EFESIOS 1
1
1Pablo laca na' nu nscua na' quityi re. Ngulo ycui' Ndyosi cña 'na, bi' cha' ndya'a̱ na' nchcui' na' cha' ji'i̱ Jesucristo lo'o ngu' xa' quichi̱ tyijyu' la. Lo'o nu juani nscua na' quityi re cha' ca̱a̱ ca slo cu'ma̱ ngu' Efeso, cha' laca ma̱ ñati̱ ji'i̱ ycui' Ndyosi, cha' tso'o tsa ngusñi ma̱ cha' ji'i̱ Jesucristo. 2Ndi'ya̱ nti' na', cha' ña'a̱ ti cua'ni Ni cha' tso'o lo'o ma̱, cha' cua'ni ycui' Ndyosi Sti na cha' ti̱ ti tyi'i̱ tyiquee ma̱ si xñi ma̱ cha' ji'i̱ Jesucristo nu Xu'na na.
Lcaa cha' tso'o nu tyacua ji'na xqui'ya Cristo
3Lye tsa tya na xlya'be ji'i̱ ycui' Ndyosi Sti na, nu laca Sti Jesucristo nu Xu'na na. Cua ndyaca stu'ba cha' ji'na lo'o Cristo; bi' cha' lo'o ycui' Ndyosi, tso'o tsa nti' Ni ña'a̱ Ni ji'na. Lcaa lo cha' tso'o nu tyacua ji'na cha' ngusñi na cha' ji'i̱ Jesucristo, cua ngua'ni Ni cha' bi' lo'o na xqui'ya Cristo. 4Lo'o tya lyiji tya' chalyuu, tya li' cua ngusubi ycui' Ndyosi ji'na cha' caca na ñati̱ ji'i̱ ycui' Ni, nu lo'o caca stu'ba cha' ji'na lo'o Cristo. Ngua ti' Ni cha' tyu'utsu' na ji'i̱ lcaa lo cha' cuxi, cha' jua'a̱ nga'aa nti' cha' sta Ni qui'ya ji'na tsiya' ti. 5Ntsu'u tsa tyiquee ycui' Ndyosi ña'a̱ Ni ji'na, bi' cha' tya li', ngua ti' Ni cha' tyatí̱ cha' ji'na lo'o Ni, ñi'ya̱ si laca na sñi' Ni xqui'ya Jesucristo. 6Lo'o juani ntsu'u cha' cua'ni tlyu na ji'i̱ ycui' Ndyosi, cha' jua'a̱ tlyu tsa cha' tso'o nu ngua'ni Ni lo'o na. Xlya'be tsa nti' Ni ña'a̱ Ni ji'na, cha' cua nda Ni ji'i̱ Sñi' ycui' ca Ni lijya̱, nu tyaca'a tsa ji'i̱ Ni, cha' jua'a̱ caca stu'ba cha' ji'na lo'o Ni. 7Cua ngulaá na ji'i̱ nu cuxi nu ntsu'u ji'na, xqui'ya cha' cua ngujuii Sñi' ycui' Ni lo crusi cuentya ji'na, cha' cua ngüi'ya Ni cha' clyu ti' ji'na ji'i̱ qui'ya nu ntsu'u ji'na li'; tlyu tsa cha' tso'o nu cua ngua'ni ycui' Ndyosi lo'o na laca bi'. 8Ntsu'u tsa tyiquee Ni ña'a̱ Ni ji'na, bi' cha' ngua'ni Ni jua'a̱. Ndu'ni Ni cha' ca jlo ti' na lcaa cha' ji'i̱ Ni, cha' ca cuayá' ti' na ñi'ya̱ caca cha' bi'. 9Ñi'ya̱ nu ngua'ya cha' hique Ni tya sa'ni, jua'a̱ ngua'ni Ni li'; masi ná ndacha' Ni ji'i̱ ñati̱ chalyuu nu ngua sa'ni ñi'ya̱ caca cha' bi', tya li' ngua ti' Ni cha' cua'ni Ni cha' cala Cristo nde chalyuu. Hasta juani cua ngua cuayá' tso'o ti' na ñi'ya̱ ngua ti' ycui' Ndyosi cha' cua'ni Ni xqui'ya Cristo; 10ngua ti' Ni cha' caca stu'ba lcaa lo na nu ntsu'u nde chalyuu, lo'o sca ti Cristo nu Xu'na na caca loo la li'. Lo'o tyalaa tyempo bi', li' xuti'i̱ Ni lcaa na nu ntsu'u loyuu chalyuu, lo'o jua'a̱ lcaa na nu ntsu'u nde cua̱; li' sca ti Cristo caca loo ji'i̱ lcaa na bi'.
11Lcaa cha' nu ndyaca nde chalyuu, ndyaca bi' xqui'ya cha' nti' Ni cha' caca jua'a̱. Lo'o jua'a̱ na ni, tya clyo cua ngusubi Ni ji'na cha' caca na ñati̱ ji'i̱ Ni, cha' caca stu'ba cha' ji'na lo'o Cristo, xqui'ya cha' jua'a̱ nti' ycui' Ndyosi cha' caca. 12Jua'a̱ ngua cha' nu ngua'ni Ni, cha' taca chcui' ñati̱ cha' tlyu tsa laca Ni, nu lo'o ña'a̱ ngu' ji'i̱ ya laja lo'o ndi'i̱ ya nde chalyuu; cha' nu cuare ni, cua ngusñi ya cha' ji'i̱ Cristo nde loo la ji'i̱ xa' ñati̱. 13Lo'o li' la cui' jua'a̱ ndyaca lo'o cu'ma̱. Clyo ndyuna ma̱ cha' liñi bi' ji'i̱ Cristo; tso'o tsa ngua ti' ma̱ lo'o ndacha' ngu' cha' bi' ji'i̱ ma̱, cha' cua ngua'ni lyaá Ni ji'i̱ ma̱ ya' nu cuxi. Ngusñi ma̱ cha' ji'i̱ Cristo li', lo'o li' nda Ni Xtyi'i ycui' Ni cha' tyanu ne' cresiya ji'i̱ ma̱, ñi'ya̱ si na cua ngusta Ni cuayá' nu ji'i̱ ycui' ca Ni hichu̱' ma̱ cha' laca ma̱ ñati̱ ji'i̱ Ni; la cui' cña nu nacui̱ Ni cha' cua'ni Ni, cua laca ngua'ni Ni li'. 14Xtyi'i ycui' Ndyosi ni, bi' laca nu nda Ni ji'na yala la, cha' caca cuayá' ti' na cha' chañi cha' cua'ni Ni lo'o na ñi'ya̱ nu nacui̱ Ni cha' cua'ni Ni lo'o lcaa ñati̱ ji'i̱ Ni; ndyu'ni Xtyi'i ycui' Ni cha' taca ca cuayá' ti' na cha' tye cua'ni lyaá lyiji Ni ji'i̱ lcaa na nu ngusñi na cha' ji'i̱ Ni. ¡Bi' cha' ntsu'u cha' cua'ni tlyu na ji'i̱ ycui' Ni, cha' tlyu tsa cha' tso'o nu ndyu'ni Ni lo'o na!
Cua nti' Pablo cha' tso'o la caca cuayá' ti' ngu' cha' ji'i̱ Cristo
15Cua ndyuna na' ñi'ya̱ nu ndyu'ni ma̱ tya lo'o ngusñi tso'o ma̱ cha' ji'i̱ Jesús nu Xu'na na; nacui̱ ngu' cha' ntsu'u tsa tyiquee ma̱ ña'a̱ ma̱ ji'i̱ ñati̱ tya'a ngusñi ma̱ cha' ji'i̱ ycui' Ndyosi. 16Bi' cha' juani, tsa cu' ti ndya na' xlya'be ji'i̱ ycui' Ndyosi xqui'ya cu'ma̱; ndyi'u ti' na' ji'i̱ ma̱ laja lo'o nga'a̱ na' ndyu'ni tlyu na' ji'i̱ ycui' Ndyosi. 17Tlyu tsa cha' tso'o ntsu'u ji'i̱ ycui' Ndyosi Sti na, la cui' ycui' Ndyosi nu laca Sti Jesucristo nu Xu'na na. Nchcui' na' lo'o Ni cha' ta Ni Xtyi'i ycui' Ni ji'i̱ ma̱, cha' jua'a̱ ca cuayá' ti' ma̱ lcaa cha' li'; culu'u Xtyi'i ycui' Ni ji'i̱ ma̱ ñi'ya̱ laca ycui' Ni, lo'o li' taca tyuloo tso'o la ma̱ ji'i̱ ycui' Ndyosi. 18Lo'o jua'a̱ nchcui' na' lo'o Ni cha' saala Ni hique ma̱, cha' ca cuayá' tso'o ti' ma̱ ña'a̱ cha' tso'o nu tyacua ji'i̱ ma̱ juani, cha' cua ngusubi Ni ji'i̱ ma̱; tlyu tsa cha' tso'o cua nacui̱ Ni cha' tyacua ji'i̱ ma̱, lo'o ji'i̱ lcaa ñati̱ nu ngusñi cha' ji'i̱ Ni. 19Nchcui' na' lo'o Ni cha' ca cuayá' tso'o ti' ma̱ lcaa cha' nu nchcui' na' re, cha' ndu'ni tsa Ni cña ne' cresiya ji'na, lcaa na nu ngusñi na cha' ji'i̱ Ni. Cña nu ndu'ni Ni lo'o na cha' caca na ñati̱ ji'i̱ Ni, 20la cui' tya'a cña tonu laca, ñi'ya̱ nu ngua'ni Ni nu lo'o nda Ni xtyi'i ñaa ne' cresiya ji'i̱ Cristo chaca quiya', cha' tyu'ú yu nu lo'o ngujuii yu; tiya' la li' ndyalo'o Ni ji'i̱ yu cha' ndyaa tucua yu la'a tsu' cui̱ ca su ntucua ycui' Ndyosi, ca chaca chalyuu tso'o la hasta ca nde cua̱. 21Ca bi' laca Cristo loo la ji'i̱ lcaa ñati̱; nga'aa ntsu'u nu tlyu la que Cristo ca bi', nga'aa ntsu'u nu culo cña ji'i̱ yu. Ná ntsu'u chaca xu'na ñati̱ nde chalyuu nu taca tyiji̱loo ji'i̱ Cristo; la cui' ti ca chaca chalyuu ca nde cua̱ ni, ná ntsu'u cui'i̱ cuxi, ni ná ntsu'u ñati̱ cuentya ji'i̱ ycui' Ndyosi nu taca tyiji̱loo ji'i̱ Cristo. 22Cua nda Ni lcaa na tsiya' ti ji'i̱ Cristo cha' culo yu cña ji'i̱. Lo'o li' xqui'ya cha' laca yu Xu'na lcaa ca chalyuu, bi' cha' ngusta Ni ji'i̱ Cristo cha' caca yu loo ji'i̱ lcaa taju ñati̱ nu ngusñi cha' ji'i̱ Cristo cua ña'a̱ ca quichi̱ su ndi'i̱ ngu'. 23Ca ta'a na nu ngusñi na cha' ji'i̱ Cristo scaa quichi̱, tsa tlyu ti na ntsu'u cha' ji'na lo'o Cristo. Ndi'ya̱ laca na cuentya ji'i̱ Cristo: ñi'ya̱ nti' si laca na sca tsu' ya' Cristo, cha' cua'ni na cña nu ntsu'u ji'i̱ Ni chalyuu. La cui' jua'a̱, lcaa ca na nu ña'a̱ na nu ntsu'u nde chalyuu ni, cua ntsu'u bi' xqui'ya Cristo.
Currently Selected:
EFESIOS 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.