Mark 1

John Da Baptiza Teach

(Matthew 3:1-12; Luke 3:1-9, 15-17; John 1:19-28; Outa Egypt 23:20; Isaiah 40:3; Malakai 3:1)

1You wen hear da Jesus story? He da Christ Guy, da Spesho Guy God Wen Sen. He God Boy. Dis da time da Good Kine Stuff Bout Christ start fo happen.

2 # Mal 3:1 Isaiah, da guy dat wen talk fo God long time befo time, he write dis inside da Bible: “God tell, lissen up!

“I goin sen my messenja guy.

He goin go ahead a you

Fo get eryting ready

Befo you come,

Cuz you my real Spesho Guy, you know.

3 # Isa 40:3 Inside da boonies,

My messenja guy goin talk real loud an real strong

Fo erybody hear:

‘Eh! Make da road ready

Fo Da One In Charge!

Make um strait fo him!’ ”

4Dat time da guy John show up inside da boonies, an baptize da peopo. He stay teach, “You guys gotta come sorry an like no do all da bad kine stuff you stay do now, an no do um no moa. Den God goin let you guys go an hemo all yoa shame. Dass why I stay baptize peopo.” 5All da peopo from Judea side an Jerusalem town, dey go da boonies fo lissen John. Dey tell um fo real kine all da bad kine stuff dey wen do, an he baptize um inside da Jordan Riva.

6 # 2Kings 1:8 You know, John clotheses come from da camel hair, an he make one rope outa ledda fo one belt. He eat grasshoppas, an he get honey from da bees.

7Dis wat he tell, “Afta me goin come anodda guy. He get mo powa den me. An you know wat? I not even importan enuff fo go down an help him hemo his slippas. 8I baptize you guys wit watta, but da way he goin baptize you guys, he goin give you da Good An Spesho Spirit fo take ova you.”

John Baptize Jesus

(Matthew 3:13-17; Luke 3:21-22)

9Dat time, Jesus come from Nazaret town, Galilee side, an John baptize him inside da Jordan Riva. 10Right den Jesus come up outa da watta. An you know wat? Jesus see da sky broke open, an spock God Spirit come down on top him, jalike one dove. 11#Start 22:2; Songs 2:7; Isa 42:1; Matt 3:17; 12:18; Mark 9:7; Luke 3:22An wow! Get one voice from da sky tell, “You my boy! I fo real kine get love an aloha fo you, an I stay good inside cuz a you!”

Da Devil Try Make Jesus Do Bad Kine Stuff

(Matthew 4:1-11; Luke 4:1-13)

12Right afta dat, God Spirit make Jesus go inside da boonies. 13Had wild animals ova dea. Jesus, he stay dea forty days. Satan try presha him fo make him do bad kine stuff, but Jesus neva. An had angel messenja guys from God dat come an take kea him.

Jesus Start Fo Teach Galilee Side

(Matthew 4:12-17; Luke 4:14-15)

14Laytas, King Herod throw John Da Baptiza Guy inside da prison. Afta dat, Jesus go Galilee side, an he tell da peopo da Good Stuff From God. 15#Matt 3:2He tell, “Time awready! God stay king hea now. You guys gotta come sorry fo all da bad kine stuff you guys stay do, an no do um no moa. An da Good Stuff From God I stay tell you guys about, you guys gotta stay shua dat stay fo real kine!”

Jesus Tell Four Fishamen Fo Come Wit Him

(Matthew 4:18-22; Luke 5:1-11)

16Dat time Jesus stay walking by Galilee Lake, an he spock Simon an his braddah Andrew. Dey stay throw net inside da watta, cuz dey fishamen.

17Jesus tell um, “Eh you guys! Go come wit me! Be my guys! Da way you guys fish fo fish, I goin teach you guys how fo fish fo peopo!” 18Right den an dea, dey leave dea nets an go wit him.

19Wen dey go from dea, he spock James an his braddah John. Zebedee dea faddah. Dey inside da boat fo fix dea nets. 20Right den an dea he tell um fo come wit him fo be his guys. Dey go way from dea faddah Zebedee dat stay inside da boat wit da worka guys, an dey go wit Jesus.

Jesus Make One Bad Kine Spirit No Bodda One Guy No Moa

(Luke 4:31-37)

21Jesus an his guys, dey go Capernaum town. On da Jew Res Day, dey go inside da Jew church. Jesus start fo teach da peopo. 22#Matt 7:28-29Wat he teach um blow dea mind! Cuz he teach wit plenny powa, not like da teacha guys dat teach da Rules From God, an dem guys no mo powa.

23Get one guy inside da Jew church wit one bad spirit dat wen take ova him. Right den an dea he yell, 24“Whoa! You Jesus from Nazaret! Wat you like do to us? How come you come ova hea? Fo wipe us out, o wat? I know who you! You da Good An Spesho Guy from God!”

25Jesus scold da bad spirit, “Shut yoa mout! Let go da guy!” 26Den da bad spirit shake up da guy plenny. Da spirit yell real loud. Den he let go da guy.

27Da peopo, dat blow dea mind. Dey tell each odda, “Eh! Wass dis?! Wat kine new teaching dis? Dis guy, he get powa! He even tell da bad kine spirits wat fo do, an dey do um!” 28Right den an dea, da peopo go all ova Galilee side, fo tell erybody bout Jesus.

Jesus Make Plenny Sick Peopo Come Good

(Matthew 8:14-17; Luke 4:38-41)

29Right den an dea Jesus dem go outside da Jew church, an dey go Simon an Andrew house. James an John go too. 30Simon muddah-in-law get one feva. Simon dem tell Jesus, “Eh, her sick, you know.” 31Jesus go an take her by da hand an pull her up. Right den da feva pau, an her give dem food.

32Wen da sun go down, an da Res Day pau, da peopo bring all da sick peopo an da peopo dat get bad spirits dat take ova dem. 33All da peopo from da town stay crowd outside da house. 34Jesus make plenny peopo dat get all kine sick come good. He make all da bad kine spirits no bodda da peopo no moa. He tell da spirits, “No talk!” cuz dey know who him.

Jesus Pray An Teach All Ova Galilee

(Luke 4:42-44)

35Real early morning time, wen start fo get light, Jesus get up an go outa da house. He go one place wea no mo nobody, an pray ova dea. 36Simon dem go look fo him. 37Dey find him, an dey tell, “Eh, erybody stay looking fo you, you know!” 38But he tell, “Neva mind! We gotta go da odda towns aroun hea, cuz I gotta teach dea too. Dass why I wen come.” 39#Matt 4:23; 9:35So, he teach inside all da Jew churches all ova Galilee, an make all da bad kine spirits no bodda da peopo no moa.

Jesus Make One Lepa Guy Come Good

(Matthew 8:1-4; Luke 5:12-16)

40Had one lepa guy go by Jesus, an go down in front him an beg him. He tell, “If you like, you can make me come good fo me go wit da odda peopo fo pray, aah?” 41Jesus look at him, an he pity him. He touch da guy, an tell, “Okay, I do um. Go come good.” 42Right den an dea da lepa guy come good. He no mo da lepa kine sick no moa!

43-44 # Pries 14:1-32 Jesus talk strong to da guy. He tell um, “Eh! You betta not tell nobody bout dis! Go, let da pries guy check you out. No foget make da kine sacrifice now, jalike Moses wen tell inside da Rules From God. Den erybody goin know dat you stay good now.” Den he tell um fo go. 45But da guy, he go outside an tell erybody wat wen happen to him. Az why Jesus no can stay inside da towns, but he gotta stay outside by da boonies. An da peopo, dey stay come from all ova da place fo hear him.

Currently Selected:

Mark 1: HPB

Highlight

Compare

Copy