Songs 85
85
Da Peopo Pray Fo Dea Country
Fo da main music guy. One Korah ohana kine Song Fo God
1Eh! You Da One In Charge!
You like fo do good tings fo yoa land!
You wen make eryting come good
One mo time fo us Israel peopo!
2Da bad tings us Israel peopo wen do,
No was right.
But you wen hemo oua shame fo dat.
You wen take kea a all da bad tings
Dat us guys wen do.
(Time out fo da music.)
3Now you no stay huhu
Wit us guys no moa.
You pau go afta us
Jalike you still mad.
4Eh! You da God
Dat get us guys outa trouble.
Cuz a dat, go change yoa mind
An help us guys one mo time.
No stay sad inside
Bout us guys no moa.
5Goin be foeva dat you goin stay
Huhu wit us guys, o wat?
You goin go afta all da peopo
Dat goin come from us guys bumbye
Jus cuz you had it
Wit da kine stuff us guys stay do, o not?
6You goin make yoa peopo
Come alive one mo time,
Fo us guys stay good inside
Cuz a you, o not?
7Eh! You Da One In Charge!
Let us guys see how you stay tight
Wit yoa peopo,
An do someting fo get us outa trouble!
8I goin lissen real good
To wat God, Da One In Charge, tell.
He tell da peopo dat stay tight wit him
He goin make eryting go good fo dem.
But no good dey go do dumb tings
One mo time, you know!
9Fo shua, da peopo
Dat show God plenny respeck,
He goin get dem outa trouble
real quick kine.
Den, all ova oua land,
Goin come awesome.
10God, he erytime stay tight wit his peopo,
An same time,
His peopo erytime like do
Wat he trus dem fo do!
God, he erytime judge da right way,
An same time, eryting come pono
Fo his peopo!
11On top da earth, peopo come
So God can trus um,
An same time, God look down
From da sky
An make shua da right ting
Happen fo dem!
12An mo den all dis, Da One In Charge
Goin give good tings to us guys,
An oua land goin grow
Choke plenny stuff.
13Jalike God sen one messenja guy
Befo he come
Fo tell erybody, “Gotta do
Da right ting erytime!
Cuz Da One In Charge, he stay come!”
Currently Selected:
Songs 85: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible