Songs 70
70
Pray To Da One In Charge “Help Me!”
Fo da main music guy, one David kine song fo make sacrifice, fo God no foget him
1Eh God! Get me outa trouble!
Eh! You Da One In Charge!
Help me right now!
2Fo da peopo dat like kill me,
I like dem ony come shame.
Da ones dat feel good inside
Wen bad stuff happen to me,
I like God make dem turn aroun
An run away an lose face.
3Da ones dat tell me “Ahana kokolele!”
I like dey come shame to da max!
4All da peopo dat like know you
Fo real kine,
I like fo dem stay real good inside,
An dance an sing!
Da ones dat get love an aloha fo you
Cuz you get um outa trouble,
I like fo dem tell foeva,
“God, he da greates!”
5But me, pooa ting, I no mo notting!
I ony get hard time.
Eh God! Do someting fo me, right now!
Cuz you da one dat help me,
An make shua I get outa trouble.
You, you Da One In Charge!
No make me wait long time!
Currently Selected:
Songs 70: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
