EFESIOS 2
2
Ngua'ni lyaá Cristo ji'na jua'a̱ ti, cha' ntsu'u tsa tyiquee Ni ña'a̱ Ni ji'na
1Cua nda ycui' Ndyosi chalyuu ji'i̱ ma̱ chaca quiya' xqui'ya cha' cua ndyu'ú Cristo chaca quiya'. Nu ngua tsubi' la, ñi'ya̱ laca si na cua ndye chalyuu ji'i̱ ma̱, jua'a̱ ngua ma̱ xqui'ya qui'ya nu ntsu'u ji'i̱ ma̱ lo'o ycui' Ndyosi, cha' ná ndaquiya' ma̱ tsiya' ti ji'i̱ cha' nu nchcui' ycui' Ndyosi. 2Nu ngua tyempo bi', ndya'a̱ tsa ma̱ ndu'ni ma̱ cua ña'a̱ ca cha' cuxi nu ndu'ni ñati̱ chalyuu; ndaquiya' tsa ma̱ ji'i̱ nu xña'a̱ nu laca loo ji'i̱ lcaa cui'i̱ cuxi nu ndya'a̱ nde chalyuu, la cui' nu cuxi bi' laca nu ndatsaa ji'i̱ ñati̱ chalyuu cha' ná taquiya' ngu' ji'i̱ ycui' Ndyosi. 3Ca ta'a na ni, chañi cha' ñi'ya̱ nu ndaquiya' ngu' bi' ji'i̱ nu cuxi, jua'a̱ ngua'ni na tya tsubi' la; ngua'ni na cua ña'a̱ ca cha' cuxi nu ndijña ti' cresiya ji'na. Na laca nu ngua ti' ycui' ca na cha' cua'ni na, ngua'ni na ji'i̱ li'; cua ña'a̱ ca cha' cuxi nu ngua'ya hique ti na, ngua'ni na cha' bi'. Bi' cha' ndyanu cha' xcube' ycui' Ndyosi ji'na, cha' ñasi̱' tsa Ni xqui'ya cha' cuxi nu ngua'ni na lo'o Ni; stu'ba ti xcube' Ni ji'na lo'o cua ña'a̱ ca ñati̱ chalyuu li'.
4Pana ndyi'ya tsa ycui' Ndyosi cha' clyu ti' ji'na, cha' ntsu'u tsa tyiquee Ni ña'a̱ Ni ji'na; 5bi' cha' nda ycui' Ndyosi chalyuu ji'na chaca quiya', xqui'ya cha' cua ndyu'ú Cristo chaca quiya'. Cua ndye chalyuu ji'na ngua ti' na nquicha', xqui'ya cha' ná ndaquiya' na ji'i̱ cha' nu nchcui' ycui' Ndyosi; pana xqui'ya cha' xcui' tya'na tsa ti' Ni ña'a̱ Ni ji'na, bi' cha' cua ngulaá na ji'i̱ nu cuxi, cha' cua ngüityi̱ Ni qui'ya nu ntsu'u ji'na. 6Cua chcuna' ti cresiya ji'na nquicha', lo'o li' cua ngua'ni lyaá Ni ji'na, cha' cua ngua stu'ba cha' ji'na lo'o Jesús. Ñi'ya̱ lo'o nda Ni xtyi'i ñaa ne' cresiya ji'i̱ Jesucristo chaca quiya', cha' tyu'ú yu nu lo'o ngujuii yu, jua'a̱ ngua'ni Ni lo'o na, cha' clyaá na ji'i̱ nu cuxi. Cua nti' Ni cha' caca stu'ba cha' ji'na lo'o Jesús, masi chalyuu juani, masi ca chaca chalyuu tso'o la nde cua̱ ca su laca ycui' Ni loo. 7Sca ti quiya' ngua'ni Ni lcaa cha' bi', cha' ca cuayá' ti' lcaa ñati̱ nu ca̱a̱ chalyuu nde loo la cha' ntsu'u tsa tyiquee Ni ña'a̱ Ni ji'i̱ ñati̱ chalyuu. Xqui'ya cha' ntsu'u tsa tyiquee Jesucristo ña'a̱ Ni ji'na, bi' cha' ca cuayá' ti' na cha' ná ntsu'u su tye cha' ndu'ni tso'o ycui' Ndyosi lo'o na; 8na cua ngulaá na ji'i̱ nu cuxi, xqui'ya cha' jua'a̱ ti ndu'ni Ni cha' tso'o lo'o na lo'o ngusñi na cha' ji'i̱ Cristo. Ni si'i sca cña nu ngua'ni ycui' ca na laca bi', sca cha' tso'o nu ngua'ni ycui' Ndyosi cuentya ji'na jua'a̱ ti laca bi'. 9Ná caca chcui' tyucuaa ti' ma̱ lo'o xa' ñati̱ lacua, cha' si'i cu'ma̱ nu ngua'ni cha' tlyu bi', cha' jua'a̱ ndyaca ji'i̱ ma̱ juani. 10Na cua ngüiñá Ni ji'i̱ ca ta'a na, cua ngua'ni stu'ba Ni cha' ji'na lo'o Jesucristo; juani cua nti' Ni cha' xcui' cha' tso'o ti cua'ni na lo'o ndi'i̱ na chalyuu, cha' cua laca nda Ni cña tso'o nu taca cua'ni sa scaa na nde chalyuu.
Ngua'ni Jesús cha' sca ti ñati̱ laca na
11Cu'ma̱ tya'a ngusñi na cha' ji'i̱ Cristo, tyi'u ti' ma̱ ñi'ya̱ ngua ji'i̱ ma̱ tya tsubi' la; xa' lo ñati̱ laca ma̱ tyempo bi', xa' quichi̱ tyijyu' la ngula ma̱, ná stu'ba tsiya' ti cha' ji'i̱ ma̱ lo'o ngu' judío tya'a na' nu ngua li'. Ndu'ni ngu' judío ji'i̱ ma̱ cha' laca ma̱ ñati̱ nu ná ngulacua̱ Ni ji'i̱; pana ycui' ngu' judío ni, cua ngulacua̱ Ni ji'i̱ ngu', nacui̱ ngu'. Nu ngulacua̱ ngu' bi' ni, bi' laca sca cuayá' su nsi'yu ngu' judío quiji̱ ngu' qui'yu sñi' ngu'. 12Ñati̱ nu ndi'i̱ xa' chalyuu laca cu'ma̱, bi' cha' ná stu'ba cha' ji'i̱ ma̱ lo'o ngu' judío, nu ngu' nu cua ngusubi ycui' Ndyosi ji'i̱ nu ngua sa'ni, cha' caca ngu' bi' ñati̱ ji'i̱ Ni. Ni sca quiya' sa'ni la ná nda Ni cha' lo'o cu'ma̱ ngu' xa' tsu'; ná ntsu'u cha' tso'o nu caca ji'i̱ ma̱ nde loo la, cha' ná jlo ti' ma̱ ni sca cha' ji'i̱ ycui' Ndyosi tsiya' ti chalyuu bi' ca su ndi'i̱ ma̱. Ná ntsu'u cha' ji'i̱ cu'ma̱ lo'o Cristo tsiya' ti nu ngua tsubi'.
13Pana juani xa' ña'a̱ cha' ndyaca ji'i̱ ma̱, tya lo'o ngua stu'ba cha' ji'i̱ ma̱ lo'o Jesucristo. Nu ngua sa'ni la, ná nslo ma̱ ji'i̱ ycui' Ndyosi tsiya' ti; tyijyu' tsa ntucua ycui' Ndyosi ca su ndi'i̱ ma̱, ngua ti' ma̱. Pana juani cacua tsa ntucua ycui' Ndyosi ji'i̱ ma̱; cua nguije Ni ji'i̱ ma̱, xqui'ya cha' ngujuii nu Cristo bi' lo crusi. 14Cristo laca nu ngua'ni cha' ngua ti̱ cha' ji'na lo'o ycui' Ndyosi, lo'o jua'a̱ ngua'ni Cristo cha' nguaala' cha' ji'i̱ ngu' judío tya'a na' lo'o ngu' xa' tsu' tya'a ma̱; bi' cha' juani cua ndyaca na sca ti ñati̱. Sa'ni la cua ntsu'u sca cha' nu ndaca'a ji'na; ndatsaa tsa cha' bi' ji'na cha' ná cua'ni tya'a ngu' judío tya'a na' lo'o xa' ñati̱ tsiya' ti, cha' ná nchca tyaala' cha' ji'i̱ ya lo'o ngu' xa' tsu'. 15La cui' cha' cusu' nu jlya tsa ti' nu ngu' judío tya'a na' ji'i̱, bi' laca nu nñilo'o ji'i̱ ya cha' ná ca ti̱ cha', cha' ntsu'u tsa su ndatsaa cha' bi' ji'i̱ ya. Pana cua ngua'ni tye Jesús ji'i̱ cha' cusu' bi', nu lo'o ngujuii yu lo crusi; bi' cha' tyucuaa lo ñati̱ na, cua ndyaca na chaca tya ñati̱ juani, xqui'ya cha' cua ngua stu'ba cha' ji'na lo'o ycui' Ndyosi. Lo'o jua'a̱ ndu'ni Ni cha' caja ñi'ya̱ caca tyi'i̱ ti̱ ti na lo'o Ni, jua'a̱ lo'o tya'a ñati̱ na. 16Lo'o jua'a̱ ngua cha' ngua'ni tye Cristo ji'i̱ cha' cusu̱u̱ nu ntsu'u ji'i̱ ya lo'o cu'ma̱ ngu' xa' tsu', nu lo'o ngujuii yu lo crusi; juani ngua ti̱ cha' ji'i̱ tyucuaa lo ñati̱ na lo'o ycui' Ndyosi xqui'ya Cristo, cha' ngua'ni Cristo cha' ndyaca na sca ti ñati̱.
17Cua ñaa Cristo ni, nda yu sca cui̱i̱ nu tso'o tsa lo'o ngu' tya'a na, cha' ti̱ ti tyi'i̱ na lo'o ycui' Ndyosi, jua'a̱ lo'o tya'a ñati̱ na; cua nchcui' Cristo lo'o cu'ma̱ ngu' nu ndi'i̱ tyijyu', lo'o jua'a̱ cua nchcui' yu lo'o ngu' judío tya'a na' nu ndi'i̱ cacua ti. 18Lo'o juani ná ndu'ni cha' masi ngu' judío laca ya, masi xa' ñati̱ laca ma̱, sca ti lo ñati̱ laca na lo'o lcaa tya'a na xqui'ya Cristo, sca ti Xtyi'i ycui' Ndyosi ndu'ni cha' tyuloo na ji'i̱ Ni; 19bi' cha' juani nga'aa tyijyu' ycui' Ndyosi ji'i̱ cu'ma̱. Cuentya ji'i̱ ycui' Ndyosi ni, ná laca ma̱ ñi'ya̱ si laca ma̱ ngu' xta nu ndi'i̱ sca chalyuu tyijyu' nu si'i quichi̱ tyi ma̱; lcaa chacuayá' nu ntsu'u ji'i̱ ycui' Ni cua nda ycui' Ndyosi ji'i̱ ma̱ juani, cha' laca ma̱ ñati̱ ji'i̱ Ni. Stu'ba ntsu'u cha' ji'i̱ ma̱ lo'o lcaa ñati̱ nu ngusñi cha' ji'i̱ ycui' Ndyosi xa' quichi̱, bi' cha' laca ma̱ ñi'ya̱ nti' si stu'ba ti ndi'i̱ ma̱ lo'o ycui' Ndyosi. 20-21Lcaa cu'ma̱ nu ngusñi ma̱ cha' ji'i̱ Cristo, cua laca ma̱ tya'a na; sca ti Cristo laca nu ndulo tsa cha' ji'i̱ cuentya ji'na. Xqui'ya Cristo, bi' cha' cua ndyanu tso'o cha' ji'i̱ ma̱ lo'o ycui' Ndyosi; xqui'ya Cristo, bi' cha' cua ngujui cña nu cua'ni scaa ma̱, cha' caca ma̱ cña ji'i̱ Ni, cha' cua ngua stu'ba cha' ji'i̱ ma̱ lo'o Ni. Ñi'ya̱ nti' sca ni'i̱ nu tso'o tsa ndya', jua'a̱ nti' ma̱. Tachaa tsa ntsu'u quiya' ni'i̱ bi', cha' ntsu'u sca quee tlyu nu cui'ya ji'i̱, nu ta juersa ji'i̱ ni'i̱ bi'; chu̱' bi' lijya̱ ndya' ña'a̱ tsaca ni'i̱ li'. Nu ngu' nu ngua tsa'a̱ ji'i̱ Jesús tya clyo, lo'o jua'a̱ jyo'o cusu' nu ngua tu'ba ji'i̱ ycui' Ndyosi nchcui' Ni lo'o ñati̱ nu ngua sa'ni la, ngu' bi' laca nu ngusta su̱u̱ cha', cha' ngusñi ma̱ cha' ji'i̱ ycui' Ndyosi; pana sca ti Cristo laca nu ndulo la cha' ji'i̱ cuentya ji'i̱ ma̱. 22Cua ngua stu'ba cha' ji'i̱ ma̱ lo'o Cristo; bi' cha' juani lo'o cu'ma̱, lo'o lcaa xa' ñati̱ nu ngusñi cha' ji'i̱ ycui' Ndyosi, stu'ba ti taca ca stu'ba cha' ji'i̱ ma̱ lo'o ycui' Ndyosi. Lo'o li' taca tyi'i̱ ycui' Ndyosi lo'o ma̱, xqui'ya Xtyi'i ycui' Ni nu cua nda Ni ji'i̱ ma̱.
Currently Selected:
EFESIOS 2: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.