ÉFÉSUS 1
1
Tabé
1:1-2
1Oné-mai aku, hi Paulus, rasul di Kristus Yésus lorong ngoéng de Mori Keraéng, latang te méu sanggéd weki serani ata imbi hi Kristus Yésus oné béndar Éfésus. 2Widang agu hambor-libur oné-mai Mori Keraéng, Ema dité, agu oné-mai Mori Yésus Kristus loréng méuy.
Bora Disét Poli Piléd
1:3-14
3Naring ga Mori Keraéng, Emad Mori dité Yésus Kristus. Hia poli berkak itén le sanggéd widang nggeluk oné Surga, ai ité nai ca anggit agu hi Yésus Kristus. 4Létang laing Hia, Mori Keraéng poli pilé ité be bolon dédék lino, kudut ciri nggeluk agu toé manga celad. 5Ali momangN, sanggéd ité poli wérétd le Mori Keraéng te ciri anakN, pu’ung du wangkan lut hi Yésus Kristus, ai hitu muing ngoéng Diha. 6Naring ga Mori Keraéng hitut mengit, ai létang laing le Anak MomangN, Hia momang tu’ung itéy. 7Ai landing le mata di Kristus, ité célad le Mori Keraéng, ngong Hia poli ampongd sanggéd ndékok dité. 8Pandé hitu Diha ai momang tu’ung itéy, agu momangN hitu pati do latangt ité oné sanggéd nggalas agu anor. 9Lorong ngoéng de weki Run, Mori Keraéng poli si’ang oné ité latang te sanggéd situt pété ceha; lut nanéng agu lilekN. Poli wérétN Liha, nanéngN hitu te ciri jepeky lut hi Yésus Kristus. 10Ho’oy nanéngN hitu: sanggéd caoca, éta Surga ko oné lino, nai ca anggit agu hi Yésus Kristus tu’ad sanggéd caoca. 11Mori Keraéng poli dédék sanggéd caoca lorong ngoéng agu wérét Weki Run. Pu'ung du wangkan, poli pilé ité Liha te ciri ro'engN ai nai ca anggit agu hi Kristus. 12Wiga ité ata laring cain kéta bengkes oné hi Kristus, naring Mori Keraéng landing mengit Diha. 13Méu kolé ciri ro’éng Diham, ai méu poli dengé reweng molorN, ngong Keréba Di’a ata pandé selamak méu. Méu imbi oné Mori Yésus, landing hitu Mori Keraéng palas tarad le Nai Nggeluk hitut poli rekéN. 14Nai Nggeluk hitu dé pa’arn mbaté dité dengkir agu tiban sambé, wiga ité ciri paéng de Mori Keraéng latang te naring mengit Diha.
Ngaji Di Paulus
1:15-23
15Landing hitu, du poli dengén laku imbi de méu oné Mori Yésus agu momang de méu latang te sanggéd weki serani, 16aku kolé toé ké’ét te téti wali di’a landing méu. Aku nuk mtaung méu oné ngajig. 17Tegi kolé laku oné Mori dité Yésus Kristus, kudut Hia widang koé Nai Nggeluk te si’ang Mori Keraéng oné méu wiga méu pecing tu’ung Hiam. 18Aku gesar oné Mori Keraéng, kudut Hia pandé gérak nais, kudut ngancéng idep apa ata deming laingn oné-mai Mori Keraéng hitut poli bénta méuN. Te baé kolé le méu, co’o kéta penongn berkak ata manikn hitut poli ambin le Mori Keraéng latang te sanggéd weki serani. 19Lengn kolé mésén gori de Mori Keraéng ata penong kuasa oné weki dité ata imbi Hia. Kuasa de Mori Keraéng hitu cama ného kuasa hiot toé cung, 20hitut papé Liha du pandé to’o kolé hi Kristus oné-mai ata mataN agu téing osang baté lontoN oné racap wanang Diha éta Surga. 21Kuasa di Kristus hitu céwé langkas oné-mai sanggéd pemerénta ata cau kuasa, ata cau adak agu ata tu’a laing, ko céing kaut ata ciri tu’a laing, toé hanang mosé oné uwa te ho’on, maik agu mosé nggere-olon kolé. 22Mori Keraéng poli pandé kodad sanggéd cao-ca agu na’as be wa-mai wa’i di Kristus. Hia kolé téing hi Kristus oné weki serani te ciri Tu’a oné-mai sanggéd caoca. 23Weki serani situ ngong weki di Kristus, ata pandé jepek Liha te rapakd sanggéd cao-ca nia kaut wan.
Currently Selected:
ÉFÉSUS 1: BMNT
Highlight
Copy
Compare
Share
Want to have your highlights saved across all your devices? Sign up or sign in
Bahasa Manggarai New Testament © Indonesian Bible Society, 2013.
