Love Song 5
5
Guy:
1Eh sistah! I stay come inside my garden,
My bride, da one I love.
I bring my myrrh, an my balsam spice too.
I eat my honeycomb, an my honey too.
I drink my wine, an my milk too.
Frenz:
Eh ma frenz! Eat an drink!
You guys dat love each odda, drink plenny,
Till you come full.
Wahine:
2I stay sleep, but inside, jalike az one dream dat I stay awake.
Lissen up! Da one dat love me stay knocking!
He tell, “Eh sistah!
Honey Girl, open da door fo me!
You jalike my dove. You perfeck!
My head stay wet from da dew.
My hair stay wet from da nite air.”
3I tink: “I wen take off my robe awready.
I gotta put um back on one mo time, o wat?!
I wen wash my feets.
Now I gotta get um dirty one mo time, o wat?!”
4Da one dat love me wen put his hand thru da puka.
Inside, my heart start fo poun fo him!
5I get up fo open da door fo da one dat love me fo come inside.
My hands drip wit da myrrh perfume.
My fingas get da myrrh perfume running down um,
On top da handle fo da lock.
6I open da door fo da one dat love me,
But he wen turn go way awready. He no stay.
My heart drop cuz he no stay.
I wen go look fo him, but I no can find him.
I call him, but he no ansa me.
7Da guys dat guard da town wen find me
Wen dey stay go aroun check up da town.
Dey wack me. Dey bruise me.
An dey grab my coat an take um away,
Dass da guys dat guard da walls.
8Eh you wahines from Jerusalem,
I tell you guys fo make one promise,
If you guys find da one dat love me,
Wat you goin tell him?
Tell him dat I love him so plenny
Dat stay make me come weak!
Frenz:
9Eh! You da mos beautiful wahine!
How come you tink da one dat love you
Mo betta den da guys dat love odda wahines?
An how come you make us promise fo do dis stuff?
Wahine:
10Da one I love shine bright! He strong looking!
He mo betta den ten tousan oddas!
11His head jalike da bestes kine gold.
His hair stay curly,
An black jalike one raven bird.
12His eyes jalike doves
By da watta streams,
Jalike dey wash um wit milk
An put um by one full pool.
13Da beard on his cheeks smell nice,
Jalike gardens all pile up wit balsam spice bush.
His lips jalike lily flowas
Dat get myrrh kine perfume all ova.
14His arms look jalike gold rods
Dat get jewelry stones from Spain all ova um.
From da ches to da thighs, jalike one flat piece ivory dey polish,
Wit blue lapis lazuli kine stones all ova um.
15His legs look jalike poses, da kine dey make from marble stone
Dat sit on top pure gold bases.
Wen you look at him,
Make you tink a da awesome cedar trees Lebanon side.
16Inside his mout, stay sweet!
Eryting bout him, make me like take him!
Eh! You young Jerusalem wahines!
Dis one, da one I love, an he my fren too!
Currently Selected:
Love Song 5: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
