Nahum 2
2
Da Nineveh Peopo No Goin Win
1Get guys stay come
Dat goin smash you Nineveh peopo!
Guard yoa strong wall!
Watch da road!
Make ready!
Come real strong!
2Get guys dat like wipe out da peopo dat come from Jacob
An wen wase um awready.
Jalike wen peopo pull off branches from one grape vine.
But Da One In Charge goin make da Israel peopo
Come awesome one mo time.
3Da army guys dat goin go agains Nineveh,
Dey carry red shields.
Dey get dark red uniform.
Da metal in dea war wagons shine
Wen dey stay ready fo attack.
Dey lif up dea spears an shake um.
4Da war wagons run aroun inside da big town jalike dey pupule.
Dey go an come fas aroun da open places.
Dey look jalike burning torches.
Dey go fas jalike lightning.
5Da leada guy goin call da bestes army guys,
Dey almos fall down cuz dey go fas.
Da guys dat attack run to da Nineveh town wall,
An make ready one big cova
Dat let um come nea an bus up da wall.
6Da gates fo da riva dams come open,
An da palace wall fall down.
7Da Nineveh peopo come prisonas an gotta go way.
Da slave girls moan jalike doves.
Dey wack dea ches fo show dey sad.
8Nineveh town jalike one pool dat leak all da time,
An da peopo jalike da watta dat run out.
But now, peopo yell, “Stop! Stop!”
But no mo nobody turn aroun an come back.
9Rip off da silva!
Rip off da gold!
Nobody can count all da rich kine stuff!
Fo shua dey stay rich inside Nineveh town!
10Da army guys goin rip off all da Nineveh peopo stuffs fo shua!
Da Nineveh peopo lose fight an come bum out.
Dey stay sked an shaking.
Erybody look sked.
11Befo time, Nineveh stay jalike one cave
Wea da strong lions live,
Wea dey feed dea bebes,
Wea da lion an da wahine lion go,
An dea bebes no need stay sked a notting.
But wea Nineveh stay now?
12Da strong lion wen kill enuff food fo da bebes,
An enuff fo da muddah lions.
Dey fill up dea cave wit da animals dey wen kill.
Az jalike how da Nineveh peopo wen stay.
13Da One In Charge, Da God Ova All Da Armies, tell dis:
“You know wat?! Me, I stay agains you Nineveh peopo.
I goin burn up yoa war wagons in smoke!
Odda armies goin wipe out yoa young guys wit swords,
No matta dey skery jalike lions!
I no goin let you guys kill notting fo eat no moa!
No mo nobody goin lissen yoa messenja guys one mo time!”
Currently Selected:
Nahum 2: HPB
Highlight
Share
Compare
Copy
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible
