SAN MARCOS 16
16
Ndyu'ú Jesús chaca quiya'
1Nu lo'o cua ndye tsa̱ nu ndi'i̱ cña' ngu' judío, li' nu María Magdalena lo'o María xtya'a̱ Jacobo lo'o Salomé ni, ndyaa ngu' ngüi'ya ngu' setye tyixi xtyi'i; tsaa lo'o ngu' ji'i̱ setye bi', cha' ta'a̱ setye bi' ña'a̱ tsaca chu̱' jyo'o bi' nti' ngu'. 2Cua nguxee chaca tsa̱ li', tsa̱ clyo ji'i̱ semana. Lo'o ntyucua cuichaa, li' hora ti ndu'u ngu' cuna'a̱ bi' ndyaa ngu' su ntsu'u jyo'o Jesús tyuquee bi'. 3Laja lo'o ndya'a̱ ngu' tyucui̱i̱ nchcui' ngu' lo'o tya'a ngu':
―¿Tilaca nu xtyucua ji'na cha' culotsu' na quee tonu nu ndyacu̱' to' tyuquee bi'? ―nacui̱ ngu' ji'i̱ tya'a ngu'.
4Lo'o ndyalaa ngu' cacua ti, li' nguxña'a̱ ngu' ji'i̱ tyuquee bi', lo'o li' na'a̱ ngu' cha' cua ndyaatsu' quee tonu nu ndyacu̱' to' tyuquee bi'; ntucua yaala to' tyuquee bi' li'. 5Ndyatí̱ ngu' nde ne' tyuquee, na'a̱ ngu' ji'i̱ sca nu qui'yu cuañi', ngua ti' ngu'; ngati̱ tsa ña'a̱ late' tyucui̱ cu' nu lacu' nu qui'yu bi' nu nga'a̱ la'a tsu' cui̱ su nscua jyo'o bi' nquicha'. Ndube tsa ti' nu ngu' cuna'a̱ bi' ña'a̱ ngu' ji'i̱.
6―Ná cutsi̱i̱ ma̱ ―nacui̱ nu qui'yu bi' ji'i̱ nu ngu' cuna'a̱ bi'―. Cua jlo ti' na' cha' ji'i̱ Jesús Nazaret nu ndyujuii ngu' ji'i̱ lo crusi nclyana ma̱. Pana nga'aa ntsiya jyo'o bi' ca nde, cha' cua ndyu'ú yu bi' chaca quiya'. Ca̱a̱ na'a̱ ma̱ xi ca nde su ngusta ngu' ji'i̱ jyo'o bi'. 7Li' yaa clya ma̱ cacha' ma̱ ji'i̱ Pedro lo'o ji'i̱ xa' la ngu' nu ndyaca tsa'a̱ ji'i̱ yu, cha' cua tsaa ti ycui' yu nde loo ji'i̱ ma̱ nde Galilea; tyacua tya'a ma̱ lo'o yu ca bi', ñi'ya̱ nu cua nacui̱ yu ji'i̱ ma̱ tya tsubi'.
8Li' ndu'u ngu' tyuquee nxna ngu' ndyaa ngu'. Lye tsa nchcua̱ ngu', cha' ndube tsa ti' ngu'. Pana ná nchcui' ngu' lo'o xa' ñati̱ tyucui̱i̱ cha' ndyutsi̱i̱ tsa ngu'.
Ndyu'u tucua Jesús slo María Magdalena
9La cui' tsa̱ clyo ji'i̱ semana ngua bi' lo'o ndyu'ú Jesús chaca quiya'. Clyo ndyu'u tucua yu slo María Magdalena. Tya tsubi' la cua ngua'ni yu jo'o ji'i̱ nu María bi', cua ngulo yu cati tya'a cui'i̱ cuxi nu ngusñi ji'i̱ nu cuna'a̱ bi'. 10Lo'o cua na'a̱ María ji'i̱ ycui' Jesús, hora ti ndu'u María ñaa slo nu xa' la tya'a ngu' nu ndyaca tsa'a̱ ji'i̱ yu, cha' cacha' ji'i̱ ngu' ñi'ya̱ ngua cha'. Nxi'ya ngu' nga'a̱ ngu', cha' xñi'i̱ tsa ti' ngu' cha' ngujuii Jesús. 11Pana masi jua'a̱, ná nduna ngu' cha' nu nchcui' María lo'o ngu', cha' ná jlya ti' ngu' cha' cua ndyu'ú Jesús chaca quiya'; ná jlya ti' ngu' tsiya' ti cha' cua na'a̱ María ji'i̱ ycui' Jesús.
Ndyu'u tucua Jesús slo tucua tya'a ngu' nu ndyaca tsa'a̱ ji'i̱
12Tiya' la xi, li' ndyu'u tucua Jesús chaca quiya', ngulu'u loo yu ji'i̱ tucua tya'a ngu' nu ndyaca tsa'a̱ ji'i̱. Tyucui̱i̱ su ndya'a̱ ngu' nde ne' quixi̱', ca bi' ngulu'u loo ycui' Jesús ji'i̱ ngu'. 13Yala ti ñaa ngu' nde quichi̱, ndacha' ngu' cha' bi' ji'i̱ tya'a ngu'; pana ná ndaquiya' ngu' ji'i̱ cha' nu nchcui' nu tucua tya'a ñati̱ bi'.
Cña nu ngulo Jesús ji'i̱ nu ngu' nu ndyaca tsa'a̱ ji'i̱
14Ca ngusi̱i̱ la xi, li' ndyu'u tucua Jesús slo nu tii chaca tya'a ngu' nu ndyaca tsa'a̱ ji'i̱ su nga'a̱ ngu' ndyacu ngu' to' mesa. Lye nchcui' yu lo'o ngu' bi' ni cha' laca ná jlya tso'o ti' ngu', ni cha' laca ndyacu̱' hique ngu'. Lo'o jua'a̱ nchcui' yu lo'o ngu' ni cha' laca ná ndaquiya' ngu' ji'i̱ ngu' tya'a ngu', nu cua na'a̱ ji'i̱ yu clyo lo'o ndyu'ú ca ti yu chaca quiya'.
15―Tsaa ma̱ tyucui ña'a̱ chalyuu ―nacui̱ Jesús ji'i̱ ngu' bi' li'―. Ta ma̱ cha' lo'o lcaa ñati̱ cuentya jna'. Chcui' ma̱ lo'o ngu' cha' taca clyaá ngu' ji'i̱ nu cuxi xqui'ya na'. 16Nu lo'o xñi ñati̱ cha' 'na, tyucuatya ngu' chacuayá' jna' li', clyaá ngu' bi' ji'i̱ nu cuxi li'. Ñati̱ nu ná tyaja'a̱ xñi cha' 'na tsiya' ti, tyanu qui'ya ji'i̱ ngu' li'. 17Ñati̱ nu xñi cha' 'na ni, cua'ni ngu' bi' cha' tonu chacuayá' jna', cha' cube tsa ti' xa' ñati̱: culo ngu' bi' ji'i̱ cui'i̱ cuxi nu ngusñi ji'i̱ ñati̱; caja ñi'ya̱ nu chcui' ngu' bi' cha'cña ji'i̱ xa' ñati̱ chacuayá' jna'; 18masi xñi ngu' ji'i̱ cuaña tyaala, masi co'o ngu' taná tyaala, ná sca cha' cuxi caca ji'i̱ ngu' bi' li'; lo'o sta ya' ngu' bi' hichu̱' ngu' quicha, tyaca tso'o nu quicha bi' ―nacui̱ Jesús ji'i̱ ngu'.
Ndyaa Jesús nde cua̱
19Lo'o ndye nchcui' Jesús nu Xu'na na, li' ngua'ni ycui' Ndyosi cha' ndu'u yu ndyaa yu nde cua̱; ndyaa tucua Jesús la'a tsu' cui̱ ji'i̱ ycui' Ndyosi ca bi'. 20Li' ndu'u ngu' nu ngua tsa'a̱ ji'i̱, ndyaa ngu' lcaa quichi̱ cha' chcui' ngu' cha' ji'i̱ Jesús lo'o xa' ñati̱. Nxtyucua tsa nu Xu'na na ji'i̱ nu ngu' nu ngua tsa'a̱ ji'i̱, hasta ngua cuayá' tso'o ti' ngu' lcaa quichi̱ su ndyaa ngu' bi', cha' chañi tsa cha' nu nchcui' ngu' cuentya ji'i̱ ycui' Ndyosi; ngua cuaya' ti' ngu' quichi̱ bi' lo'o na'a̱ ngu' cha' tonu nu ngua'ni ngu' bi' chacuayá' ji'i̱ ycui' Ndyosi.
Tsa lo cua ti cha'.
Currently Selected:
SAN MARCOS 16: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.