2 CORINTIOS 7
7
1Cu'ma̱ ngu' tya'a na, nu ntsu'u tsa tyiquee na' ña'a̱ na' ji'i̱ ma̱, jua'a̱ laca cha' nu cua nda ycui' Ndyosi lo'o na, cha' nu caca ji'na nde loo la. Bi' cha' lacua, ntsu'u cha' cua'ni tye na ji'i̱ lcaa cha' cuxi nu nti' cua'ni ñu'u̱ ji'i̱ cresiya ji'na, ji'i̱ tyucui ña'a̱ na. Lo'o jua'a̱ lye tsa cua'ni na cña cha' caca na ñati̱ ji'i̱ ycui' Ni; na laca nu cua'ni na nde chalyuu, cua'ni na ji'i̱ ñi'ya̱ nti' si cua ndu̱ ycui' Ndyosi ña'a̱ Ni ji'na.
Nguxtyanu ngu' cha' cuxi nu cua ngua'ni ngu'
2Cua'ni cho'o tyiquee ma̱ ña'a̱ ma̱ ji'i̱ ya lacua. Ni sca quiya' ná ngua'ni ya cha' cuxi lo'o cu'ma̱, ni scaa cu'ma̱ ná ngua'ni ñu'u̱ ya chalyuu ji'i̱ ma̱; ná ntsu'u mala su nñilo'o ya ji'i̱ ma̱, ni sca tya'a ma̱. 3Ná nti' na' sta na' qui'ya hichu̱' ma̱. Ndi'ya̱ nti' na' chcui' na' lo'o ma̱, ñi'ya̱ nu nacui̱ na' ji'i̱ ma̱ tsubi': lcaa tyempo ntsu'u tsa tyiquee na' ña'a̱ na' ji'i̱ cu'ma̱; masi cua ngujuii na, masi ña'a̱ ti tya tyiquee' tyi'i̱ na chalyuu, pana ña'a̱ ti stu'ba ntsu'u tyiquee na' lo'o cu'ma̱. 4Tso'o tsa nti' na' lo'o ndyi'u ti' na' ji'i̱ cu'ma̱, la cui' jua'a̱ nti' na' lo'o nchcui' na' cha' ji'i̱ ma̱ lo'o xa' ñati̱. Ña'a̱ ti ndyaca tlyu tyiquee na', ña'a̱ ti chaa ti ti' na' ndi'i̱i̱, masi cua ngua lcaa cha' ti'í bi' ji'i̱ ya.
5Tya lo'o ndyalaa ya ca loyuu su cuentya Macedonia re, nga'aa ngujui tyempo cha' chca'a̱ cña' ya tsiya' ti, cha' lcua ti se'i̱ tucui tsa cña ndyacua ji'i̱ ya. Lcaa se'i̱ su ndya'a̱ ya nda tsa ngu' cha' cusu̱u̱ lo'o ya, lo'o jua'a̱ hasta ca ne' cresiya ji'i̱ ya ndyatí̱ cha' ntsi̱i̱ ya. 6Pana ycui' Ndyosi ni, nda la Ni juersa ji'i̱ ñati̱ nu xñi'i̱ ti ti' nga'a̱; bi' cha' xa' juersa nda Ni ji'i̱ ya cha' caca nguula la tyiquee ya, xqui'ya cha' cua ndyalaa Tito ca nde. 7Lo'o jua'a̱ tso'o tsa cha' nu nda yu lo'o ya cuentya ji'i̱ cña nu ndyu'ni cu'ma̱; nacui̱ yu cha' cua nti' tsa cu'ma̱ ña'a̱ loo ma̱ ji'i̱ ya chaca quiya', lo'o jua'a̱ nacui̱ yu cha' ntyuju'u ti ti' ma̱ ndi'i̱ ma̱ xqui'ya cha' cuxi nu ngua ji'i̱ ma̱ tya li', nacui̱ yu cha' nga'aa ndiya ti' ma̱ cha' cuxi nu nchcui' ngu' 'na tsubi' la. Xqui'ya lcaa cha' bi', chaa la ti' na' ndi'i̱ na' juani.
8Chañi cha' ndube ti' na' cha' ngua xñi'i̱ xi ti' ma̱ xqui'ya quityi nu nguscua na' tya li', pana ná ntyuju'u ti' na'; ná tya'a̱chu̱' na' ji'i̱ cha' nu cua nguscua na' li', masi ntsu'u tsa̱ nu ntyuju'u ti' na' cha' nguscua na' cha' bi'. Jlo ti' na' cha' ngua xñi'i̱ ti' ma̱ nquicha', pana xtyi'i ti ngualo cha' bi'. 9Nu juani tso'o tsa ntsu'u tyiquee na' cha' cua ndaquiya' ma̱ cha' bi', cha' cua ngua xñi'i̱ xi ti' ma̱, lo'o li' nguxtyanu ma̱ cha' cuxi nu ngua'ni ma̱ tya li'. Ngua xñi'i̱ ti' ma̱ tu'ni, pana ngua ti' ycui' Ndyosi cha' caca tso'o ji'i̱ ma̱ lo'o cua ndye cha', bi' cha' si'i na cua ngunu'u̱ tyiquee ma̱ juani xqui'ya cha' ngua tyaala na' ji'i̱ ma̱ li'. 10Nu lo'o ndube ti' na ji'i̱ ycui' Ndyosi laja lo'o nga'a̱ na xñi'i̱ ti' na, li' caja ñi'ya̱ xtyanu na ji'i̱ cha' cuxi nu ndyu'ni na; clyaá na ji'i̱ nu cuxi li', nga'aa ntsu'u cha' culacua tsa ti' na li'. Pana ñati̱ nu xñi'i̱ xi ti', nu ná ndube ti' ji'i̱ ycui' Ndyosi ni, ná ntaja'a̱ ñati̱ bi' ca tyuju'u ti' ji'i̱ qui'ya nu ntsu'u ji'i̱; chcuna' chalyuu ji'i̱ ngu' bi' jua'a̱ ti li'. 11Culacua xi ti' ma̱ ñi'ya̱ ndyaca ji'i̱ ma̱ juani, tya lo'o ngua'ni na' cha' ngua xñi'i̱ ti' ma̱ nu ngua li': tyucui tyiquee ma̱ nclyacua ti' ma̱ juani, cha' cua nti' tsa ma̱ juani cha' tyu'u lubii ma̱ ji'i̱ cha' bi'; tsa cla'be ngua ñasi̱' ma̱, tsa cla'be ti ndyutsi̱i̱ ma̱, pana ndyi'u tsa ti' ma̱ jna' li', ña'a̱ cuayá' nu lye tsa ngua ti' ma̱ cha' ña'a̱ loo ma̱ 'na chaca quiya'; yala ti ngua ti' ma̱ chcube' ma̱ ji'i̱ yu nu ngua'ni cha' cuxi bi'. Jua'a̱ nchca cuayá' ti' ya cha' nga'aa ndyanu yabe' ji'i̱ ma̱ xqui'ya cha' cuxi bi'. 12Bi' cha' laca nguscua na' nu quityi bi'; si'i na ngulacua tsa ti' na' xqui'ya yu nu ngua'ni cha' cuxi bi', ni si'i na ngulacua tsa ti' na' xqui'ya ngu' nu ngua cuxi ji'i̱. Ngua ti' na' cha' culacua tso'o ti' ma̱ ji'i̱ cha' nu cua nchcui' ya lo'o ma̱, ñi'ya̱ laca si ndu̱ ycui' Ndyosi ña'a̱ Ni ji'na; bi' cha' nguscua na' quityi nu ndyaa slo ma̱ bi'. 13Lo'o nu juani tso'o la nti' ya cuentya ji'i̱ cu'ma̱.
Tso'o ti nti' ycui' ya lacua; lo'o jua'a̱ lye la chaa ti' ya juani cha' cua na'a̱ ya ji'i̱ Tito, cha' tso'o tsa ngua ti' yu. Ca ta'a cu'ma̱ ngua'ni ma̱ cha' ti̱ ti cresiya ji'i̱ yu ndyalaa yu juani. 14Lo'o tya ndi'i̱ yu ca slo na', cua ni na' ji'i̱ yu cha' tso'o tsa ngusñi ma̱ cha' ji'i̱ Jesús, lo'o jua'a̱ chañi tsa cha' bi'. La cui' jua'a̱ lcaa quiya' lo'o nchcui' ya, chañi tsa laca cha' ji'i̱ Jesús nu nchcui' ya lo'o ma̱; lo'o jua'a̱ chañi ngua cha' nu ni na' ji'i̱ Tito, cha' tso'o ti nti' ycui' ya ña'a̱ ya ji'i̱ ma̱. 15Tya cuayá' nu tso'o la ntsu'u tyiquee Tito ña'a̱ yu ji'i̱ ma̱ juani, nu lo'o ndyi'u ti' yu ji'i̱ lcaa cu'ma̱ cha' cua ndaquiya' tsa ma̱ ji'i̱ lcaa cha' nu cua nacui̱ yu ji'i̱ ma̱; na'a̱ yu cha' ndube tsa ti' ma̱ xqui'ya cha' nu cua nda yu lo'o ma̱, lo'o jua'a̱ ná nguxtyacui ma̱ xi xa' la cha' lo'o yu li'. 16Lo'o jua'a̱ na', tso'o tsa nti' na' juani cha' taca tyi'u ti' na' ji'i̱ cu'ma̱ jua'a̱.
Currently Selected:
2 CORINTIOS 7: cta
Highlight
Copy
Compare
Share
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.
