Songs 136
136
“Mahalo!” To Da One In Charge
1 #
1Rec 16:34; 2Rec 5:13; 7:3; Ezra 3:11; Songs 100:5; 106:1; 107:1; 118:1; Jer 33:11 All you guys! Tell good tings
Bout Da One In Charge, cuz he good,
Cuz he stay tight wit his peopo foeva!
2From all da odda gods,
God, he da importan one.
So tell good tings
Bout Da One In Charge,
Cuz he stay tight wit his peopo foeva!
3From all da bosses,
He da Boss dat get da powa.
So tell good tings
Bout Da One In Charge,
Cuz he stay tight wit his peopo foeva!
Da One In Charge Make Da World An Da Sky
4Da One In Charge, he da ony one
Dat do big an awesome kine tings,
Cuz he stay tight wit his peopo foeva!
5 #
Start 1:1
Cuz he erytime undastan wat fo do,
Dass how he wen make da sky,
Cuz he stay tight wit his peopo foeva!
6 #
Start 1:2
He wen spread out da groun
Mo high den da watta,
Cuz he stay tight wit his peopo foeva!
7 #
Start 1:16
Da One In Charge, he da one
Dat wen make da big lights in da sky,
Cuz he stay tight wit his peopo foeva!
8He put da sun in charge a da day time,
Cuz he stay tight wit his peopo foeva!
9He put da moon an stars
In charge a da nite time,
Cuz he stay tight wit his peopo foeva!
Da One In Charge Get His Peopo Outa Egypt
10 #
Outa 12:29
Da One In Charge, he wen kill
Da numba one boys fo da Egypt peopo,
Cuz he stay tight wit his peopo foeva!
11 #
Outa 12:51
Same time, he da One
Dat wen pull out da Israel peopo
From da Egypt peopo,
Cuz he stay tight wit his peopo foeva!
12He wen use his powa
From his strong arm
Fo do all dat,
Cuz he stay tight wit his peopo foeva!
13 #
Outa 14:21-29
Da One In Charge,
He wen split da Red Sea,
Cuz he stay tight wit his peopo foeva!
14He wen make da Israel peopo go
Right thru da middo,
Cuz he stay tight wit his peopo foeva!
15He wen wipe out da Pharaoh guy
An his army guys inside da Red Sea,
Cuz he stay tight wit his peopo foeva!
Da One In Charge Wen Take His Peopo To Dea Land
16Da One In Charge,
He wen take his peopo
Thru da boonies wea nobody live,
Cuz he stay tight wit his peopo foeva!
17Da One In Charge, he da one
Dat wen wack big kings,
Cuz he stay tight wit his peopo foeva!
18He wen kill kings dat get plenny powa,
Cuz he stay tight wit his peopo foeva!
19 #
Census 21:21-30
One a dem, Sihon,
Da king fo da Amor peopo,
Cuz he stay tight wit his peopo foeva!
20 #
Census 21:31-35
He wen kill anodda one, Og,
Da king fo da Bashan peopo,
Cuz he stay tight wit his peopo foeva!
21He wen take dea land
An give um to da Israel peopo,
Cuz he stay tight wit his peopo foeva!
22Da land wen come da property
Fo us Israel peopo,
Cuz us his worka guys,
Cuz he stay tight wit his peopo foeva!
Da One In Charge Take Kea His Peopo
23Us was nobody, but Da One In Charge
Neva foget us guys,
Cuz he stay tight wit his peopo foeva!
24He wen get us outa trouble
From da ones dat stay agains us,
Cuz he stay tight wit his peopo foeva!
25Da One In Charge, he da One give food
To eryting dat stay alive,
Cuz he stay tight wit his peopo foeva!
26Tell good tings
Bout da God dat stay in da sky,
Cuz he stay tight wit his peopo foeva!
Currently Selected:
Songs 136: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
