Smart Guys 15
15
1Wen somebody no talk nice to you,
Talk back with nice kine words
An da odda guy goin come quiet one mo time.
You talk harsh kine,
He goin come all huhu wit you.
2Da peopo dat know wat fo do erytime,
Dey make wat dey know
Soun good fo erybody.
Da stupid head peopo wit attitude,
Ony stupid kine stuff come outa dea mout.
3Da One In Charge, he see eryting.
He see wat da bad kine peopo do,
An da good kine peopo do.
4You tell peopo tings dat kokua dem,
Dat make um come alive inside.
Wen you tell dem words fo jam dem up,
Dat make um lose fight.
5Da peopo dat do bad kine stuff dat no bodda dem,
Dey no lissen wen dea faddah punish um fo teach um someting.
Da peopo dat lissen good wen somebody tell um dey wrong,
Dey smart fo lissen.
6Da peopo dat do da right ting erytime
Dey get plenny good stuff.
Wat da bad kine peopo get,
Ony give dem trouble.
7Da peopo dat know wat fo do erytime,
Dey teach peopo plenny good stuff.
Da stupid head kine peopo wit attitude,
Dey no can, no way!
8Wen da bad kine peopo
Make sacrifice fo God,
God tink, dat kine sacrifice stay pilau.
Wen da good kine peopo pray,
Dass wat God like.
9Da way da bad kine peopo make,
Dass wat Da One In Charge no like.
Da peopo dat go all out fo do da right ting,
Dass wat he like fo real kine.
10Da peopo dat go away from da right way,
Dey goin get good lickins fo teach um wass right.
Da peopo dat no lissen
Even wen somebody tell um dey wrong,
Dey goin mahke.
11Da One In Charge, he can even see inside
Wea da mahke peopo stay.
Den fo shua, he can even see inside
All da peopo dat stay alive.
12Da peopo dat no mo respeck fo nobody
Cuz dey tink dey know eryting,
Dey no like wen peopo tell dem dey wrong.
Dey no goin go
By da peopo dat know wat fo do erytime,
Fo aks dem fo help.
13Wen you stay real good inside,
Yoa face look nice too.
But wen you stay sad inside,
You lose fight.
14Da peopo dat undastan good,
Dey go all out fo learn stuff.
Da stupid head kine peopo wit attitude
Dey ony like learn stupid kine stuff.
15Da pooa kine peopo dat erybody put presha on,
Ery day, dey suffa.
But da peopo dat stay good inside,
Jalike dey stay party ery day.
16If you ony get litto bit stuffs,
But you get awesome respeck fo Da One In Charge,
So dat you stay sked a him.
Dass mo betta den wen you get plenny stuffs
But yoa head stay all jam up.
17Az mo betta you ony get litto bit vejable fo eat,
An da place get plenny love an aloha,
Den if you get one big luau wit plenny meat,
An erybody hate each odda!
18Da kine guy dat stay huhu all da time,
He ony like make erybody argue wit each odda.
Wen no mo notting bodda one guy,
He make erybody come so notting bodda dem.
19Da lazy buggah, eryting he do,
Jalike get keawe thorn.
Da guy dat do da right ting all da time,
Eryting he do, stay easy.
20Da kine guy dat know wat fo do erytime,
He make his faddah feel all good inside.
Da stupid buggah dat tink he no need learn notting,
He no give a rip if he shame his muddah.
21Da kine guy dat no mo brain,
He tink az good fun
Wen he go do stupid stuff an dat no bodda him.
Da kine guy dat undastan stuff
He erytime do da right ting.
22You make one plan, but you no tell nobody,
You jam up erybody.
But you aks plenny peopo wass good fo do,
Da ting goin happen.
23Wen somebody aks you someting
An you tell um someting dat help dem,
You feel good inside.
Wen you tell um someting dey need fo hear
Right den an dea,
Dass real good!
24Da peopo dat undastan stuff,
Dey goin go up an get da real kine life
Cuz a da way dey live.
Az how dey no goin end up
Down inside da Mahke Peopo Place.
25Da big head guys,
Da One In Charge broke down dea place
Wea dey get all dea stuff.
But fo da widow,
He make shua nobody steal her land,
Even litto bit.
26Wat da bad guys tink fo do,
Fo Da One In Charge, dass no good!
But wat da nice guys tell,
Fo Da One In Charge, dass all good.
27Da guys dat go all out fo make money,
Dey make pilikia fo dea ohana.
Da guys dat no touch
Da unda da table kine money,
Nobody goin try kill dem.
28Da peopo dat do da right ting erytime,
Wen somebody tell dem someting,
Dey tink firs fo long time
Bout wat dey suppose to tell back.
But da bad kine peopo,
Dey ony motormout fas fo tell pilau kine stuff.
29Da One In Charge stay far away from da bad kine peopo,
But wen da peopo dat do wass right pray,
He lissen.
30How da eyes look wen you smile,
Dat make peopo feel good inside.
Wen you get someting good fo tell,
Dat make peopo feel good inside too.
31Wen somebody give you
Strong kine words dat can keep you alive,
An you lissen,
Dat mean, you one a dose guys
Dat know wat fo do erytime.
32Da peopo dat no like learn how dey suppose to live,
Dat mean, dey hate demself
An tink dey no good.
Da peopo dat lissen
Wen somebody give dem strong kine words,
Dey goin learn how fo tink mo betta cuz a dat.
33You stay sked a Da One In Charge,
You goin learn how fo know wat fo do cuz a dat,
An how fo do da right ting erytime.
Wen you no make high makamaka kine,
Den peopo goin get respeck fo you.
Currently Selected:
Smart Guys 15: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
