, armas, bangbanglo, kabalio ken mulo. Tinawen a kasta ti maaramid.
26Nangbuangay#1 Ar. 4:26. ni Solomon iti armada a buklen ti 1,400 a lugan a pakigubat ken 12,000 a nagkabalio a soldado. Inkabilna ti dadduma kadagiti ili nga ayan dagiti lugan a pakigubat ket imbatina ti dadduma idiay Jerusalem a madadaan nga agserbi kenkuana. 27Bayat#Deut. 17:17. ti panagturayna, adu ti pirak a kas iti kaadu ti kadawyan a bato. Adu met ti sedro a kas iti ordinario a sikamoro iti arisadsad dagiti turod ti Juda. 28Dagiti#Deut. 17:16. pannakabagina ti mangimaton iti negosio ti kabalio manipud Musri#28 MUSRI: mabalin a pakaipatarusan ti teksto; Egipto iti Hebreo. ken Cilicia,#28 MUSRI KEN CILICIA: Dua a kadaanan a pagilian a sentro ti panagpatanor iti kabalio idi panawen ni Solomon; ti agdama nga abagatan-a-daya a Turkia. ken ti negosio ti lugan a pakigubat manipud Egipto. 29Agpateg iti 600 a bagi ti pirak ti maysa a lugan a pakigubat nga aggapu idiay Egipto ket 150 met ti kabalio. Ilako met ida dagiti pannakabagi ni Solomon kadagiti ari dagiti Heteo ken dagiti ari dagiti taga-Siria.
Currently Selected:
1 Ar-ari 10: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society
