SAN JUAN 12
12
Nda'a̱ sca nu cuna'a̱ setye chu̱' quiya' Jesús
1Tya lyiji tya xcuá tsa̱ cha' caca ta'a pascua, li' ñaa Jesús nde quichi̱ Betania chaca quiya'. Laca Betania quichi̱ tyi Lázaro nu ngujuii tya tsubi' la, lo'o li' ngua'ni Jesús cha' ndyu'ú yu chaca quiya'. 2Li' nda ngu' sca si̱i̱ ji'i̱ Jesús, cha' tso'o tsa nti' ngu' cha' ndyalaa yu slo ngu'. Nda Marta na ndyacu ngu' li', lo'o jua'a̱ stu'ba ti ntucua Lázaro lo'o ngu' su ndyacu ngu' si̱i̱ lo'o Jesús. 3Li' ndyalaa lo'o María ji'i̱ sca lyura setye tyixi xtyi'i. Quiña'a̱ tsa nga'a̱ setye bi' ji'i̱, cha' tyucui setye ji'i̱ quixi̱' nardo laca. Li' nda'a̱ María setye bi' chu̱' quiya' Jesús, lo'o quicha̱' que ycui' María ngusube' chu̱' quiya' yu; tyucui ña'a̱ ni'i̱ ntyucua xtyi'i setye tyixi xtyi'i bi' li'. 4Nga'a̱ Judas sñi' Simón Iscariote lo'o ngu', cha' ñati̱ nu ndyaca tsa'a̱ ji'i̱ Jesús laca. La cui' bi' laca nu cujui' cresiya ji'i̱ Jesús ji'i̱ ngu' cuxi ca tiya' la. Na'a̱ nu Judas bi' ñi'ya̱ nu ngua'ni María, lo'o li' lye nchcui' ni cha' laca ngua'ni María jua'a̱:
5―¿Ni cha' laca ná ngua caya' setye tyixi xtyi'i ji'i̱ nu cuna'a̱ cua cha' caja cñi xtyucua ji'i̱ ngu' ti'i? ―nacui̱ nu Judas bi'―. Ná tyiquee' caja tyu̱u̱ mil paxu lo setye bi'.
6Cha' cuaana Judas, bi' cha' nacui̱ jua'a̱, si'i cha' tya'na ti' ji'i̱ ngu' ti'i. Ycui' ca Judas laca loo ji'i̱ cuiji̱ su ntsu'u cñi ji'i̱ ngu' tya'a ndya'a̱ lo'o Jesús, pana na ntyucuaana Judas cñi nu ntsu'u ji'i̱ lcaa ngu' bi'.
7―Ta ma̱ chacuayá' cua'ni nu cuna'a̱ cua jua'a̱ ―nacui̱ Jesús―. Na cua nguxco'o cho' setye bi' cha' cua'ni jo'o ji'i̱ ngu' lo'o cua ngulala ti xatsi' ngu' jna' ―nacui̱―. 8Lcaa tyempo ndi'i̱ ngu' ti'i lo'o ma̱ nde chalyuu, lcaa tsa̱ taca xtyucua ma̱ ji'i̱ ngu' bi' nquicha'; pana nu na' ni, ná tyu̱u̱ tsa̱ tyi'i̱ na' slo cu'ma̱.
Lo'o ji'i̱ Lázaro ngua ti' ngu' cujuii ngu' ji'i̱
9Ngujui cha' ji'i̱ ngu' cha' ndi'i̱ Jesús ca bi', lo'o li' ndyaa quiña'a̱ tya'a ngu' judío; tsa tlyu ti ngu' ndyaa na'a̱ ngu' ji'i̱ Jesús. Lo'o jua'a̱ nti' ngu' ña'a̱ ngu' ji'i̱ nu ngua jyo'o Lázaro bi', cha' ngua'ni Jesús cha' ndyu'ú chaca quiya'. 10Lo'o li' ngua'ni stu'ba sti jo'ó nu laca loo cha' ji'i̱ ngu' lo'o tya'a ngu', cha' lo'o ji'i̱ Lázaro cujuii ngu', 11cha' xqui'ya nu Lázaro bi', bi' cha' nguxtyanu quiña'a̱ tya'a ngu' judío ji'i̱ sti jo'ó, cha' ngusñi ngu' cha' ji'i̱ Jesús.
Ngua'ni chi̱ ngu' loo Jesús lo'o ndyalaa yu nde Jerusalén
12Quiña'a̱ tsa ñati̱ ndyaa ngu' ta'a bi'. Ca chaca tsa̱, li' ndyuna ngu' cha' cua lijya̱ ti Jesús nde Jerusalén; bi' cha' ngutu'u ngu' bi' ndyaa ngu' tsa tlyu ti cha' tyacua tya'a ngu' lo'o Jesús. 13Ndyaa lo'o ngu' ste' nga̱, lo'o jua'a̱ cui̱i̱ ngusi'ya ngu' li':
―Cua'ni tlyu na ji'i̱ ycui' Ndyosi Sti na ―nacui̱ ngu' ji'i̱ Jesús―. Culacua̱ Ni jinu'u̱ cha' lijya̱ nu'u̱ lo'o chacuayá' ji'i̱ ycui' nu Xu'na na. Masi juani ti, culacua̱ Ni jinu'u̱ cha' nu'u̱ laca Rey nu laca loo ji'i̱ ngu' Israel.
14Li' ngujui sca huru ji'i̱ Jesús, ndyaa tucua yu chu̱' huru bi', cha' ndi'ya̱ nscua cha' lo quityi cusu':
15Ná cutsi̱i̱ cu'ma̱ ngu' ca tyi quichi̱ Sión;
cua lijya̱ nu Xu'na ma̱,
ntucua yu chu̱' sca huru.
16Tyempo li' ná ngua cuayá' ti' ngu' cha' bi'. Pana ca tiya' la, lo'o cua ngua lcaa cha' tlyu nu ndyanu cha' cua'ni Jesús lo'o ya̱a̱ yu lo yuu, nu lo'o ngua tlyu Jesús ca su ntucua yu lo'o ycui' Ni nde cua̱, li' ndyi'u ti' ngu' nu ndyaca tsa'a̱ ji'i̱ yu, ndyi'u ti' ngu' ji'i̱ cha' nu nscua lo quityi bi' cua sa'ni la; ndyi'u ti' ngu' cha' la cui' jua'a̱ ngua ji'i̱ Jesús.
17Jua'a̱ ngua li'. Nu ñati̱ nu nguti'i̱ slo Jesús nu lo'o ngusi'ya Jesús ji'i̱ jyo'o Lázaro ca tyuquee su nguatsi' cha' tyu'ú Lázaro chaca quiya', nda ngu' cha' lo'o ngu' quichi̱ ñi'ya̱ nu ngua cha' bi'; 18bi' cha' ngutu'u ñati̱ quiña'a̱ bi', ndyaa ngu' cha' tyacua tya'a ngu' lo'o Jesús tyucui̱i̱, cha' cua ndyuna ngu' ñi'ya̱ ngua'ni Jesús cña tonu bi' lo'o Lázaro. 19Li' nchcui' ngu' fariseo lo'o tya'a ngu':
―Ña'a̱ ma̱ ji'i̱ yu bi'. ¿Ñi'ya̱ cua'ni na juani? Ná caca ji'na tsiya' ti tacu̱' na cha' ji'i̱ yu bi'. Tyucui ña'a̱ chalyuu ngusñi ngu' cha' ji'i̱ yu juani.
Lijya̱ xi ngu' xa' tsu' nclyana ngu' ji'i̱ Jesús
20Lo'o ngu' griego ndyalaa laja ñati̱ nu ndya'a̱ ta'a bi' nde Jerusalén. 21Ñaa xi ngu' griego bi' slo Felipe li'. Quichi̱ Betsaida laca quichi̱ tyi nu Felipe bi'; nde loyuu su cuentya Galilea, ca bi' ndi'i̱ quichi̱ bi'. Li' nchcui' ngu' bi' lo'o Felipe:
―Tyu'u cha' clyu ti' jinu'u̱, cusu', cua nti' ya tyacua tya'a ya xi lo'o Jesús ―nacui̱ ngu'.
22Li' ngutu'u Felipe ndyaa slo Andrés tya'a quichi̱ tyi; stu'ba ti ndyaa ngu', ndyaa cacha' ngu' ji'i̱ Jesús. 23Lo'o li' nda Jesús sca cha' lo'o ngu':
―Cua ndyalaa hora cha' caca tlyu ycui' na' lo'o cajaa na', na' nu cua lijya̱a̱ chalyuu cha' caca̱ ñati̱ ―nacui̱ Jesús―. 24Liñi tsa cha' nu ta na' lo'o ma̱ juani, cha' sca si'yu nu ndyataa ngu' ni, ñi'ya̱ laca sca si'yu trigo, tyanu si'yu bi' jua'a̱ ti si ná cataa ngu' ji'i̱ lo yuu ―nacui̱―. Lo'o cua ndyataa ngu' si'yu bi' lo yuu, li' catsu' scua' si'yu bi', ñi'ya̱ laca si na ngujuii ti. Pana nu lo'o tyucua si'yu bi', quiña'a̱ tsa si'yu tyu'u lo bi' li'. 25Jua'a̱ laca lo'o ñati̱ nu nti' xñi cha' 'na ―nacui̱ Jesús―. Cua ña'a̱ ca ñati̱ nu lye tsa ndu'ni tyaca'a ji'i̱ ycui' ca ngu', chcuna' chalyuu ji'i̱ ngu'; pana ñati̱ nu ná ntsi̱i̱ cajaa ngu' xqui'ya na', bi' laca nu caja chalyuu nu ná nga'a̱ cha' tye ji'i̱ ngu'. 26Lo'o nti' ñati̱ cua'ni cña 'na ―nacui̱ Jesús li'―, nga'a̱ cha' tsaa ngu' mala nti' na' cha' tsaa, cha' li' taca tyi'i̱ msu bi' 'na ca su ndi'i̱ ycui' na'; lo'o ycui' Sti Na' cua'ni chi̱ Ni loo ngu' nu cua'ni cña 'na li'.
Nda Jesús cha' lo'o ngu' cha' cua cajaa ti ycui' yu
27Tya nchcui' la Jesús lo'o ngu' li':
―Quiña'a̱ tsa cha' nclyacua ti' na' juani. ¿Ha tso'o la si jña na' ji'i̱ ycui' Ndyosi Sti na' cha' cua'ni Ni cha' ná tyacua cha' cuxi re 'na? Si'i, ná chcui' na' jua'a̱. Cua ndyalaa hora 'na juani cha' caca lcaa cña nu nga'a̱ cha' caca 'na.
28Li' nchcui' Jesús lo'o ycui' Ndyosi Sti yu:
―Sti na', tso'o la si caca tlyu ycui' nu'u̱.
Li' nguañi nchcui' ycui' Ndyosi nde cua̱. Ndi'ya̱ nchcui' Ni:
―Cua laca ndu'ni tlyu ngu' ji'i̱ ycui' ca na', lo'o jua'a̱ tya caca tlyu la na' chaca quiya' xqui'ya nu'u̱.
29Li' nacui̱ nu ñati̱ quiña'a̱ nu ndi'i̱ cacua ti cha' nguañi nchcui' tyi'yu, ngua ti' ngu'. Xa' la ñati̱ nacui̱ cha' nde cua̱ ndyu'u cha' nu nda sca xca̱ ji'i̱ ycui' Ndyosi lo'o Jesús. 30Pana ndi'ya̱ nacui̱ ycui' Jesús:
―Xqui'ya cu'ma̱ laca cha' nguañi nchcui' ycui' Ndyosi nde cua̱, si'i xqui'ya na' ―nacui̱ Jesús―. 31Cua ndyalaa hora cha' cua'ni cuayá' Ni ji'i̱ lcaa ñati̱ chalyuu, nu lo'o tyiji̱loo na' tsiya' ti ji'i̱ nu xña'a̱ nu laca loo nde chalyuu ―nacui̱ Jesús ji'i̱ ngu'―. 32Lo'o sicua̱ ngu' cuxi jna' ca su ndi'i̱ na' lo yuu, cujui'i̱ ca'a̱ ngu' jna' lo crusi, li' cuane na' ji'i̱ lcaa ñati̱ cha' xñi ngu' cha' 'na.
33Jua'a̱ nacui̱ Jesús cha' caca cuayá' ti' ngu' ñi'ya̱ nu caca lo'o cujuii ngu' ji'i̱ yu. 34Li' nguxtyacui ngu' cha' lo'o Jesús:
―Cua ndyuna ya lo'o nchcui' ngu' lo quityi cusu' ji'na, cha' ndi'ya̱ nscua, cha' ná nga'a̱ cha' tye tsa̱ ji'i̱ Cristo, nu ñati̱ tlyu nu ta ycui' Ndyosi ji'i̱ lijya̱ ―nacui̱ ngu'―. ¿Ñi'ya̱ ndyu'u cha' nu nchcui' nu'u̱ cha' ntsu'u cha' cujui'i̱ ca'a̱ ngu' ji'i̱ lo crusi, ji'i̱ Cristo nu ya̱a̱ chalyuu cha' caca ñati̱? ¿Ñi'ya̱ ña'a̱ ñati̱ laca nu Cristo bi'?
35Li' nguxtyacui Jesús cha' lo'o ngu':
―Tya xi ca tsa̱ tya tyi'i̱ na' slo cu'ma̱, na' nu ta̱ xee nu tyu'ú ne' cresiya ji'i̱ ñati̱ ―nacui̱ Jesús―. Bi' cha' juani yaa ma̱ su nga'a̱ cha' tsaa ma̱ lo'o tya xee ti, cha' ná cua'ni nu cuxi ngana ji'i̱ ma̱, nu cuxi nu nda talya chalyuu. Nu lo'o talya ña'a̱ su ndya'a̱ na, ná jlo ti' na ma nde ndya'a̱ na li'. 36Lo'o jua'a̱ cu'ma̱ ―nacui̱ Jesús ji'i̱ ngu'―, tso'o la si xñi ma̱ cha' jna' laja lo'o tya ndi'i̱ na' chalyuu, na' nu ta̱ xee nu tyu'ú ne' cresiya ji'i̱ cu'ma̱ ñati̱ chalyuu. Li' tyucui tyiquee ma̱ caca ma̱ ñati̱ ji'i̱ ycui' Ndyosi.
Ndye nchcui' Jesús jua'a̱ lo'o ngu', li' ngutu'u yu ndyaa yu ca su ná quije yu ji'i̱ ngu'.
Su̱u̱ cha' xqui'ya bi' ná jlya ti' ngu' judío ji'i̱ Jesús
37Masi cua ngua'ni Jesús quiña'a̱ cha' tlyu slo ñati̱ bi', ná ntaja'a̱ ngu' xñi ngu' cha' nu nchcui' yu. 38Jua'a̱ ngua cha' caca lcaa cha' nu nguscua jyo'o Isaías lo quityi ji'i̱ ycui' Ndyosi cua sa'ni la:
Ndyosi Xu'na na', nacui̱ lo quityi bi' ji'i̱, ná ntaja'a̱ ngu' re xñi ngu' cha' jinu'u̱, cha' nu nda ya lo'o ngu'.
Ná ngua cuayá' ti' ngu' tsiya' ti si nu'u̱ ndu'ni cha' tlyu slo ngu'.
Jua'a̱ laca cha' nu nscua lo quityi bi'. 39Bi' cha' ná ngua ji'i̱ ngu' judío bi' xñi ngu' cha' ji'i̱ Jesús. Lo'o jua'a̱ ntsu'u chaca cha' nu nguscua jyo'o Isaías bi':
40Cua ndacu̱' ycui' Ndyosi hique ngu' bi', ngua'ni Ni cha' cu'u̱ ti hique ngu' bi'.
Jua'a̱ ngua cha' ná ña'a̱ ngu' ni cha' laca bi', cha' ná caca cuayá' ti' ngu' cha' bi'.
Lo'o jua'a̱ ná ntaja'a̱ ngu' culochu̱' ngu' ji'i̱ cha' cuxi nu ntsu'u tyiquee ngu',
bi' cha' ná nchca cui'ya na' cha' clyu ti' ji'i̱ ngu' ji'i̱ cha' cuxi bi' li', nacui̱ ycui' Ni.
41Nguscua jyo'o Isaías jua'a̱ cha' cua ngua tii cha' tlyu tsa caca nu Cristo; cha' ji'i̱ ycui' yu bi' nchcui' jyo'o Isaías li'.
42Lo'o jua'a̱ ngua, ndi'i̱ xi ngu' nu laca cña nu jlya ti' ji'i̱ Jesús; pana ntsi̱i̱ ngu' bi' ji'i̱ ngu' fariseo, bi' cha' ná ntaja'a̱ ngu' chcui' ngu' cha' ji'i̱ Jesús ca slo ñati̱. Ntsi̱i̱ ngu' si cua'a ngu' fariseo ji'i̱ ngu' cha' nga'aa ca tsaa ngu' ne' laa ji'i̱ tya'a ngu' judío. 43Ndiya la ti' ngu' bi' cha' tso'o ti chcui' ñati̱ chalyuu cha' ji'i̱ ycui' ngu'. Ná nti' ngu' cha' caca tso'o tyiquee ycui' Ndyosi ña'a̱ Ni ji'i̱ ngu'.
Tilaca laca nu sta qui'ya ji'i̱ ñati̱ chalyuu
44Li' cui̱i̱ tsa nchcui' Jesús lo'o ngu':
―Nu lo'o ngusñi ñati̱ cha' jna' ni, si'i ji'i̱ sca ti na' jlya ti' ngu' bi' li'; lo'o ji'i̱ ycui' Ndyosi nu nda 'na lijya̱a̱ nde chalyuu xñi ngu' cha' li' ―nacui̱―. 45Lo'o ña'a̱ ñati̱ jna', li' ña'a̱ ngu' ji'i̱ ycui' Ni nu nclyo cña jna'. 46Cua lijya̱ na' chalyuu cha' caca na' ñi'ya̱ laca sca xee nu tyu'ú ne' cresiya ji'i̱ ñati̱. Lo'o xñi ñati̱ cha' jna', li' nga'aa tyi'i̱ ngu' chalyuu ñi'ya̱ laca si ná ntsu'u xee ne' cresiya ji'i̱ ngu' xqui'ya cha' cuxi nu ndu'ni ngu'. 47Nda na' cha' lo'o ngu'; pana si cuna ngu' cha' bi', lo'o li' ná taquiya' ngu' ji'i̱ cha' bi', si'i na' nu sta̱ qui'ya ji'i̱ ngu' bi' li' ―nacui̱ Jesús―. Ná lijya̱ na' cha' cua'ni cuayá' na' ji'i̱ ñati̱ chalyuu; cha' cua'ni lyaá na' ji'i̱ ngu', bi' cha' lijya̱ na'. 48Pana cua ndyuna ñati̱ lo'o nchcui' na' lo'o ngu'; bi' laca cha' nu tyanu cuentya ji'i̱ ngu', nu lo'o cua'ni cuayá' ycui' Ndyosi ji'i̱ ngu' lo'o cua ndye chalyuu ―nacui̱ Jesús―. Ca li' cua'ni cuayá' Ni ji'i̱ lcaa ñati̱ nu ná ndaquiya' ji'i̱ cha' nu nchcui' na', nu ná ntaja'a̱ xñi cha' nu nchcui' na' lo'o ngu'. 49Si'i chacuayá' ji'i̱ ycui' ca ti na' nchcui' na' lo'o ñati̱; ycui' Ndyosi Sti na' nu cua nda jna' lijya̱a̱ chalyuu, bi' laca nu ngulo cña 'na ñi'ya̱ cha' nu ta na', ñi'ya̱ ña'a̱ cha' nu chcui' na' lo'o ñati̱ ―nacui̱ yu―. 50Jlo ti' na' cha' talo tsa lcaa cña nu nda Sti na' cha' cua'ni ma̱, ná nga'a̱ cha' tye chalyuu ji'i̱ ma̱ si taquiya' ma̱ ji'i̱ cha' bi' ―nacui̱ Jesús ji'i̱ ngu'―. Bi' cha' tsa ña'a̱ cha' nu cua nchcui' Sti na' lo'o na', bi' laca cha' nu nchcui' na' lo'o ma̱ juani.
Currently Selected:
SAN JUAN 12: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.