SAN LUCAS 1
1
Cha'cña nu nscua clyo
1Cua quiña'a̱ ñati̱ nguscua lo quityi ñi'ya̱ nu ngua lcaa cha' ji'i̱ Jesús nde su ndi'i̱ ya, quityi historia laca bi'. 2Lo'o jua'a̱ ntsu'u ngu' nu ngulu'u cha' bi' ji'na; ngu' bi' ni, cua na'a̱ ngu' cha' bi' clyo, tya lo'o nguxana Jesús ngua'ni yu cña, lo'o jua'a̱ ndyaa ngu' nchcui' ngu' cha' ji'i̱ Jesús lo'o lcaa ñati̱. 3Bi' cha' lo'o na', ngulana tsa na' ñi'ya̱ ngua lcaa cha' nu nteje tacui tya lo'o nguxana cha' bi'. Tso'o nti' na' si lo'o na' scua na' lcaa cha' bi', cha' tsaa slo nu'u̱, cusu' Teófilo, 4cha' caca cuayá' ti' nu'u̱ tso'o la lcaa cha' nu nda ngu' lo'o nu'u̱.
Ndyaa xca̱ ji'i̱ ycui' Ndyosi ca slo Zacarías nu caca sti Juan Bautista
5Tyempo nu ngua rey Herodes cña, lo'o ngua yu loo ji'i̱ ngu' loyuu su cuentya Judea, li' ndi'i̱ sca sti jo'ó nu naa Zacarías. Bi' ndya'a̱ lo'o taju sti jo'ó nu ndu̱ cña su ngutu̱ jyo'o Abías nquicha'. Elisabet naa clyo'o yu bi', laca ma' la cui' ñati̱ tya'a ji'i̱ jyo'o Aarón nu ngua sti jo'ó tya clyo la. 6Liñi tsa ndu'ni tyucuaa ngu' bi' cuentya ji'i̱ ycui' Ndyosi, ndaquiya' ngu' lcaa cña ji'i̱ ycui' Ni; ndaquiya' tsa ngu' lcaa cha' nu cua nda Ni lo'o ñati̱ cua sa'ni la, jua'a̱ ná tucui nchcui' cha' cuxi ji'i̱ ngu' bi'. 7Pana ná ntsu'u ni sca sñi' ngu'. Ná ndyiji sñi' Elisabet, lo'o jua'a̱ ngusu' tsa juani.
8Cua ndyalaa semana ji'i̱ taju sti jo'ó lo'o nga'a̱ Zacarías, cha' cua'ni ngu' cña ne' laa. 9Ndi'ya̱ ngua'ni sti jo'ó nu ngua li': lcaa taju ngu' ngusubi ngu' ji'i̱ sca tya'a sti jo'ó ngu', cha' sca ti yu taca tyatí̱ yu su tacati ne' laa tonu, cha' taqui̱ yu yana jo'ó lo mesa ca bi' li'. Lo'o juani ndyanu cña bi' ji'i̱ ycui' Zacarías. 10Hora nu ndyaqui̱ yana jo'ó bi' ne' laa, li' ndyu'u ti'i̱ ngu' quichi̱ nde liya' ti, nchcui' tya'na ngu' lo'o ycui' Ndyosi. 11Li' ndu'u tucua sca xca̱ ji'i̱ ycui' nu Xu'na na ca slo Zacarías su ndi'i̱ yu ne' laa, na'a̱ yu cha' ndu̱ xca̱ bi' la'a tsu' cui̱ slo mesa tacati su ndyaqui̱ yana jo'ó. 12Lo'o na'a̱ Zacarías ji'i̱ xca̱ bi', nga'aa jlo ti' yu ñi'ya̱ cua'ni yu, cha' ndyutsi̱i̱ tsa yu ji'i̱. 13Nchcui' xca̱ bi' lo'o yu li':
―Ná cutsi̱i̱ nu'u̱ Zacarías ―nacui̱―. Cua ndyuna ycui' Ndyosi cha' nu tya'na tsa nchcui' nu'u̱ lo'o Ni, bi' cha' cala sca sñi' Elisabet clyo'o nu'u̱. Juan caca naa yu, jua'a̱ caca xtañi nu sta nu'u̱ ji'i̱. 14Chaa tsa ti' caca tyiquee nu'u̱ lo'o cua ngula nu piti bi'. Lo'o jua'a̱, tso'o tsa caca tyiquee quiña'a̱ tsa ñati̱ lo'o ña'a̱ ngu' ji'i̱ nu piti bi', 15cha' nu bi' caca sca ñati̱ tlyu nde loo ycui' Ndyosi. Ná co'o Juan bi' lcui ngatsi, lo'o jua'a̱ ni sca lo lcui ná co'o yu. Tya hora nu cala yu, li' tyanu Xtyi'i ycui' Ndyosi ne' cresiya ji'i̱ yu. 16Cua'ni yu cha' xa' caca tso'o cresiya ji'i̱ quiña'a̱ tya'a ngu' Israel, cha' taquiya' ngu' ji'i̱ ycui' Ndyosi nu Xu'na ngu'. 17La cui' xtyi'i nu nguti'i̱ ne' cresiya ji'i̱ jyo'o Elías nu ndyaa lo'o ycui' Ndyosi ji'i̱ tya sa'ni la, la cui' xtyi'i bi' caja ji'i̱ Juan juani. Ca nde loo la ca̱a̱ Juan chcui' lo'o ñati̱, cha' tyaala' tyiquee ñati̱, cha' nga'aa xu̱u̱ tya'a ngu' lo'o sñi' ngu'. Li' taca cha'a̱ lcaa cha' nu ntsu'u tyiquee ngu', cha' taquiya' ngu' ji'i̱ lcaa cha' nu liñi. Jua'a̱ chcui' Juan lo'o ngu' cha' cua'ni cho'o ngu' tyiquee ngu', cha' tyaja'a̱ ngu' xñi ngu' cha' ji'i̱ ycui' Ndyosi. Li' ca̱a̱ ycui' Cristo.
18Li' nchcuane Zacarías ji'i̱ nu xca̱ bi':
―¿Ñi'ya̱ caca cha' ca cuayá' ti' na' si chañi ca cha' bi'? Cusu' tsa na', lo'o jua'a̱ clyo'o na' cusu' tsa ―nacui̱ Zacarías ji'i̱ xca̱ bi'.
19―Gabriel naa na' ―nacui̱ xca̱ ji'i̱ yu li'―. Na ndu̱ ti na' ca slo ycui' Ndyosi; bi' laca nu nda 'na lijya̱a̱ cha' chcui' na' lo'o nu'u̱, cha' ta na' cha' tso'o re lo'o nu'u̱. 20Cua'a̱ jyaca̱ nu'u̱ jna' juani: caca cu'u̱ nu'u̱ juani, cha' nga'aa caca chcui' nu'u̱ ña'a̱ cuayá' nu cala cubi' bi' jinu'u̱; jua'a̱ caca jinu'u̱ xqui'ya cha' ná jlya ti' nu'u̱ jna'. Chañi tyalaa tyempo bi', li' caca cuayá' ti' nu'u̱ cha' cha' liñi laca lcaa cha' nu nchcui' na' lo'o nu'u̱ ―nacui̱ xca̱ bi' ji'i̱ Zacarías.
21Tya ndi'i̱ ngu' quichi̱ to' laa, ntajatya ngu' ji'i̱ nu Zacarías bi' ña'a̱ cuaya' nu tyu'u yu nde liya'; pana quiña'a̱ tsa nclyacua ti' ngu' ni cha' tyiquee' tsa ngutu'u Zacarías nde ne' laa bi'. 22Lo'o ndu'u Zacarías nde liya', li' nga'aa ngua chcui' yu lo'o ngu'. Ngua tii ngu' cha' ne' laa ngulu'uloo sca xee tlyu ji'i̱ yu nu ndu'u ya̱a̱ ca slo ycui' Ndyosi. Li' se'i̱ ti ndu̱ yu ndyu'ni ya' yu ji'i̱ ngu', pana ndyanu cu'u̱ ti yu.
23Lo'o cua ndye tsa̱ lo'o ngua'ni Zacarías cña ne' laa, li' nguxtyu̱u̱ yu ndyaa yu quichi̱ tyi yu. 24Tiya' la li', ngua tii clyo'o yu, nu naa Elisabet ni, cha' ngujui sñi' ma'. Li' cua ntsu'u cua ca'yu co' nu xcui' ne' ni'i̱ ti ndyanu ma'. 25Ndi'ya̱ ngulacua ti' ma': “Ycui' Ndyosi nu Xu'na na laca nu ngua'ni cha' re cuentya jna'. Cua ngua'ni Ni cha' nga'aa chcui' la ñati̱ cha' cuxi jna'.”
Nchcui' xca̱ ji'i̱ ycui' Ndyosi lo'o María cha' cua cala ti Jesús
26Lo'o cua ntsu'u scuá co' nu ndya'a̱ tana Elisabet, li' ngulo ycui' Ndyosi cña ji'i̱ sca xca̱ ji'i̱ Ni, cha' tsaa ca quichi̱ Nazaret, sca quichi̱ nde loyuu su cuentya Galilea. Lo'o nu xca̱ bi' ni, la cui' Gabriel laca bi'. 27Nda ycui' Ndyosi ji'i̱ xca̱ bi' ji'i̱ Ni cha' tsaa slo sca nu cuna'a̱ nu ntucua ycui' ti. Na cua ngüiñi cha' ji'i̱ nu cuna'a̱ bi', cha' caja clyo'o lo'o sca nu qui'yu nu naa José; David laca xtañi nu qui'yu bi', sca ti xtañi yu lo'o jyo'o cusu' David nu ngutu'ú sa'ni la. María naa nu cuna'a̱ nu ntucua ycui' ti bi', lo'o jua'a̱ la cui' tya'a nu Elisabet bi' laca María. 28Lo'o ndyalaa xca̱ slo nu cuna'a̱ bi', li' nchcui' lo'o:
―Tso'o ti tyi'i̱ nu'u̱ ―nacui̱ xca̱ bi' ji'i̱―, tyaca'a tsa nu'u̱ ji'i̱ ycui' Ndyosi. Tso'o ndi'i̱ Ni lo'o nu'u̱ ―nacui̱―. Quiña'a̱ tsa cha' tso'o nda ycui' Ndyosi jinu'u̱, masi ná ndu'ni Ni jua'a̱ lo'o xa' la nu cuna'a̱.
29Cua na'a̱ María ji'i̱ xca̱ bi'. Lo'o ndyuna María cha' nu nchcui' yu, li' ngulacua tsa ti' ni cha' laca nchcui' xca̱ bi' jua'a̱. Ndyutsi̱i̱ tsa li'. 30Xa' nchcui' xca̱ bi' lo'o nu cuna'a̱ cuañi' bi' li':
―María ―nacui̱―, ná cutsi̱i̱ nu'u̱ cha' cua nda ycui' Ndyosi sca cha' tso'o hi̱ ―nacui̱ xca̱ bi' ji'i̱―. 31Caca tana nu'u̱, caja sñi' nu'u̱; ñacui̱ nu'u̱ cha' Jesús ca naa cubi' nu caja jinu'u̱. 32Caca yu bi' sca ñati̱ tlyu. Ñacui̱ ngu' ji'i̱ yu cha' Sñi' ycui' Ndyosi nu Xu'na na nu tlyu la caca yu. La cui' tya'a cña tlyu nu ngua'ni jyo'o rey David, nu tya'a yu nu ya̱a̱ chalyuu cua sa'ni la, bi' cña laca nu ta ycui' nu Xu'na na ji'i̱ Jesús, 33cha' lcaa tsa̱ ná tye cha' caca yu loo ji'i̱ lcaa tya'a ngu' Israel; jua'a̱ ná tye cha' culo yu cña ji'i̱ lcaa ñati̱ chalyuu.
34Li' nchcui' María lo'o xca̱ bi':
―¿Ñi'ya̱ caca re lacua, cha' nu bilya caja clyo'o na'? ―nacui̱ María ji'i̱ xca̱ bi'.
35Li' nda xca̱ sca cha' lo'o:
―Ta ycui' Ndyosi Xtyi'i Ni cha' tya̱a̱ su ndi'i̱ nu'u̱, cha' tyu'ú tyucui ña'a̱ nu'u̱; sca cha' tlyu nu cua'ni ycui' Ndyosi nu laca loo caca cha' bi'. Nu lo'o cala sñi' nu'u̱, sca ñati̱ nu lubii tsa cuentya ji'i̱ ycui' Ndyosi caca cubi' nu cala bi', la cui' bi' laca nu caca naa Sñi' ycui' Ndyosi. 36Lo'o chaca cha' chcui̱' lo'o nu'u̱ ―nacui̱ xca̱ ji'i̱―, cha' lo'o Elisabet tya'a cusu' nu'u̱ nguxana ngua tana, masi cusu' tsa ma'. Tya tsubi' la nacui̱ ngu' cha' ná ndyiji sñi' ma' tsiya' ti, lo'o juani cua ndya'a scuá co' ntsu'u sñi' ma'. 37Ni sca cha' ná tucui nti' ycui' Ndyosi.
38Li' nacui̱ María ji'i̱ xca̱ bi' ndi'ya̱:
―Si nacui̱ ycui' Ndyosi cha' cala sñi' na' jua'a̱, cua laca cha' li'. Tso'o ntsu'u tyiquee na' cua'ni na' cña ji'i̱ Ni, lcaa ña'a̱ cña nu culo ycui' Ndyosi nu Xu'na na 'na ―nacui̱ María.
Li' ndu'u xca̱ bi', ndyaa.
Ndyaa María nde slo Elisabet tya'a
39Li' ndu'u María ndyaa yala ti nde sca quichi̱ nu ndi'i̱ laja ca'ya Judea. 40Li' ndyalaa María to' tyi Zacarías, nguxana nchcui' lo'o Elisabet; 41pana laja lo'o ndyuna Elisabet cha' nu nchcui' María lo'o, hora ti ngüiña xi cubi' nu ntsu'u ne' ma'. Li' ngutsa'á̱ tyiquee Elisabet ntsu'u Xtyi'i ycui' Ndyosi, 42bi' cha' cui̱i̱ tsa nchcui' ma' lo'o María li':
―Tlyu tsa cha' tso'o nu nda ycui' Ndyosi jinu'u̱ ―nacui̱ Elisabet ji'i̱ María―. Ná cua'ni Ni jua'a̱ lo'o xa' la nu cuna'a̱. Lo'o jua'a̱ tyaca'a tsa cubi' nu ntsu'u jinu'u̱ cuentya ji'i̱ ycui' Ndyosi ―nacui̱―. 43¿Tilaca ta laca na' cha' cua ndyalaa nu'u̱ nu caca xtya'a̱ nu Xu'na na ca slo na'? 44Chañi cha' nu nda na' lo'o nu'u̱, cha' cua ngüiña xi cubi' nu ntsu'u ne' na' cha' chaa ti' yu laja lo'o ndyuna na' cha' nu nchcui' nu'u̱ lo'o na'. 45Tso'o tsa tyiquee nu'u̱ cha' jlya ti' nu'u̱ cha' ji'i̱ ycui' Ndyosi, cha' cua'ni Ni lcaa cha' nu nda ycui' Ni lo'o nu'u̱.
Jua'a̱ nacui̱ Elisabet ji'i̱ María. 46Li' ngua'ni tlyu María ji'i̱ ycui' Ndyosi:
Tyucui tyiquee na' cua'ni tlyu na' ji'i̱ ycui' nu Xu'na na', nacui̱ María.
47Ca chaa ti' cresiya jna' xqui'ya ycui' Ndyosi nu ngua'ni lyaá jna'.
48Ndube tsa ti' ycui' Ni 'na cha' laca na' msu ji'i̱ Ni, masi sca ñati̱ ti'i laca na'.
Su nguxana ti juani, ñacui̱ lcaa ñati̱ nu lijya̱ chalyuu nde loo la cha' tso'o tsa ntsu'u tyiquee na'.
49Tlyu tsa cña nu ndu'ni ycui' Ndyosi, lo'o jua'a̱ tlyu tsa cha' nu ndyu'ni Ni lo'o na';
lubii tsa ycui' Ndyosi, nacui̱ María.
50Ná culaya' ycui' Ndyosi ji'i̱ ñati̱ nu taquiya' ji'i̱ cha' nu nchcui' Ni;
ña'a̱ cuayá' lcaa tyempo lijya̱ ñati̱ tyi'i̱ chalyuu, chañi cha' cua'ni tya'na ti' Ni ji'i̱ ngu' bi'.
51Quiña'a̱ tsa cña tlyu cua ngua'ni Ni.
Cua ngua'ni tye Ni cha' ji'i̱ ñati̱ nu xcui' cha' tyixi ndu'ni ngu' lo'o tya'a ngu'.
52Cua ngulo'o Ni ji'i̱ ñati̱ tlyu ca su ntucua tlyu ngu' nti' ngu',
cua nda Ni su tso'o la cha' tyi'i̱ ngu' ti'i, nacui̱ María.
53Cua ngua'ni Ni cha' tyaala' ti' ñati̱ nu lyiji tsa cha' tso'o ji'i̱,
pana ngulo Ni cña cha' nga'aa caja la cha' culiya' ji'i̱ ngu' culiya'.
54-55Nguxtyucua tsa Ni ji'i̱ lcaa ngu' Israel tya'a na, cha' laca na msu ji'i̱ ycui' Ni;
tso'o tsa ngüiñi cha' ji'i̱ Ni lo'o jyo'o cusu' ji'na.
Ná ngujlyaa ti' ycui' Ndyosi ji'na, ñati̱ tya'a ji'i̱ jyo'o Abraham na; xcui' ngua tya'na ti' Ni ji'i̱ ngu' tya'a na.
Lo'o ña'a̱ ti tya cua'ni tya'na ti' Ni ji'na lo'o ji'i̱ sñi' na tyucui tyempo nde loo la.
56Tya xna co' ndyanu María slo Elisabet, li' ndu'u ñaa nde to' tyi.
Lo'o ngula Juan Bautista
57Cua ndyalaa tsa̱ nu cala sñi' Elisabet. Qui'yu cubi' nu ngula ji'i̱. 58Lo'o ndyuna ngu' cha' ngula sñi' ma' cusu' bi', tso'o tsa ntsu'u tyiquee lcaa ngu' tya'a, lo'o ngu' nu nga'a̱ cacua ti. Li' ndyalaa ngu' slo cha' ta ngu' cha' lo'o ma' cusu' bi', cha' tso'o tsa ngua'ni tya'na ti' nu Xu'na na ji'i̱ ma'. 59Lo'o ndu'u scua snu' tsa̱, li' ñaa ngu' toni'i̱ cha' culacua̱ ji'i̱ nu piti cuentya ji'i̱ ngu' judío lo'o ngusi'yu quiji̱ yu. Cua sta ti ngu' xtañi Zacarías ji'i̱ nu piti bi' ñi'ya̱ nu naa xtañi sti, 60lo'o li' ngua'a xtya'a̱ nu piti bi' ji'i̱ ngu':
―Nga'aa si'i jua'a̱ caca naa yu ―nacui̱ Elisabet ji'i̱ ngu'―, Juan caca naa yu re.
61―Ná ntsu'u tya'a ma̱ nu naa jua'a̱ ―nacui̱ ngu' tya'a ji'i̱ ma' cusu' bi'.
62Ngua'ni ya' ngu' ji'i̱ sti nu piti li', cha' ña'a̱ ti tya cu'u̱ nu cusu' bi'. Nchcuane ngu' ji'i̱ yu li':
―¿Ñi'ya̱ xtañi nu piti re scua nu'u̱ nti' nu'u̱? ―nacui̱ ngu' ji'i̱.
63Li' ndijña nu cusu' sca ngoca' piti cha' lo bi' scua letra. Ndi'ya̱ nguscua nu cusu' bi' li': “Juan ca naa yu”. Li' ngulacua tsa ti' lcaa ñati̱ nu ndi'i̱ slo. 64Hora ti ndyaala tu'ba Zacarías, nguxana ndyu'ni tlyu yu ji'i̱ ycui' Ndyosi li'. 65Ndube tsa ti' lcaa ñati̱ nu ndi'i̱ cacua ti li'; lcua ti su ndi'i̱ ngu' nde quichi̱ ca'ya su cuentya Judea bi', nda ngu' cha' lo'o tya'a ngu' ñi'ya̱ nu ngua ji'i̱ Zacarías. 66Ngulacua tsa ti' lcaa ñati̱ nu ndyuna cha' bi':
―¿Ni cña caca nu piti re? ―nacui̱ ngu' ji'i̱ tya'a ngu'.
Chañi cha' tso'o tsa ndyu'ni ycui' Ndyosi lo'o nu piti bi'.
Ngua'ni chi̱ Zacarías loo ycui' Ndyosi, ndyula tu'ba yu sca ji̱i̱
67Cua ngutsa'á̱ tyiquee Zacarías ntsu'u nu Xtyi'i ycui' Ndyosi lo yu. Li' nguxana nu cusu' bi' nda cha' lo'o ñati̱ ca bi', lcaa ña'a̱ cha' nu cua nda Ni lo'o ycui' yu. Ndi'ya̱ nchcui' yu:
68Ntsu'u cha' cua'ni tlyu na ji'i̱ ycui' Ndyosi nu Xu'na na, nu laca ycui' Ndyosi ji'na ngu' Israel, nacui̱ nu cusu' bi' li'.
Cua chaca quiya' nguxana nchcui' Ni lo'o ngu' tya'a na nu laca na ñati̱ ji'i̱ ycui' Ni, juani ndyu'ni Ni cña cha' clyaá na ji'i̱ nu cuxi.
69Cua nda ca ti ycui' Ndyosi lijya̱ sca nu tso'o tsa nchca ji'i̱, cha' cua'ni lyaá yu ji'na ji'i̱ lcaa cha' cuxi nu ntsu'u ji'na;
bi' laca sca ñati̱ nu la cui' ñati̱ tya'a ji'i̱ jyo'o David nu ngua'ni cña ji'i̱ ycui' Ndyosi cua sa'ni la.
70La cui' jua'a̱ cha' nu nda Ni lo'o ngu' tya'a na tya sa'ni la, cha' cua ngua tyu̱u̱ siyento yija̱ nu nda Ni cha' bi' lo'o jyo'o cusu' ji'na nu ngua tu'ba ji'i̱ ycui' Ndyosi.
71Nacui̱ jyo'o cusu' bi', cha' cua'ni lyaá ycui' Ndyosi ji'na laja lo'o nxu̱u̱ tya'a ñati̱ cuxi lo'o na,
lo'o jua'a̱ cua'ni lyaá Ni ji'na laja lo'o ti'í ti' ñati̱ ña'a̱ ngu' ji'na.
72Cua'ni tya'na ti' ycui' Ndyosi ji'na, lo'o jua'a̱ ji'i̱ jyo'o cusu' ji'na;
ná ngujlyaa ti' ycui' Ni cha' nu cua ngüiñi ji'i̱ Ni lo'o jyo'o tya'a na cua sa'ni, nacui̱ jyo'o cusu' bi'.
73Nde laca cha' nu cua nda ycui' Ndyosi lo'o jyo'o Abraham, nu lo'o ngua'ni jura ycui' Ndyosi lo'o yu:
74nacui̱ Ni cha' culo Ni ji'na laja ñati̱ cuxi nu nxu̱u̱ tya'a lo'o na;
jua'a̱ cua'ni Ni cha' ná cutsi̱i̱ na, laja lo'o ndyu'ni na cña ji'i̱ ycui' Ni tyucui tyempo lo'o ndi'i̱ na nde chalyuu.
75Ta Ni chacuayá' bi' ji'na si lubii tyiquee na, si tyucui tyiquee na taquiya' na ji'i̱ Ni, nacui̱ nu cusu' Zacarías li'.
76Lo'o nu'u̱ juani, sñi', nacui̱ yu ji'i̱ nu piti Juan, chcui' ngu' cha' nu'u̱ laca nu ta cui̱i̱ lo'o ñati̱ cuentya ji'i̱ ycui' Ndyosi nu laca loo.
Tya'a̱ nu'u̱ ca nde loo la ji'i̱ ycui' nu Xu'na na, cha' quiñi tso'o tyucui̱i̱ su ca̱a̱ ycui'.
77Culu'u nu'u̱ ji'i̱ ñati̱ cha' ji'i̱ ycui' nu Xu'na na;
cua'ni nu'u̱ cha' ca cuayá' ti' ngu' cha' cua'ni clyu ti' ycui' Ndyosi ji'i̱ qui'ya nu ntsu'u ji'i̱ ngu', cha' li' taca clyaá ngu' bi' ji'i̱ nu cuxi.
78Ntsu'u tsa tyiquee ycui' Ndyosi ña'a̱ Ni ji'na; tya'na tsa ti' Ni ji'na, bi' cha' cua ta ti ycui' Ni ji'i̱ Cristo cha' ca̱a̱ nde su ndi'i̱ na.
Bi' laca sca xee tlyu nu tyu'ú ne' cresiya ji'na, ñi'ya̱ nti' xee ndubi nu ntyiji'i̱ su ndi'i̱ na lo'o lijya̱ ca ti cuichaa.
79Li' ta Ni xee bi' cha' tyu'ú ne' cresiya ji'i̱ ngu' nu nga'aa ndyiji ñi'ya̱ cua'ni ngu', cha' talya tsa ña'a̱ ne' cresiya ji'i̱ ngu' bi'.
Masi tya lu'ú ngu' bi', pana ñi'ya̱ nti' si na cua ngujuii nti' ngu', xqui'ya cha' cuxi nu ntsu'u ne' cresiya ji'i̱ ngu'.
Culu'u Cristo ji'na ñi'ya̱ cua'ni na cha' tyi'i̱ ti̱ ti na lo'o tya'a na.
Cua ndye cha' nu nda Zacarías li'.
80Cua ndyaluu la nu piti, lo'o jua'a̱ cua ngua tlyu la tyiquee yu. Pana xcui' ne' quixi̱' ndi'i̱ yu ña'a̱ cuayá' nu nguluu yu, ña'a̱ cuayá' nu ndu'u tucua yu slo ngu' Israel tya'a yu.
Currently Selected:
SAN LUCAS 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.