Census 23
23
Da Firs Ting Balaam Tell From God
1Balaam tell, “Build seven altars hea, an make ready seven bulls an seven boy kine sheeps fo me.” 2Balak do wat Balaam tell um fo do, an da two guys make one sacrifice wit one bull an one boy kine sheep on top ery altar.
3Den Balaam tell Balak, “Stay ova hea by da side a yoa burn up kine sacrifice. I goin go ova dea. Maybe Da One In Charge goin meet wit me. Wateva he tell me, I goin tell you.” Den he go to one hill top wea no mo notting.
4God come meet him dea. Balaam tell, “I make ready seven altars awready, an I make one sacrifice wit one bull an one boy kine sheep on top ery altar.”
5Da One In Charge put some words in Balaam mout fo tell Balak. He tell Balaam, “Da words I give you jus now fo tell Balak, go back by Balak an tell um dat.”
6So Balaam go back by Balak. Balaam see him standing dea by da side a his burn up kine sacrifice, wit all da Moab prince guys dea. 7An Balaam tell dis spesho message from God:
“Balak wen bring me hea from da Aram land.
He da king fo Moab.
He call me from da mountains da east side a my land.
He tell me, ‘Go come! Put kahuna on top da Jacob peopo fo me!
Tell um how mad you stay wit dem!’
8How you tink I can put kahuna on top dem,
Wen God no put kahuna on top dem?!
How you tink I goin tell how mad I stay wit dem,
Wen Da One In Charge not mad wit dem?!
Not even!
9From da cliff tops, I see dem.
From on top da high hills I watch dem.
Look! Dey one peopo dat no live nea odda peopo!
Dey no tink dey jalike one a da odda peopos.
10No mo nobody can count how much dus
Da Jacob peopo kick up wen dey stay move!
No mo nobody can count
Even one part a dem!
Wen I mahke, I like be
Jalike dose peopo dat do da right kine stuff.
Wen my life pau,
I like fo happen jalike wat goin happen to dem!”
11Balak tell Balaam, “Wat you stay do to me! I wen bring you ova hea fo put kahuna on top da peopo dat stay agains me! So, wassup?! You stay tell God fo do ony good tings to dem!”
12Balaam tell um, “Eh! I gotta make shua fo tell ony wat Da One In Charge put inside my mout, you know!”
Da Numba Two Ting Balaam Tell From God
13Den Balak tell Balaam, “Go come wit me one diffren place! From dea, you can see dem, but not all a dem. An from dea, you can put kahuna on top dem!” 14So Balak take him by da Lookout Field on top da Pisgah Range. Ova dea Balak build seven altars, an make one sacrifice wit one bull an one boy kine sheep on top ery altar.
15Balaam tell Balak, “Stay ova hea by da side a da burn up kine sacrifice, an I go meet wit Da One In Charge ova dea.”
16Da One In Charge meet wit Balaam, an put da message in his mout. Da One In Charge tell um, “Go back by Balak, an tell him da message.”
17So Balaam go by Balak, an see him standing by da side a his burn up kine sacrifice wit da Moab prince guys. Balak aks him, “Wat Da One In Charge tell you?”
18Den Balaam tell da spesho message he get from God:
“Lissen up, Balak!
Hear me, Zippor boy.
19God, he not one guy. No way he tell he goin do someting,
An den he no do um.
He not da kine god goin tell someting,
An den tink az mo betta he neva tell dat.
Him, he talk, an den he do um.
He make one promise,
An he do wat he tell he goin do.
20Da One In Charge tell me fo tell you,
Dat he goin do good tings fo da Israel peopo.
He da One tell dat,
An I no can change um!
21“Da One In Charge look da Jacob peopo,
An dey no stay do wat dey not suppose to do.
No mo trouble dea fo da Israel peopo.
Dea God Da One In Charge stay wit dem.
Dey yell cuz he dea king,
An az why dey feel good inside!
22God wen bring dem outa Egypt.
Fo dem, he strong, jalike da wild cow.
23No can put kahuna on top da Jacob peopo.
No can find out from da odda gods
How fo win ova da Israel peopo.
Now peopo goin tell bout da Jacob peopo,
(Dass da Israel peopo),
‘Look wat God do fo dem!’
24Look! Da peopo stan up jalike da wahine lion.
Dey get ready jalike da lions,
Dat no res till dey eat wat dey catch,
An drink da blood.”
25Den Balak tell Balaam, “Den no put kahuna on top dem, an no tell dat God goin do good tings fo dem too!”
26Balaam tell um, “Eh! I wen tell you awready, I gotta do eryting Da One In Charge tell me fo do.”
Da Numba Three Ting Dat Balaam Tell From God
27Den Balak tell Balaam, “Go come, let me bring you anodda place. Maybe da way God goin see um, goin be okay fo you put kahuna on top dem fo me, from ova dea.” 28An Balak take Balaam on top a Mount Peor, wea da land you can see az ony wase land.
29Balaam tell, “Build seven altars ova hea, an make ready seven bulls an seven boy kine sheeps fo me.” 30Balak do wat Balaam tell um fo do, an make one sacrifice wit one bull an one boy kine sheep on top ery altar.
Currently Selected:
Census 23: HPB
Highlight
Copy
Compare
Share
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible