Songs 54
54
God, Make Peopo Know I Neva Do Notting Bad!
One David kine song fo make peopo tink plenny. Fo da main music guy sing um wit string instruments. Come from da time da Zif peopo tell King Saul dat David stay hide nea dem.
1Eh God! Get me outa trouble,
Cuz dass da kine God you.
You one strong judge,
So tell peopo I neva do notting bad.
2Wen I pray, try lissen.
Hear wat I stay tell you.
3Cuz get peopo I donno
Dat stay come agains me.
Dese da kine guys dat no bodda dem wen dey hurt peopo.
Dey da ones dat like kill me!
An dey no give a rip bout you, God.
(Time out fo da music.)
4But God! you da one dat stay help me.
You da Boss dat hold me up
Fo me no fall down an mahke.
5Wateva da guys dat like kill me goin do,
I like you make dat kine bad stuff
Backfire on dem.
I stay trus you, so wipe um out!
6I goin make one sacrifice fo you,
Jus cuz I like do um.
I goin sing bout wat kine god you,
Cuz you good, Da One In Charge.
7You get me outa
All kine trouble awready,
An I wen see awready wat you do
Bout da peopo dat stay agains me.
Currently Selected:
Songs 54: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
