Love Song 1
1
1 #
1Kings 4:32
Dis, da bestes Solomon kine song.
Da wahine talk:
2I like fo you kiss me ova an ova!
Cuz wen you make love to me,
Az mo betta den wen I drink wine.
3Nice, how you smell.
Wen peopo use yoa name, az jalike dey stay pour out perfume kine oil.
Az why all da young wahines love you!
4Take me away wit you! Hurry up! Us go!
Eh! You my king guy! Bring me inside da bedroom!
Da frenz talk:
Us guys like dance an sing cuz a you!
We stay real good inside!
Us goin talk good bout how you guys make love togedda now,
Mo den we talk good bout da wine.
Wahine:
So az right, fo dem get plenny love an aloha fo you!
5Eh you young Jerusalem wahines!
Dark, but pretty,
How I stay look!
I dark jalike da dark tents da Kedar peopo use,
Jalike da kine cloth Solomon use fo cova his tent!
6No eye me up cuz I stay kinda dark.
Az da sun wen make me come real tan.
My muddah boys wen come huhu wit me.
An dey make me take kea dea grape fields,
So, az why I no can take kea my grape field, az my body!
7You, da one I love! Tell me,
Wea you goin take kea yoa sheeps?
Wea you goin bring dem fo res noon time?
No good I gotta put one veil on top my face fo go find you,
O I gotta go look nea yoa frenz sheeps, aah?
Da guy talk:
8You da mos beautiful wahine!
If you donno wea I goin stay,
Go follow wea da sheep footprints go.
Let yoa young goats eat grass ova dea,
Not far from wea da odda sheep guys stay make camp.
9Honey Girl, you da one I love!
An I like da way you walk,
Jalike one mare walk
Aroun da fancy kine horses
Dat pull da parade wagon fo da Egypt king.
10Yoa cheeks look good wit gold earrings,
An yoa neck wit one bead necklace.
11Us goin make roun gold earrings fo you,
Wit silva kine bead inside um.
Wahine:
12All da time my king guy lay on his couch
Real nice, my nard kine perfume smell!
13Fo me, da one dat love me,
Az jalike da small bag myrrh kine perfume
Dat stay res all nite in da middo a my breases.
14Fo me, da one dat love me,
He jalike one bunch henna flowas
From da grape farms En-Gedi side.
Guy:
15Eh! You look real beautiful, Honey Girl!
Real beautiful!
Yoa eyes pretty, jalike dove eyes.
Wahine:
16You da one I love. You real good looking!
You look real handsome.
An look! Da sof green grass hea, az oua bed!
Guy:
17Yeah, an da cedar trees, dey da beams fo oua bedroom.
An da cypress trees, dey da roof.
Currently Selected:
Love Song 1: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
