SAN JUAN 13
13
Ngui'í̱ Jesús quiya' ngu' nu ndyaca tsa'a̱ ji'i̱
1Tyucuaa tsa̱ tya lijyi cha' caca ta'a pascua bi'; jlo ti' Jesús cha' cua ngulala tyempo ji'i̱, cha' tyu'u yu chalyuu re tyaa yu ca slo ycui' Ndyosi Sti yu. Xcui' cua ntsu'u tsa tyiquee Jesús ña'a̱ ji'i̱ ñati̱ chalyuu nu ngusñi cha' ji'i̱ yu; lo'o ña'a̱ ti tya ntsu'u tsa tyiquee yu ña'a̱ yu ji'i̱ ñati̱ bi' li', ña'a̱ cuayá' nu tye chalyuu ji'i̱.
2Laja li' cua ngua'ni nu xña'a̱ cha' ngua'ya cha' hique Judas sñi' Simón Iscariote cha' cujui' cresiya ji'i̱ Jesús ji'i̱ ngu' cuxi. 3Jlo ti' Jesús cha' lcaa cha' nu ntsu'u ji'i̱ ycui' Ndyosi Sti yu cua nda Ni ji'i̱ yu. Lo'o jua'a̱ jlo ti' yu cha' cua ngutu'u yu ca slo ycui' Ndyosi ya̱a̱ yu chalyuu, cha' cua tyaa ti yu ca slo ycui' Ndyosi chaca quiya'. Masi jlo ti' Jesús cha' bi', 4pana ndatu̱ Jesús to' mesa laja lo'o ndyacu ngu' si̱i̱, ngulo yu late' tyucui̱ nu lacu' yu, ndaya' yu chaca late' cha' sca̱' yu sii' yu; 5li' ngujui'i̱ yu hitya ne' sca tsi'yu, ndyaa ngui'í̱ yu quiya' ngu' nu ndyaca tsa'a̱ ji'i̱, nguxquityi yu quiya' ngu' lo'o late' nu ndyaaca̱' sii' yu.
6Lo'o ndyalaa Jesús ca su ntucua Simón Pedro, li' nchcui' Pedro lo'o yu:
―¿Ha nu'u̱, cusu'? ¿Ha qui'í̱ nu'u̱ quiya' na'? ―nacui̱ Pedro ji'i̱.
7―Ná nchca cuayá' ti' nu'u̱ juani ni cha' laca ndyu'ni na' jua'a̱ ―nacui̱ Jesús ji'i̱―, pana ca tiya' la xi caca cuayá' ti' nu'u̱.
8―Ná caja chacuayá' jinu'u̱ qui'í̱ nu'u̱ quiya' na' tsiya' ti ―nacui̱ Pedro li'.
Nguxtyacui Jesús cha' lo'o Pedro li':
―Ná caca tyu'u cha' jinu'u̱ lo'o na' si ná qui'í̱ na' quiya' nu'u̱ ―nacui̱ yu.
9―Tso'o lacua, cusu' ―nacui̱ Simón Pedro li'―. Si'i quiya' ti na' qui'í̱ nu'u̱ lacua, lo'o ya' na' lo'o scua' que na' xcaata nu'u̱.
10―Lubii tsa tyucui ña'a̱ na si cua ndyaata na chcu ―nacui̱ Jesús li'―, nga'aa nti' na caata na chcu chaca quiya' li'. Pana quiya' ti na tyaati̱ lo'o tyatí̱ na ni'i̱. Lo'o jua'a̱ cu'ma̱, masi lubii tsa cresiya ji'i̱ ma̱, tya ntsu'u chaca yu laja cu'ma̱ nu ná lubii cresiya ji'i̱.
11Jua'a̱ nacui̱ Jesús: “Ntsu'u chaca yu laja cu'ma̱ nu ná lubii cresiya ji'i̱”, nacui̱, cha' cua jlo ti' Jesús tilaca laca nu cujui' cresiya ji'i̱ yu ji'i̱ ngu' cuxi.
12Lo'o ndye ngui'í̱ Jesús quiya' ngu', xa' ndyacu' ste' yu, xa' ndyaa tucua yu to' mesa. Li' nchcui' yu lo'o ngu':
―¿Ha ngua cuayá' ti' ma̱ na laca nu ngua'ni na' lo'o ngui'í̱ na' quiya' ma̱ jua'a̱? ―nacui̱ yu―. 13“Mstru”, ndu'ni ma̱ 'na; “Xu'na ya”, ndu'ni ma̱ 'na, lo'o chañi tsa cha' bi'. Jua'a̱ laca na' cuentya ji'i̱ ma̱ ―nacui̱ yu―. 14Na' nu laca̱ Xu'na ma̱, na' nu laca̱ Mstru ji'i̱ ma̱ ni, cua ngui'í̱ na' quiya' ma̱; bi' cha' jua'a̱ ntsu'u cha' qui'í̱ ycui' ma̱ quiya' tya'a ma̱ ―nacui̱ yu―. 15Ngua ti' na' cha' ña'a̱ ma̱ ñi'ya̱ nu ngua'ni na', cha' ñi'ya̱ ngua'ni na' lo'o nguxtyucua na' ji'i̱ ma̱, jua'a̱ ntsu'u cha' cua'ni ma̱ cha' xtyucua ma̱ ji'i̱ tya'a ma̱ ―nacui̱ Jesús ji'i̱ ngu' nu ndyaca tsa'a̱ ji'i̱―. 16Cha' liñi nchcui' na' lo'o cu'ma̱, cha' ñati̱ nu laca xu'na ngu', bi' laca loo ji'i̱ ngu', si'i msu nu laca loo; ñati̱ nu nclyo cña ji'i̱ nu tsaa lquichi̱, bi' laca loo, si'i nu ndya'a̱ lquichi̱ ti. 17Lo'o juani lo'o ngua cuayá' ti' ma̱ lcaa ña'a̱ cha' nu nda ca ti na' lo'o ma̱, tso'o tsa caca tyiquee ma̱ li', si taquiya' ma̱ ji'i̱ cha' bi' ―nacui̱―.
18’Ná nchcui' na' ji'i̱ lcaa cu'ma̱. Jlo ti' na' ti ji'i̱ ngusubi na' cha' caca tsa'a̱ ngu' jna' ―nacui̱ Jesús―. Tya sa'ni nguscua ngu' sca cha' ji'i̱ ycui' Ndyosi lo quityi ndi'ya̱: “La cui' ñati̱ nu stu'ba ndyacu tyaja lo'o na', bi' laca nu xu̱u̱ tya'a lo'o na' juani”; jlo ti' na' cha' nga'a̱ cha' caca cha' bi' ―nacui̱ Jesús―. 19Na nda ti na' sca cha' lo'o ma̱ juani, nu lo'o tya lyiji caca cha' bi'; lo'o cua ngua jua'a̱, li' caca jlya ti' ma̱ jna', cha' chañi cha' laca na' nu sca ti Sñi' ycui' Ndyosi nu lijya̱ chalyuu, ñi'ya̱ nu ni na' ji'i̱ ma̱. 20Ta na' sca cha' liñi lo'o ma̱ ―nacui̱ yu―. Nu lo'o taquiya' ma̱ ji'i̱ sca ñati̱ nu ta na' cha' tya'a̱ slo ma̱, li' stu'ba laca si taquiya' ma̱ jna'; lo'o taquiya' ma̱ jna', li' stu'ba laca si taquiya' ma̱ ji'i̱ ycui' Ndyosi Sti na' nu nda jna' lijya̱a̱.
Ndacha' Jesús ji'i̱ ngu' tilaca laca nu cujui' cresiya ji'i̱ yu ji'i̱ ngu' xña'a̱
21Lo'o nchcui' Jesús jua'a̱, ti'í tsa nti' cresiya ji'i̱ yu nda yu cha' lo'o ngu' bi':
―Liñi tsa cha' nu ta na' lo'o ma̱ juani, cha' ntsu'u sca ngu' tya'a ma̱ nu cujui' cresiya 'na ji'i̱ ngu' cuxi ―nacui̱ Jesús li'.
22Ndube tsa ti' ngu' nu ndyaca tsa'a̱ ji'i̱, nguxña'a̱ ngu' ji'i̱ tya'a ngu' li'; ná nda ngu' cuentya tsiya' ti ti ji'i̱ cha' nu nchcui' yu. 23Pana ntsiya tsaca lo ngoca' cacua ti su ntucua Jesús; tyaca'a tsa nu qui'yu bi' ji'i̱ Jesús, 24bi' cha' ngua'ni que ti Simón Pedro ji'i̱ yu bi', nchcuane ji'i̱:
―¿Ti ji'i̱ nchcui' nu cusu' lo'o nacui̱ jua'a̱?
25Bi' cha' ngusni yane nu qui'yu bi' nde chu̱' ña'a̱ ntsiya ti, cha' caca cacua la ji'i̱ Jesús. Li' nchcui' lo'o Jesús:
―Xu'na, ¿tilaca laca nu bi'? ―nacui̱.
26―Ndi'ya̱ cua'ni na' ―nacui̱ Jesús ji'i̱ li'―. Ta'a̱ na' sa yu'be tyaja 'na ne' ca'ña scuaa re. Ñati̱ nu ta na' yu'be tyaja bi' ji'i̱ cha' cacu, nu bi' laca nu ni na' ji'i̱ ma̱.
Li' nda'a̱ Jesús sa yu'be tyaja ne' ca'ña, nda ji'i̱ Judas, sñi' Simón Iscariote. 27Lo'o ngusñi Judas ji'i̱ tyaja bi', la cui' hora bi' ndyatí̱ ycui' nu xña'a̱ nu naa Satanás, ndyaa ne' cresiya ji'i̱ nu Judas bi'. Li' nacui̱ Jesús ji'i̱:
―Yaa clya nu'u̱ lquichi̱ cua hi̱.
28Ná tucui nu ntucua to' mesa ngua cuayá' ti' ni cha' laca nchcui' Jesús lo'o Judas jua'a̱. 29La cui' Judas laca nu laca loo ji'i̱ cujui̱ cñi nu tsa tlyu ntsu'u cñi ji'i̱ lcaa ngu' bi'; bi' cha' ntsu'u ngu' nu ngua ti' cha' cua ngulo Jesús cña ji'i̱ cha' tsaa cui'ya sca na nu cua'nijo'o ji'i̱ ngu' cha' caca ta'a; jua'a̱ ngua ti' xa' la ngu' cha' ntsu'u cña ji'i̱ Judas cha' tsaa ta msta̱ ji'i̱ ngu' ti'i. 30Bi' cha' lo'o ndye ndyacu Judas tyaja bi', ngutu'u ndyaa ña'a̱ talya ti li'.
Sca cña cucui cha' cua'ni na
31Lo'o ngutu'u Judas ndyaa, li' nchcui' Jesús lo'o ñati̱ nu ndyanu bi':
―Cua ndyu'ni ycui' Ndyosi cha' caca tlyu na', na' nu cua lijya̱a̱ chalyuu cha' caca na' ñati̱ ―nacui̱ yu―. Lo'o ji'i̱ ycui' Ni cua'ni tlyu ngu' xqui'ya na' ―nacui̱―. 32Nu lo'o ndu'ni na' cha' caca tlyu Sti na' xqui'ya cha' laca na' Sñi' ycui' Ni, la cui' jua'a̱ cua'ni Ni cha' caca tlyu la na'; yala ti cua'ni Ni jua'a̱. 33Sñi' na' ―nacui̱ Jesús ji'i̱ ngu' bi' li'―, tya xi ca tsa̱ tya tyi'i̱ na' nde chalyuu lo'o ma̱. Ñi'ya̱ nu ni na' ji'i̱ ngu' judío tya tsubi', la cui' ti cha' ta na' lo'o ma̱ juani: Tsaana ma̱ jna', pana ná caja chacuayá' tsaa ma̱ ca su tsa'a̱ ―nacui̱ yu―. 34Nde chcui' na' sca cña cucui lo'o ma̱ cha' cua'ni ma̱: Nga'a̱ cha' tso'o ti tyu'u tyiquee ma̱ ña'a̱ ma̱ ji'i̱ tya'a ñati̱ ma̱; ñi'ya̱ ntsu'u tsa tyiquee na' ña'a̱ na' ji'i̱ ma̱, la cui' jua'a̱ nga'a̱ cha' tyu'u tyiquee ma̱ ña'a̱ ma̱ ji'i̱ tya'a ñati̱ ma̱. 35Li' caca cuayá' ti' lcaa ñati̱ cha' ñati̱ nu ndyaca tsa'a̱ 'na laca ma̱, si tso'o ntsu'u tyiquee ma̱ ña'a̱ ma̱ ji'i̱ tya'a ñati̱ ma̱ ―nacui̱ Jesús.
Nacui̱ Jesús cha' cua xtyanu ti Pedro ji'i̱
36Li' nchcui' Simón Pedro lo'o Jesús:
―Xu'na ―nacui̱―, ¿macala tsaa nu'u̱?
―Ná caja chacuayá' cha' tya'a̱ nu'u̱ lo'o na' ca su tsa'a̱ ―nacui̱ Jesús―. Ca tiya' la tsaa nu'u̱.
37Li' nchcuane Pedro ji'i̱ yu:
―¿Ni cha' laca ná nti' nu'u̱ cha' tya'a̱ na' lo'o nu'u̱ ca su tsaa nu'u̱ juani ti? ―nacui̱―. Cajaa na' si caca clyaá ycui' nu'u̱.
38―¿Ha chañi hi̱ cha' tyaja'a̱ nu'u̱ cajaa cha' clyaá na'? ―nacui̱ Jesús ji'i̱―. Liñi tsa cha' nu ta na' lo'o nu'u̱ juani: Lo'o tya lyiji ti xi'ya ndye'e nde tlya, sna quiya' xacui̱ nu'u̱ cha' ji'i̱ ngu' cha' ná nslo nu'u̱ 'na.
Currently Selected:
SAN JUAN 13: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.